Read Sehwi Yosua 22 Bible Online

Yosua 22 - Sehwi bible

Yosua 22

¹ Afei Yosua tole ye sa frɛle Rubenfoɛ, Gadefoɛ ne Manase abusua kure ne bue maa beyiale,

² na osele bɛ kyɛ, “Bɔ AWURADE somvoɛ Mose hyɛle ɛmɔ kyɛ ɛmɔli so ne, ɛmɔali ye mukoraa so, yeɛ ɛmɔayɛ sotie bama me wɔ bɔ mahyɛ ɛmɔ kyɛ ɛ́mɔyɔ ne amukoraa nu.

³Mmerɛ ye amukoraa, toonn bɔ ɔbaadwu ɛnɛ ye, ɛmɔanyakyi ɛmɔ aliɛma mɔ nu, na mmom ɛmɔali AWURADE ɛmɔ Nyameɛ ahyɛdeɛ so nahorɛ nu.

⁴Afei AWURADE ɛmɔ Nyameɛ wabɔ ɛmɔ aliɛma mɔ atenaseɛ asomdwee nu, kyɛbɔ ɔhyɛle bɛ bɔ ne. Yiti ɛ́mɔsa ɛmɔ si bɛhɔ ɛmɔ kuro, wɔ aseɛ bɔ waayɛ ɛmɔ deɛ ne aso, aseɛ bɔ AWURADE somvoɛ Mose fa mane ɛmɔ wɔ asue Yɔɔdan si dɔ ne.

⁵Ɛ́mɔnea yé ná ɛ́mɔli mmeraa dwirɛ ne mmeraa bɔ AWURADE somvoɛ Mose hyehyɛ mane ɛmɔ ne aso: kyɛ ɛmɔhuro AWURADE ɛmɔ Nyameɛ dwirɛ, kyɛ ɛ́mɔli ye dwirɛ amukoraa so, kyɛ ɛ́mɔli ye mmeraa dwirɛ so, kyɛ ɛ́mɔfa bɛ nwo bɛbɔ ye, ná ɛ́mɔfa ɛmɔ ahone mukoraa ne ɛmɔ kra mukoraa bɛso ye.”

⁶Afei Yosua yirale bɛ, ɔyakyili bɛ ate, na besili nu bɛhɔle b’ɛtena sua nemɔ anu.

⁷Manase abusua kure ne bue ko ne, né Mose ali moa wafa b’aseɛ deɛ wama bɛ wɔ Basan. Na sɔ abusua ne bue ko bɔ waha ne wora, Yosua fale aseɛ bɔ ɔwɔ b’eliɛma mɔ Yisraelfoɛ deɛ nu mane bɛ, wɔ asue Yɔɔdan eyia atɔleɛ. Mmerɛ bɔ Yosua baayakyi bɛ ate maa bɛkɔ nen, oyirale bɛ,

⁸na osele bɛ kyɛ, “Anwonyadeɛ pee, nyɛmmoa pee, ɛdwetɛ, esikaa kɔkorɛ, kɔɔbere, mmuralɛ ne ndena pee paa yeɛ ɛmɔsa bɛfa bɛkɔ ɛmɔ tena sua nemɔ anu ɔ; na koɛ nu nzesadeɛ bɔ ɛmɔanya bafi ɛmɔ pɔfoɛ mɔ berɛ ne, odi kyɛ ɛmɔ ne ɛmɔ aliɛma mɔ bɛkyɛ.”

⁹Yiti Rubenfoɛ, Gadefoɛ ne Manase abusua kure ne bue yakyili Yisraelfoɛ ngaa ne wɔ Silo, bɔ ɔwɔ Kanaan aseɛ so. Na besili nu kyɛ besa bɛkɔ Gileade bɔ ɔte bɛ bɔbɔ b’aseɛ ne aso; aseɛ bɔ begyinane AWURADE ahyɛdeɛ bɔ ɔnate Mose so bɛfale ne.

¹⁰Mmerɛ bɔ Rubenfoɛ, Gadefoɛ ne Manase abusua kure ne bue beedwuli asue Yɔɔdan porɛ ne anu berɛ wɔ Kanaan aseɛ so nen, besili afɔleɛ bokyea kandinga bie wɔ asue Yɔɔdan noa.

