Read Sehwi Yosua 16 Bible Online

Yosua 16 - Sehwi bible

Yosua 16

¹Aseɛ bɔ bɛfa bɛmane Yosef boso ama ne, ɔhyɛ ye bo fi asue Yɔɔdan noa wɔ Yeriko bue nu dɔ, wɔ Yeriko berɛ nzue ye eyia atɔleɛ bɔ ɔkɔ ɛserɛ ne aso, na ɔfa Yeriko kodwu mmokaa ne aso dɔ ɔkɔ Betel.

²Afei ofi Betel kɔ Luse, na ɔpɛ nu kɔ Atarote bɔ ɔwɔ Akifoɛ aseɛ so.

³Ɔtorotoro kɔ eyia atɔleɛ, ɔkɔ Yafletefoɛ ɛwɛen so, ɔkɔ Bete Horon aseɛnwo dɔ ɛwɛen so, ɔtoa so kɔ Gɛsɛre, na ye noa kodwu mboanoa.

⁴Yosef boso ama bɔ bɛ ole Manase abusua kure ne Efraim abusua kure ne, bɛ sa hane b’agyapadeɛ.

⁵Efraim abusua kure ne, kyɛbɔ ye mmusua mmusua te ne, b’aseɛ ne wɛen ɛhe: b’aseɛ ne, ye wɛen wɔ eyia afiteleɛ ole Atarote Ada bɔ ɔkwaadwu Bete Horon sorɔ dɔ ne.

⁶Ɛwɛen ne fi berɛ kogua ɛpo nu; Mikimeta wɔ ye sorɔ dɔ. Ɛwɛen ne kondo wɔ eyia afiteleɛ dɔ kɔ Taanate Silo, na ɔpɛ nu berɛ wɔ eyia afiteleɛ ɔkɔ Yanoa.

⁷Afei ɛwɛen ne fi Yanoa torotoro kɔ Atarote ne Naara, odwu Yeriko, na ɔkɔpem Yɔɔdan noa.

⁸Ɛwɛen ne fi Tapua a, ɔkɔfa eyia atɔleɛ dɔ kɔ Kana bɔnza ne anu, na ye noa kɔpem ɛpo ne. Efraim abusua kure ne, kyɛbɔ ye mmusua mmusua nemɔ te ne, b’agyapadeɛ ɛne.

⁹ Afei koso, nguro bɔ bɛye befili Manasefoɛ agyapadeɛ nu bɛmane Efraimfoɛ ne, bɛboka aseɛ ne aso, nguro ne amukoraa ne bɛ namue mɔ.

¹⁰ Nakoso Kanaanfoɛ bɔ né bɛte Gɛsɛre ne de, Yisraelfoɛ andu bɛ amvi berɛ; yiti Kanaanfoɛ atena Efraimfoɛ nu toonn maa waadwu ɛnɛ, nakoso Efraimfoɛ hyɛ bɛ maa bɛyɔ adwuma.