Read Sehwi Yosua 18 Bible Online

Yosua 18 - Sehwi bible

Yosua 18

¹Yisraelfoɛ lili aseɛ ne aso ngonim yiele nen, bɛ mukoraa bɛbɔle dwaa wɔ Silo, na besili ɛtena sua atenaleɛ ne wɔ berɛ.

²Né waha Yisraelfoɛ abusua kure nzoo bɔ né bɛ de bennyane agyapadeɛ ne bie ɔ.

³Yiti Yosua sele Yisraelfoɛ kyɛ, “Aseɛ bɔ AWURADE ɛmɔ nana mɔ Nyameɛ wafa wama ɛmɔ ne, kyinzu koraa yeɛ ɛmɔtwetwe ɛmɔ gya ase maa okoodwu koraka né ɛmɔaafa ɔ?

⁴Abusua kure biala, ɛ́mɔye nu mmienzua nza. Mésoma bɛ maa bɛkɔfa aseɛ ne aso amukoraa, ná bɛkyerɛ aseɛ ne, ɔne so nningyein nwo dwirɛ. Ɛhe yeɛ yɛkogyina so yɛkɔhyɛ maa ɔkɔyɛ b’agyapadeɛ ɔ, ná ye si ye basa bawa me wa.

⁵Odi kyɛ bɛkyɛ aseɛ ne anu nzoo; ofikyɛ Yuda abusua kure de, wanya ye deɛ wɔ ngwaen dɔ dada, yeɛ Yosef boso ama wora banya bɛ deɛ wɔ sorɔ dɔ dada.

⁶Odi kyɛ ɛmɔkyɛ aseɛ ne anu nzoo, ná ɛ́mɔfa ye nwo amaneɛ bɛbabɔ me, na ngogua serewa ngɔma ɛmɔ wɔ AWURADE yɛ Nyameɛ nyunu wa.

⁷ Lewifoɛ mɔ de, bengonya aseɛ biala wɔ ɛmɔ nu, ofikyɛ AWURADE sɔfolilɛ adwuma ne yeɛ ɔte b’agyapadeɛ ɔ. Na Gade abusua kure, Ruben abusua kure, ɔne Manase abusua kure ne bue de, banya b’agyapadeɛ deɛ wɔ Yɔɔdan si eyia afiteleɛ, na sɔ aseɛ ne yeɛ AWURADE somvoɛ Mose fa mane bɛ ne.”

⁸Mmenia bɔ bɛkwaafa aseɛ ne aso ná bɛkyerɛ ye nwo dwirɛ nen, anzana bɛbaasi nu ne, Yosua hyɛle bɛ kyɛ, “Ɛmɔhɔ bɛɛfa aseɛ ne amukoraati so, ɛmɔhyerɛ ye nwo dwirɛ, ná ɛmɔsa bɛbra me wa; na ngogua serewa wɔ Silo wa, wɔ AWURADE nyunu ngɔma ɛmɔ.”

⁹Yiti ɛbɔfoɛ nemɔ hɔle bɛɛfale aseɛ ne aso, bɛhyerɛle kyɛbɔ besi bɛhyɛle nu nzoo ne, ɔne nguro somaa bɔ bɛwɔ bɛ nu biala nu beguale nwomaa bie anu, na afei besa bɛwale Yosua berɛ wɔ asikyeleɛ ne anu wɔ Silo.

¹⁰Yosua guale serewa mane bɛ wɔ AWURADE nyunu wɔ Silo, na afei Yosua mane Yisrael abusua kure ngaa ne anu biala sa hane ye aseɛ.

¹¹Serewagualɛ ne lili moa yele Benyamin abusua kure ne, kyɛbɔ bɛ mmusua mmusua nemɔ te ne, na aseɛ bɔ Yosua fa mane ye ne ɔla Yuda abusua kure ne Yosef abusua kure bɛ deɛ afia.

