Read Sehwi Yosua 19 Bible Online

Yosua 19 - Sehwi bible

Yosua 19

¹Serewagualɛ bɔ ɔtɔ so nyɔ ne yele Simeon, Simeon abusua kure ne, kyɛbɔ nu mmusua mmusua ne te ne. B’aseɛ ne, Yuda abusua kure aseɛ deɛ ne wapɛ ye nwo wayia.

² Ye agyapadeɛ bɔ onyane ye ɛhe: Beɛ Hyeba, Hyeba, Molada,

³Hasa Soale, Bala, Esem,

⁴Ɛltolade, Betul, Hɔma,

⁵Siklage, Bete Makabote, Hasa Susa,

⁶Bete Lebaote ne Saruhen: bɛte nguro buru ne nza ne bɛ namue mɔ;

⁷Ayin, Rimon, Eta, Asan: bɛte nguro nna ne bɛ namue mɔ;

⁸yeɛ afei namue amukoraa bɔ bapɛ nguro hemɔ nwo bayia, bɔ ɔkwaadwu Baalate Beɛ, ɔne Rama bɔ ɔwɔ ngwaen dɔ aseɛ ne aso ne. Simeon abusua kure ne, ye aseɛ deɛ ɛne, kyɛbɔ bɛ mmusua nemɔ te ne.

⁹Yuda abusua kure aseɛ ne bie yeɛ bɛpɛ bɛmane Simeon abusua kure ne ɔ, ofikyɛ Yuda abusua kure aseɛ ne, né ye piri bo bɛ so. Yiti b’aseɛ ne bie yeɛ bɛfa bɛmane Simeon abusua kure ne maa ɔyɛle ye agyapadeɛ ɔ.

¹⁰Serewagualɛ bɔ ɔtɔ so nza ne yele Sebulɔn abusua kure ne, kyɛbɔ bɛ mmusua mmusua nemɔ te ne. B’aseɛ ne, ye wɛen ne trɛ kodwu Saride.

¹¹Bɛ wɛen ne fo kɔ eyia atɔleɛ bue nu dɔ ɔkɔ Marala, na ɔkɔpem Dabesete. Afei ɔkɔpem bɔnza bɔ ɔwɔ Yokeneam eyia atɔleɛ ne.

¹²Ofi Saride a, ɔkondo fa eyia afiteleɛ bue nu dɔ kɔ Kiselote Tabɔ ɛwɛen so. Ɔtoa so kɔ Daberate, na ɔfo kɔ Yafia.

¹³Ofi berɛ a, ɔfa eyia afiteleɛ dɔ kɔ Gate Hefa, ɔkɔ Ete Kasin, na Rimon bue nu dɔ wora ɔkondo kɔ Nea.

¹⁴Ye sorɔ dɔ ne, ɛwɛen ne kondo kɔ Hanaton, na ye noa kogua Yifta Ɛl bɔnza ne anu;

¹⁵yeɛ Katate, Nahalale, Simron, Yidala ne Betlehem boka so: bɛte nguro buru ne nyɔ ne bɛ namue mɔ.

¹⁶Sebulɔn abusua kure ne, kyɛbɔ nu mmusua mmusua ne te ne, ye aseɛ deɛ ɛne: sɔ nguro nemɔ ne bɛ namue mɔ.

¹⁷Serewagualɛ bɔ ɔtɔ so nna ne yele Yisaka. Yisaka abusua kure ne, kyɛbɔ ye mmusua mmusua nemɔ te ne.

¹⁸Sɔ nguro hemɔ wɔ b’aseɛ ne aso: Yesreel, Kyesulote, Sunem,

¹⁹Hafaraim, Sihon, Anaharate,

²⁰Rabite, Kision, Ebese,

²¹Remete, Ɛn Ganim, Ɛn Hada ne Bete Pasese.

²²Ɛwɛen ne fa Tabɔ bokaa ne, Sahasuma, Bete Semese, na ye noa kɔpem asue Yɔɔdan: bɛte nguro buru ne nzia ne bɛ namue mɔ.

²³Yisaka abusua kure ne, kyɛbɔ nu mmusua mmusua ne te ne, ye aseɛ deɛ ɛne: nguro nemɔ ne bɛ namue mɔ.

²⁴Serewagualɛ bɔ ɔtɔ so nnu ne yele Asɛ abusua kure ne, kyɛbɔ nu mmusua mmusua ne te ne.

²⁵Bɛ wɛen ne nate Hɛlkate, Hali, Beten, Akisafe,

²⁶Alamɛlɛke, Amade ne Misal; na ye noa kɔpem Kamɛl ne Sihɔ Libinate wɔ eyia atɔleɛ.

