Read Sehwi Yosua 15 Bible Online

Yosua 15 - Sehwi bible

Yosua 15

¹ Aseɛ bɔ bɛfa bɛmane Yuda abusua kure ne, kyɛbɔ bɛ mmusua mmusua nemɔ te ne, ɔtrɛ kɔ ngwaen kodwu Edom ɛwɛen so, ɔne Sen ɛserɛ so ngwaen dɔ paa.

²Bɛ ngwaen dɔ ɛwɛen ne, ɔhyɛ ye bo fi Ngyee Po noa dɔ, ɔne mboanoa bɔ ye nye nea ngwaen dɔ ne.

³Ɔkɔ alaa kɔfa Akrabim pambaa ne ngwaen dɔ, toonn kodwu Sen, na ɔkɔfa Kadese Banea ngwaen dɔ. Ɔpɛ nu Hesron, na ɔfo kɔ Ada, na ɔkondo kɔ Kaka.

⁴Ɔpɛ nu kɔ Asimɔn, na okofite Misraim bɔnza ne anu, na okogua mboanoa. Na ɛhe yeɛ ɔte ɛmɔ ngwaen dɔ wɛen ɔ.

⁵Ngyee Po ne yeɛ ɔte Yuda eyia afiteleɛ ɛwɛen ɔ, na ɛwɛen ne kɔ alaa kodwu asue Yɔɔdan abɔleɛ. Sorɔ dɔ ɛwɛen ne trɛ fi Ngyee Po ne noa bɔ ɔwɔ asue Yɔɔdan abɔleɛ ne.

⁶Ɛwɛen ne trɛ kɔ Bete Hogela, na ɔkɔpɛ nu wɔ Bete Araba, na okodwu Ruben awa Bohan nyɔboɛ ne anwo.

⁷Ɛwɛen ne fi Akɔre bɔnza ne anu fo kɔ Dɛbi, na ɔkondo fa sorɔ dɔ kɔ Gilgal, bɔ ɔwɔ Adumim pambaa ne ndendeneɛ so, bɔ ɔwɔ bɔnza ne ngwaen dɔ ne. Ɛwɛen ne toa so kɔfa Ɛn Semese nzue noa, na ye noa kɔpem Ɛn Rogyel.

⁸Ɛwɛen ne fo kɔfa Hinom Awa bɔnza ne anu, wɔ Yebusifoɛ bokaa ne ngwaen dɔ (bɔ ye ole Yerusalem). Bokaa bɔ ɔwɔ Hinom bɔnza ndendeneɛ so ne, ɛwɛen ne nate ye anwuro dɔ, wɔ eyia atɔleɛ, wɔ Refaim bɔnza ne sorɔ dɔ.

⁹Ɛwɛen ne fi bokaa ne aso a, ɔkɔfa Nefetoa nzue ne ti, na ofi berɛ a, ɔkɔfa Efron bokaa nguro nemɔ aso. Ɛwɛen ne kondo bafa Baala (bɔ bɛfrɛ ye Kiriate Yearim);

¹⁰ɛwɛen ne fi Baala a, ɔkondo fa eyia atɔleɛ kɔ Sɛre bokaa ne anwo, ɔpɛ nu kɔ Yearim bokaa ndoroleɛ nu wɔ ye sorɔ dɔ, (bɔ bɛfrɛ berɛ Kesalon ne), ɔtorotoro kɔ Bete Semese, na ɔpɛ nu kɔ Timina.

¹¹Ɛwɛen ne kɔ Ekron sorɔ dɔ bokaa ne ndoroleɛ nu. Afei ɔkondo kɔ Sikeron, ɔpɛ nu kɔ Baala bokaa ne aso kodwu Yabeneel, na afei ye noa kɔpem ɛpo ne.

¹²Mediterenia Ɛpo ne yeɛ ɔte eyia atɔleɛ ɛwɛen ɔ. Sɔ wɛen ne yeɛ wapɛ Yudafoɛ nwo wayia ɔ, kyɛbɔ bɛ mmusua nemɔ te ɔ.

¹³Kyɛbɔ AWURADE hyɛle Yosua nen, ɔfale Yuda abusua kure aseɛ ne bie mane Yefune awa Kalebo. Aseɛ ne ole Kiriate Aba, bɔ ye ole Hebron ne. (Né Aba te Anake baba).

¹⁴Kalebo foane Anake bosofoɛ nza nemɔ fili berɛ. Bɛ ole Sesayi, Ahiman ne Talmae.

¹⁵Ofili berɛ ne, ɔɔfale koɛ tetale Dɛbifoɛ. Daa ne, né Dɛbi dumaa ole Kiriate Sefa.

¹⁶Na Kalebo sele kyɛ, “Bienzua biala bɔ ɔkɔho koli Kiriate Sefa so ngonim nen, ngɔfa mma brasua Akesa maa okogya.”

¹⁷Na Otiniɛl bɔ ɔte Kalebo aliɛma bienzua Kenase awa ne, ɔho lili Kiriate Sefa so ngonim, yiti Kalebo fale ɔwa brasua Akesa maa ogyale ye.