¹²Bɛ sorɔ dɔ wɛen ne ɔhyɛ ye bo fi asue Yɔɔdan noa. Ɛwɛen ne kɔ Yeriko ndoroleɛ nu wɔ ye sorɔ dɔ. Ɔsẽ kɔfa mmokaa aseɛ ne aso kɔ eyia atɔleɛ bue nu dɔ, na ye noa kɔpem Bete Awen ɛserɛ so.

¹³Ɛwɛen ne fi berɛ a, ɔpɛ nu kɔ Luse ngwaen dɔ, ɔkɔ Luse (bɔ ye ole Betel) ndoroleɛ nu dɔ, na afei ɔtorotoro kɔ Atarote Ada, na ɔkɔ bokaa bɔ ɔwɔ Bete Horon aseɛnwo dɔ ne aso.

¹⁴Ɛwɛen ne buka fa neka foforɛ, na ɔkondo kɔ eyia atɔleɛ. Ɔfa aseɛnwo dɔ bokaa ne ngwaen wɔ Bete Horon ndendeneɛ so, na ɔkɔpem Kiriate Baal (bɔ ye ole Kiriate Yearim), bɔ ɔte Yuda abusua kure kuro ne. Aseɛ ne, ye eyia atɔleɛ dɔ ɛwɛen ɛne.

¹⁵Ye ngwaen dɔ wɛen ne hyɛ ye bo fi Kiriate Yearim tiwaa, ɔtoa so kɔ Efron, na ɔkɔ alaa kodwu Nefetoa nzue ne ti.

¹⁶Bokaa bɔ ɔwɔ Hinom Awa bɔnza ndendeneɛ so, bɔ ɔwɔ Refaim bɔnza ne sorɔ dɔ ne, ɛwɛen ne torotoro kɔ ye nye abo. Ɔkɔ Hinom bɔnza ne ngwaen dɔ, wɔ Yebusifoɛ ndoroleɛ nu ngwaen dɔ, na ɔtorotoro kɔ Ɛn Rogyel.

¹⁷Afei ɛwɛen ne kondo fa sorɔ dɔ kɔ Ɛn Semese, na ɔtoa so kɔ Gelilote bɔ ɔwɔ Adumim pambaa ndendeneɛ so ne, na ɔtorotoro kɔ Ruben awa Bohan Nyɔboɛ ne anwo.

¹⁸Ɔpɛ nu kɔ Bete Araba ndoroleɛ nu sorɔ dɔ, na ɔtorotoro kɔ Araba.

¹⁹Ɛwɛen ne pɛ nu kɔ Bete Hogela ndoroleɛ nu sorɔ dɔ, na ye noa kɔpem Ngyee Po ne sorɔ, wɔ ye boo ne anu, wɔ asue Yɔɔdan ngwaen dɔ. Aseɛ ne, ye ngwaen dɔ ɛwɛen ɛne.

²⁰Asue Yɔɔdan yeɛ ɔte ye wɛen wɔ eyia afiteleɛ ɔ. Benyamin abusua kure ne, kyɛbɔ nu mmusua mmusua ne te ne, ye aseɛ deɛ ɛne, na ye nwo wɛen amukoraa ɛne.

²¹Benyamin abusua kure ne, ye mmusua mmusua ne, bɛ nguro nemɔ ɛhe: Yeriko, Bete Hogela, Emeke Kesise,

²²Bete Araba, Semaraim, Betel,

²³Awim, Para, Ofra,

²⁴Kefare Amoni, Ofini ne Geba: bɛte nguro buru ne nyɔ ne bɛ namue mɔ.

²⁵Gibeon, Rama, Beerote,

²⁶Misepe, Kefira, Mosa,

²⁷Rekem, Yirepeel, Tarala,

²⁸Sela, Haelefe, Yebusi (bɔ ye ole Yerusalem), Gibea ne Kiriate Yearim: bɛte nguro buru ne nna ne bɛ namue mɔ. Benyamin abusua kure ne, kyɛbɔ nu mmusua mmusua ne te ne, ye aseɛ deɛ ɛne.