Read Sehwi Yosua 17 Bible Online

Yosua 17 - Sehwi bible

Yosua 17

¹ Bɛmane Manase abusua kure ne aseɛ, ofikyɛ Manase yeɛ ɔte Yosef bamuɛbaa ɔ. Gileade ne Basan aseɛ ne, bɛfa bɛmane Manase bamuɛbaa Makyiri bɔ ɔwa ole Gileade ne, ofikyɛ né Makyiri te koɛhonɛniɛ.

²Bɛfale aseɛ ne bie koso bɛmane Manase abusua kure ne anu mmusua ngaa nemɔ: Abiesa abusua, Heleke abusua, Aseriɛl abusua, Sɛkem abusua, Hefa abusua ne Semida abusua. Sɔ mmienzua nemɔ, bɛte Yosef awa Manase ye bosofoɛ, na bɛ yeɛ bɛlela bɛ mmusua nemɔ noa ɔ.

³ Selofehade de, wannya baa bienzua. Ɔse ole Hefa bɔ ɔse ole Gileade bɔ ɔse ole Makyiri bɔ ye koso ɔse ole Manase ne. Ye mma nemɔ te mmrasua ngome. Bɛ dumaa ɛhe: Mahela, Nowa, Hogela, Milka ne Tisa.

⁴Na bɛhɔle ɔsɔfo Eleasa ne Nun awa Yosua ne mbanyi nemɔ berɛ beesele bɛ kyɛ, “AWURADE hyɛle Mose kyɛ, aseɛ bɔ ɔfa ma yɛ abusuafoɛ mmienzua nemɔ nen, yɛ koso ɔsɛ kyɛ ɔma yɛ bie.” Yiti kyɛbɔ AWURADE hyɛle nen, Yosua mane bɛ aseɛ bɔ ɔfa mane bɛ baba abusuafoɛ mmienzua ne bie.

⁵Yiti aseɛ ne, Manase bosofoɛ nyane ngyɛmuɛ buru bɛfa bɛbokale Gileade ne Basan bɔ bɛwɔ Yɔɔdan si dɔ ne aso.

⁶Ofikyɛ Manase bosofoɛ mmrasua ne, benyane agyapadeɛ bɔ ye bosofoɛ mmienzua ne nyane ye ne bie. Na Gileade aseɛ ne, Manasefoɛ ngaa ne yeɛ benyane ye ɔ.

⁷Manase aseɛ ne wɛen fi Asɛ kɔka Mikimeta bɔ ɔwɔ Sɛkem eyia afiteleɛ dɔ ne, na ɛwɛen ne fi berɛ kɔ ngwaen dɔ, wɔ Ɛn Tapuafoɛ bue nu dɔ.

⁸Tapua aseɛ ne yɛle Manase deɛ, nakoso Tapua kuro bɔ ɔwɔ Manase ɛwɛen so ne de, ɔyɛle Efraimfoɛ deɛ.

⁹ Ɛwɛen ne torotoro kɔ Kana bɔnza ne anu dɔ. Berɛ nguro nemɔ bɔ bɛwɔ bɔnza ne ngwaen dɔ ne, bɛte Efraimfoɛ deɛ, nakoso bɛwɔ Manasefoɛ aseɛ so. Afei Manase ɛwɛen ne kɔfa bɔnza ne sorɔ dɔ, na ye noa kɔpem mboanoa.

¹⁰Ngwaen dɔ aseɛ ne te Efraim deɛ, yeɛ sorɔ dɔ aseɛ ne te Manase deɛ, na bɛ wɛen ole ɛpo ne. Manase ne Asɛ bɛbɔ wɛen wɔ sorɔ dɔ, na osa ne Yisaka bɛbɔ wɛen wɔ eyia afiteleɛ.

¹¹ Yisaka ne Asɛ aseɛ ne, nguro hemɔ wɔ so bɔ bɛte Manase deɛ ɔ: Bete Sean ne ye nwo namue mɔ, Yiblim ne ye nwo namue mɔ, Dɔɔ kuro berɛ ama ne ye nwo namue mɔ, Ɛn Dɔɔ kuro berɛ ama ne ye nwo namue mɔ, Taanake kuro berɛ ama ne ye nwo namue mɔ, Megido kuro berɛ ama ne ye nwo namue mɔ (yeɛ Nafate nza nu ngyɛmuɛ ko).

¹² Nakoso Kanaanfoɛ bɔ bɛtete sɔ nguro nemɔ aso ne, Manasefoɛ bangora bandu bɛ bamvi berɛ, yiti Kanaanfoɛ hɔle so tenane sɔ aseɛ ne aso.

¹³Na nziɛ ye bɔ Yisraelfoɛ nwo yɛle se ne, bɛhyɛle Kanaanfoɛ nemɔ maa bɛyɔle adwuma bɛmane bɛ, nakoso bandu bɛ bamvi aseɛ ne aso.

¹⁴Yosef abusua kure ne sele Yosua kyɛ, “Nzu ati yeɛ afa agyapadeɛ aseɛ porɛ komapɛ ama me ɔ? Me bosofoɛ sone, ofikyɛ AWURADE ayira me alaa maa waadwu ɛnɛ.”

¹⁵Na Yosua buale bɛ kyɛ, “Sɛ wɔ boso atrɛ a, nzaade kɔ ɛhɔayeɛ nu dɔ, wɔ Perisifoɛ ne Refaimfoɛ aseɛ ne aso kɔsoso dɔ fa, ofikyɛ Efraim mmokaa aseɛ ne te kãa ma wɔ.”

¹⁶Na Yosef abusua kure ne buale kyɛ, “Mmokaa aseɛ ne te kãa ma yɛ. Afei koso, Kanaanfoɛ amukoraa bɔ bɛwɔ aseɛ frɛtɛɛ ne aso ne, bele buralɛ teaseɛnam mɔ: bɛwɔ Bete Sean ne ye namue mɔ nu, ɔne Yesreel bɔnza ne anu.”

¹⁷Na Yosua sele Efraimfoɛ ne Manasefoɛ, bɔ bɛte Yosef boso ama ne kyɛ, “Wɔ boso atrɛ amba, na wɔ nwo yɛ se; yiti nna aseɛ porɛ komapɛ yeɛ odi kyɛ enya ɔ,

¹⁸na mmom mmokaa aseɛ ne kɔyɛ wɔ deɛ. Ɔwɔ nu kyɛ ɔte ɛhɔayeɛ de, nakoso kɔso fa, na ofi ye ti bɔ ɔkwaaha ye ti ne kɔyɛ wɔ deɛ. Kanaanfoɛ ne, ɔwɔ nu kyɛ bele buralɛ teaseɛnam, yeɛ afei bɛ nwo yɛ se de, nakoso ɛkɔhora kɔfoa bɛ kofi berɛ.”