¹⁸Na braa ne hɔle agyaa bo wɔ Otiniɛl awuro nen, osele ohu kyɛ ɔ́srɛ aseɛ ófi ye baba Kalebo berɛ. Na braa ne fili ye afunum ne aso dwuli ase nen, Kalebo bisale ye kyɛ, “Nzikyɛ yeɛ ekuro ɔ?”

¹⁹Na obuale ye kyɛ, “Kyɛ me nikye. Ofikyɛ aseɛ bɔ afa ama me wɔ ngwaen dɔ ne, ɔte wosee. Yiti ma me mbombonzue koso.” Yiti Kalebo fale sorɔ dɔ mbombonzue ne ngwaen dɔ mbombonzue bokale ye so.

²⁰Yuda abusua kure ne, ye agyapadeɛ deɛ ɛne, kyɛbɔ nu mmusua mmusua nemɔ te ne.

²¹Yuda abusua kure ne anu ama, bɛ nguro mɔ bɔ bɛwɔ ngwaen dɔ paa, bɔ ɔkɔ Edom ɛwɛen so ne, bɛ ɛhe: Kabeseel, Edere, Yagure,

²²Kina, Dimona, Adada,

²³Kedese, Hasɔ, Yitinan,

²⁴Sife, Telem, Bealote,

²⁵Hasɔ Hadata, Keriote Hesron (bɔ bɛfrɛ ye Hasɔ ne),

²⁶Amam, Sema, Molada,

²⁷Hasa Gada, Hesemon, Bete Pelete,

²⁸Hasa Soale, Beɛ Hyeba, Bisiotia,

²⁹Baala, Yim, Esem,

³⁰Ɛltolade, Kyɛsil, Hɔma,

³¹Siklage, Mademana, Sansana,

³²Lebaote, Silihim, Ayin ne Rimon. Nguro ne amukoraa bɛte aburanyɔ ne ngona, bɛ ne bɛ namue mɔ.

³³Aseɛ frɛtɛɛ ne aso nguro nemɔ ɛhe: Esetao, Sora, Asena,

³⁴Sanoa, Ɛn Ganim, Tapua, Enam,

³⁵Yamute, Adulam, Soko, Aseka,

³⁶Saaraim, Aditim, Gedera, Gederotim. Nguro nemɔ te buru ne nna, bɛ ne bɛ namue mɔ.

³⁷Senan, Hadasa, Migidal Gade,

³⁸Dilan, Misepe, Yokete Ɛl,

³⁹Lakise, Bosekate, Eglon,

⁴⁰Kabon, Lamam, Kitilisi,

⁴¹Gederote, Bete Dagɔn, Naama ne Makeda. Nguro nemɔ te buru ne nzia, bɛ ne bɛ namue mɔ.

⁴²Libina, Eta, Asan,

⁴³Yipita, Asena, Nesibo,

⁴⁴Keila, Akisibo ne Maresa. Nguro nemɔ te ngona, bɛ ne bɛ namue mɔ.

⁴⁵Ekron ne ye nwo nguro ne namue mɔ;

⁴⁶fite Ekron bɔ ɔkwaadwu mboanoa, Asedɔde ne ye mbɔtam amukoraa, bɛ ne bɛ namue mɔ.

⁴⁷Asedɔde ne ye nwo nguro ne ye namue mɔ; Gasa ne ye nwo nguro ne ye namue mɔ; bɔ ɔkwaadwu Misraim bɔnza ne, yeɛ afei Ɛpo Piri ne noa.

⁴⁸Mmokaa nemɔ aso nguro ɛhe: Samiri, Yatiri, Soko,

⁴⁹Dana, Kiriate Sana (bɔ ye ole Dɛbi),

⁵⁰Anabo, Esetemo, Anim,

⁵¹Gosen, Holon ne Gilo. Nguro nemɔ te buru ne ko, bɛ ne bɛ namue mɔ.

⁵²Arabo, Duma, Esan,

⁵³Yanum, Bete Tapua, Afeka,

⁵⁴Humita, Kiriate Aba (bɔ ye ole Hebron), ɔne Siɔ. Nguro nemɔ te ngona, bɛ ne bɛ namue mɔ.

⁵⁵Mayɔn, Kamɛl, Sife, Yuta,

⁵⁶Yesreel, Yokedeam, Sanoa,

⁵⁷Kain, Gibea ne Timina. Nguro nemɔ te buru, bɛ ne bɛ namue mɔ.

⁵⁸Halehul, Bete Sure, Gedɔ,

⁵⁹Maarate, Bete Anote ne Ɛltekon. Nguro nemɔ te nzia, bɛ ne bɛ namue mɔ.

⁶⁰Kiriate Baal (bɔ bɛfrɛ ye Kiriate Yearim) ne Raba. Nguro nemɔ te nyɔ, bɛ ne bɛ namue mɔ.

⁶¹Ɛserɛ ne aso nguro nemɔ ɛhe: Bete Araba, Midin, Sekaka,

⁶²Nibesan, Ngyee Kuro, yeɛ Ɛn Gedi. Nguro nemɔ te nzia, bɛ ne bɛ namue mɔ.

⁶³ Nakoso Yebusifoɛ bɔ né bɛte Yerusalem ne de, Yudafoɛ angora andu bɛ bamvi berɛ; yiti Yebusifoɛ ne Yudafoɛ batena Yerusalem toonn maa waadwu ɛnɛ.