Read Sehwi Yosua 20 Bible Online

Yosua 20 - Sehwi bible

Yosua 20

¹ Afei AWURADE sele Yosua kyɛ,

²“Ka kyire Yisraelfoɛ kyɛ, ‘Mmenia nwo adwaabɔlɛ nguro bɔ mvale Mose so ngane ye nwo dwirɛ ngyirele ɛmɔ ne, ɛ́mɔye bésie berɛ,

³amaa sɛ ebie ɔmmoapa anaa ye sa fõ ná oku sona a, wanwati wahɔ berɛ. Na berɛ kɔyɛ afealeɛ kɔma ɛmɔ kofi wereɛtɔlɛniɛ ne ye sa nu.

⁴Na sona bɔ wali awue ne, ɔsɛ kyɛ ɔnwati kɔ sɔ nguro nemɔ ko aso, ná okogyina kuro berɛ pambim ne anyunu, ná okyirekyire ye dwirɛ ne anu kyire kuro berɛ mbanyi mɔ. Na ɛhe asi ye, odi kyɛ bɛfa ye bɛkɔ kuro ne anu bɛkɔɔma ye nekaa maa ɔne bɛ tena berɛ.

⁵Sɛ wereɛtɔlɛniɛ ne ɔ́po sona bɔ wali awue ne aso a, ɔnzɛ kyɛ bɛye bɔ wali awue ne bɛma, ofikyɛ wanhyɛ da yeɛ ohuni obiɛngo ne ɔ. Afei koso, né edwirɛ biala nne b’afia daa.

⁶Odi kyɛ sona bɔ wali awue ne tena kuro ne anu kɔpem kyɛ bekoli ye dwirɛ badwa nu bekobua ye be ɔ. Bebua ye be a, ɔkɔtena berɛ toonn kɔpem kyɛ sɔ mmerɛ ne anu ɔsɔfo panyi paa ne kowu ɔ. Na ɛhe asi ye, ɔkɔhora kosa kɔhɔ ye awuro, wɔ kuro bɔ ɔnwatili fili so ne aso.’ ”

⁷Yiti bɛyele nguro hemɔ besiele berɛ: Kedese bɔ ɔwɔ Galilea, bɔ ɔwɔ Nafetali mmokaa aseɛ so, Sɛkem bɔ ɔwɔ Efraim mmokaa aseɛ so, ɔne Kiriate Aba (bɔ ye ole Hebron) bɔ ɔwɔ Yuda mmokaa aseɛ so ne.

⁸Na asue Yɔɔdan si, wɔ Yeriko eyia afiteleɛ dɔ wora, bɛyele nguro hemɔ besiele berɛ: Besɛre bɔ ɔwɔ ɛserɛ so bokaa frɛtɛɛ ne aso, bɔ ɔwɔ Ruben abusua kure aseɛ so; Ramote bɔ ɔwɔ Gileade, bɔ ɔwɔ Gade abusua kure aseɛ so; yeɛ Golan bɔ ɔwɔ Basan, bɔ ɔwɔ Manase abusua kure aseɛ so ne.

⁹Sɔ nguro nemɔ yeɛ betu besiele berɛ bɛmane Yisraelfoɛ amukoraa, ɔne ɛwɔfoɛ mɔ bɔ baatena Yisraelfoɛ nu ɔ, amaa sɛ ebie ɔmmoapa ná oku obiɛngo a wanwati wahɔ berɛ. Na kɔpem mmerɛ bɔ bekoli ye dwirɛ badwa nu ne, wereɛtɔlɛniɛ ne ngonya atee ngohũ ye.