Read Sehwi Yosua 2 Bible Online

Yosua 2 - Sehwi bible

Yosua 2

¹ Afei Nun awa Yosua somane maentetɛlɛfoɛ nyɔ kudɛɛ fili Sitim, na osele bɛ kyɛ, “Ɛmɔhɔ bɛɛsra aseɛ ne besie, nganga Yeriko.” Yiti besili nu bɛhɔle, na bɛɛlale braa gyanderaniɛ bie bɔ oli Rahabo awuro.

²Na ebie ɔɔbɔle Yeriko hene amaneɛ kyɛ, “Yisrael mmienzua biemɔ bawa wa ɛnɛ kɔngɔen ye kyɛ bɛbaasra y’aseɛ ye besie.”

³Na Yeriko hene somane maa beesele Rahabo kyɛ, “Mmienzua bɔ bawa wɔ berɛ, bɔ bɛwɔ w’awuro berɛ ne, ye bɛ fite bra, ofikyɛ aseɛ ye amukoraa tetɛlɛ ti yeɛ bawa ɔ.”

⁴Nakoso né braa ne afa mmienzua nyɔ ne wafea. Na obuale kyɛ, “Ɔte amba, mmienzua biemɔ wale me wa, nakoso menze nekaa bɔ befi bɛwale ɔ.

⁵Na aleɛ sane bɔ yeɛ ɛwa ama bɛbaato kuro wa pambim nu nen, mmenia nemɔ fite hɔle. Nekaa bɔ mmenia nemɔ hɔle de, menze. Yiti ɛ́mɔhã bɛ nwo bɛpo bɛ so, na ɛmɔkɔto bɛ.”

⁶Né wamaa baafea sua ne abuu ne aso, na né wafa atendirehuo bɔ waboaboa ye noa wɔ abuu ne aso ne wakata bɛ so.

⁷Yiti Yeriko hene bɔfoɛ nemɔ pole bɛ so wɔ asue Yɔɔdan atee ne aso alaa beedwuli apɛleɛ nemɔ. Na Yeriko hene bɔfoɛ nemɔ hɔle pɛ, yeɛ kuro berɛ ama tole pambim ne anu ɔ.

⁸Anzana mmenia nyɔ ne bɛbaala ne, Rahabo hɔle bɛ nwo berɛ wɔ abuu ne aso

⁹oosele bɛ kyɛ, “Mese kyɛ AWURADE afa aseɛ ye wama ɛmɔ; ɛmɔ nwo suronyi atɔ yɛ so, na ɔnate ɛmɔ ti ahunundetelɛ atɔ maen he anu ama mukoraati so.

¹⁰ Ofikyɛ, yate kyɛbɔ AWURADE mane Ɛpo Kɔkorɛ nu nzue wewele wɔ ɛmɔ nyunu, wɔ mmerɛ bɔ né ɛmɔfi Misraim bɛ́ba ne, ɔne nikyee bɔ ɛmɔfa bɛyɔle Amorifoɛ ahemvo nyɔ nemɔ: Sihon ne Ogo, bɔ bɛwɔ asue Yɔɔdan si dɔ ne, kyɛbɔ ɛmɔhuhuni bɛ bɔkɔɔ ne.

¹¹Yɛtele sɔ dwirɛ ne pɛ yeɛ ahunundetelɛ tɔle yɛ so ɔ, na ɔnate ɛmɔ ti yɛ mukoraati y’aba nu buli; ofikyɛ AWURADE ɛmɔ Nyameɛ ne, ye ole Nyameɛ wɔ nyameɛso anwuro anwuro ne aseɛ ye aso amba.