²⁷Afei ɔkondo kɔ eyia afiteleɛ kɔfa Bete Dagɔn, ɔkɔpem Sebulɔn ne Yifta Ɛl bɔnza ne wɔ Bete Emeke ne Neyiɛl sorɔ dɔ, na ɔtoa so fa ye sorɔ dɔ kɔ Kabul,

²⁸Ebron, Rehobo, Hamon ne Kana alaa kodwu Sidon Piri.

²⁹Ɛwɛen ne nate Rama alaa kodwu kuro Tiro bɔ bato ye nwo fasue ne. Afei ɔkondo kɔ Hosa, na ye noa kɔpem ɛpo ne. Nguro hemɔ boka so: Mahalabo, Akisibo,

³⁰Yuma, Afeke ne Rehobo: bɛte nguro aburanyɔ ne nyɔ ne bɛ namue mɔ.

³¹Asɛ abusua kure ne, kyɛbɔ nu mmusua mmusua ne te ne, ye aseɛ deɛ ɛne: sɔ nguro nemɔ ne bɛ namue mɔ.

³²Serewagualɛ bɔ ɔtɔ so nzia ne yele Nafetali. Nafetali abusua kure ne, kyɛbɔ nu mmusua mmusua ne te ne.

³³Bɛ wɛen ne hyɛ ye bo fi Helefe, okodwu Saananim eluii ne, na ɔpɛ nu kɔ Adami Nekebo ne Yabeneel alaa kodwu Lakum, na ye noa kɔpem asue Yɔɔdan.

³⁴Afei ɛwɛen ne kondo kɔfa eyia atɔleɛ ɔkɔ Asenɔte Tabɔ, na ɔtoa so kɔ Hukoke. Ɔkɔpem Sebulɔn wɔ ngwaen dɔ, Asɛ wɔ eyia atɔleɛ, yeɛ Yuda wɔ asue Yɔɔdan eyia afiteleɛ.

³⁵Nguro mɔ bɔ bato bɛ nwo fasue ne ɛhe: Sidim, Sɛre, Hamate, Rakate, Kinerete,

³⁶Adama, Rama, Hasɔ,

³⁷Kedese, Yedrei, Ɛn Hasɔ,

³⁸Yiron, Migidal Ɛl, Horem, Bete Anate ne Bete Semese: bɛte nguro buru ne ngona ne bɛ namue mɔ.

³⁹Nafetali abusua kure ne, kyɛbɔ nu mmusua mmusua ne te ne, ye aseɛ deɛ ɛne: nguro nemɔ ne bɛ namue mɔ.

⁴⁰Serewagualɛ bɔ ɔtɔ so nzoo ne yele Dan abusua kure ne, kyɛbɔ nu mmusua mmusua ne te ne.

⁴¹Sɔ nguro hemɔ wɔ b’aseɛ ne aso: Sora, Esetao, Yiri Semese,

⁴²Saalabin, Ayalɔn, Yitela,

⁴³Elon, Timina, Ekron,

⁴⁴Ɛlteke, Gibeton, Baalate,

⁴⁵Yehude, Bene Berake, Gate Rimon,

⁴⁶Meyakon ne Rakon, yeɛ aseɛ bɔ ɔla Yopa ndendeneɛ so ne.

⁴⁷ Nziɛ ye, Danfoɛ aseɛ ne fili bɛ sa, yiti bɛfale ngondii bɛɛtetale kuro bɔ bɛfrɛ ye Lesem. Belili so ngonim, na bɛfale ngrandɛ behuhuni berɛ ama. Bɛfale kuro ne, bɛtenane berɛ, bɛsesane kuro ne dumaa, na bɛfale bɛ nana Dan dumaa bɛtole so.

⁴⁸Dan abusua kure ne, kyɛbɔ nu mmusua mmusua ne te ne, ye aseɛ deɛ ɛne: sɔ nguro nemɔ ne bɛ namue mɔ.

⁴⁹Mmerɛ bɔ Yisraelfoɛ hyɛle aseɛ ne anu beyiele maa ɔyɛle b’agyapadeɛ nen, bɛmane Nun awa Yosua aseɛ ne bie maa ɔyɛle ye deɛ.

⁵⁰ Na kyɛbɔ AWURADE hyɛle bɛ nen, kuro bɔ Yosua hane kyɛ okuro ne ala yeɛ bɛfa bɛmane ye ɔ. Kuro ne ole Timinate Sera bɔ ɔwɔ Efraim mmokaa aseɛ ne aso ne; na Yosua sá kyekyele kuro ne tenane nu.

⁵¹Sɔ aseɛ nemɔ yeɛ ɔsɔfo Eleasa, Nun awa Yosua ɔne mbanyi bɔ bɛlela Yisrael mmusua kure nemɔ noa ne beguale serewa wɔ Silo bɛhyɛle ɔ. Bɛhyɛle ye wɔ AWURADE nyunu, wɔ ɛtena sua atenaleɛ anoa nu berɛ. Yiti bɛhyɛle aseɛ ne anu beyiele.