¹²Ɔnate kyɛ mayɛ ɛmɔ paa ne ati, ɛ́mɔta AWURADE ndaen kekesaala ye, kyɛ ɛmɔ koso ɛmɔkɔyɛ me baba awuro ama paa. Ɛ́mɔhyire me nikyee bɔ ɔkɔmaa ngole ɛmɔ ngoli,

¹³kyɛ ɛmɔngohu me baba ne me maame, nniɛma mmienzua ne mmrasua, ɔne bɛ nwo ama nu biala, na mmom ɛmɔkɔmaa yɛkonya yɛ ti yɛkodidi nu.”

¹⁴Na mmienzua nyɔ ne buale Rahabo kyɛ, “Sɛ yɛku ɛmɔ a, yɛ wora Nyameɛ ohu yɛ bie! Sɛ amma yɛ nwo dwirɛ amvite a, ye de AWURADE fa aseɛ ne ma yɛ a, yɛkoli nahorɛ yɛkɔma wɔ, na yɛkɔyɛ wɔ paa.”

¹⁵Afei Rahabo fale nyamaa dwurale bɛ fale mboma nu, ofikyɛ né ye sua ne wura kuro berɛ fasue ne anu, yiti fasue ne anu yeɛ né ɔte ɔ.

¹⁶Na osele bɛ kyɛ, “Ɛmɔhɔ mmokaa nemɔ anu dɔ, kyɛbɔ ɔkɔyɛ ná mmenia bɔ bɛpena ɛmɔ ne bengonwu ɛmɔ ɔ. Ɛmɔɔfea dɔ ɛlɛsa, kɔpem kyɛ mmenia bɔ bɛpena ɛmɔ ne kosa kɔhɔ ɔ. Na ye si ye ɛmɔkɔhora bɛkɔtoa ɛmɔ atee ne aso”

¹⁷Na mmienzua nyɔ ne sele ye kyɛ, “Ndaen he bɔ amaa yata ye, sɛ anni edwirɛ bɔ yɛkã ye aso de a, ye de yɛndo:

¹⁸Sɛ yɛbadwu aseɛ ye aso a, sana ɛfa nyamaa kɔkorɛ he sinze mboma bɔ edwurale yɛ fale nu ne anu, ná ɛboaboa wɔ baba, wɔ maame, eliɛma mɔ ne w’abusuafoɛ mukoraati noa wɔ w’awuro wa.

¹⁹Na sɛ ɛmɔ nu bie fi w’awuro wa fite kɔ dwaaso de a, ye de ye bɔbɔ deinn ye wue kɔbɔ ye ti so, na yɛnni ye wue nwo fɔ. Nakoso bɛ bɔ bɛkɔɔboka wɔ so wɔ awuro wa ne de, sɛ ebie fa ye sa ka bɛ nu biala a, ye de ye wue kɔbɔ yɛ ti so.

²⁰Nakoso sɛ ɛma yɛ nwo dwirɛ fite de a, ye de yɛndo ndaen bɔ amaa yata ne.”

²¹Na Rahabo buale kyɛ, “Edwirɛ bɔ ɛmɔaha ne, ɔ́yɛ sɔ ala.” Ɔmane bɛ ate, na besili nu bɛhɔle. Afei ɔfale nyamaa kɔkorɛ ne sinzele mboma ne anu.

²²Yisraelfoɛ nyɔ ne sili nu hɔle mmokaa ne anu dɔ, na belili berɛ ɛlɛsa, kɔpem kyɛ mmenia nemɔ sá hɔle ɔ. Né mmenia nemɔ apena bɛ dee wɔ atee ne aso, nakoso bannwu bɛ.

²³Afei Yisraelfoɛ nyɔ ne sá torotorole mmokaa aseɛ ne bedwuli ase. Bɛpɛle asue ne, na bɛwale Nun awa Yosua berɛ bɛɛfale b’amaneɛ mukoraati bɛbɔle ye.

²⁴Na besele Yosua kyɛ, “Amba, AWURADE afa aseɛ ne amukoraa wawura yɛ sa. Ɔnate yɛ ti ahunundetelɛ atɔ aseɛ ne aso ama mukoraati so dada.”