¹¹Yisraelfoɛ ngaa ne tele kyɛ Rubenfoɛ, Gadefoɛ ne Manase abusua kure ne bue basi afɔleɛ bokyea wɔ Kanaan aseɛ ɛwɛen so, wɔ asue Yɔɔdan porɛ ne anu berɛ, wɔ Yisraelfoɛ ngaa ne b’aseɛ so.

¹²Na mmerɛ bɔ Yisraelfoɛ ngaa ne tele sɔ dwirɛ nen, Yisrael maen ye amukoraa boaboale bɛ noa wɔ Silo, kyɛ bɛkwaafa koɛ bɛtoa bɛ.

¹³Yiti Yisraelfoɛ ngaa ne somane ɔsɔfo Eleasa awa Finehase maa ɔhɔle Rubenfoɛ, Gadefoɛ ne Manase abusua kure ne bue berɛ wɔ Gileade aseɛ so.

¹⁴Mbanyi atitirefoɛ buru bokale ye so yeɛ bɛhɔle ɔ. Yisrael abusua kure biala nu sona ko, na bɛ nu biala la abusua noa wɔ Yisrael mmusua mmusua ne anu.

¹⁵Ɛbɔfoɛ nemɔ wale Rubenfoɛ, Gadefoɛ ne Manase abusua kure ne bue berɛ wɔ Gileade aseɛ so, na bɛbɔle b’amaneɛ behyirele bɛ kyɛ,

¹⁶ “AWURADE mmenia ne amukoraa nwa nyoo: Ɔwale ye sɛ, bɔ ɛmɔayɔ musue nikyee he batia Yisrael Nyameɛ, bɔ ɛnɛ ye de ɛmɔayakyi AWURADE si lilɛ ɔ; bɔ ɛnɛ ye de ɛmɔasi ɛmɔ bɔbɔ b’afɔleɛ bokyea bafa bayɛ AWURADE nwo lɔen ɔ?

¹⁷ Bɔne bɔ yɛyɔle ye wɔ Peɔ, bɔ ɔbaadwu ɛnɛ ye po yɛnnya yɛppetene yɛ nwo yɛffili ye nwo ne, bɔne bɔ ɔfale amaneɛ pirikua tole AWURADE mmenia so ne, aso ɔte bɔne ba?

¹⁸Afei de, ɛmɔayakyi AWURADE si lilɛ! Sɛ ɛmɔtwi bɛfa AWURADE dwirɛ so ɛnɛ a, ɛhema ɔkɔfɛ Yisrael mmenia mukoraa so yaa.

¹⁹Nakoso, sɛ ɛmɔnea ná efiɛ aha ɛmɔ aseɛ ne a, nzaade ɛ́mɔpɛ asue ne bɛbra AWURADE aseɛ ne aso, nekaa bɔ AWURADE nyianu sua wɔ ne, ná ɛmɔɔfa yɛ aseɛ ne bie. Nnɛma ɛmɔtwi bɛfa AWURADE dwirɛ so, anaa yɛ dwirɛ so, bɔ ɔkɔmaa ɛmɔkosi afɔleɛ bokyea bɛboka AWURADE yɛ Nyameɛ afɔleɛ bokyea ne aso ɔ.

²⁰ Nningyein bɔ AWURADE tu siele berɛ kyɛ yɛsɛkye ye ne, aso Sera awa Akan wando ye nwo mmeraa ne? Aso ɔnate sɔ ati Nyameɛ amvɛ Yisraelfoɛ amukoraati so yaa? Ye amumuyɛɛ bɔ ɔyɔle ne, ye ngome yeɛ owuli ɔ?”

²¹Afei Rubenfoɛ, Gadefoɛ ne Manase abusua kure ne bue buale mbanyi bɔ bɛlela Yisrael mmusua nemɔ noa kyɛ,

²²“AWURADE, ɔte Ɛdangama Nyameɛ! AWURADE, ɔte Ɛdangama Nyameɛ! Ye yeɛ odi yɛ adanzeɛ ɔ, na yɛpena kyɛ Yisrael koso te ye bo. Sɛ yayɛ AWURADE nwo lɔen, anaakyɛ yanni nahorɛ yamma ye a, ye de ɛmɔhu yɛ ɛnɛ.

²³Sɛ yasi afɔleɛ bokyea kyɛ yɛfa yɛtwe yɛ nwo yɛfi AWURADE nwo, anaa sɛ yɛyɔle sɔ kyɛ yɛbɔ naen yeralɛ afɔleɛ wɔ so, anaa aburoo afɔleɛ wɔ so, anaa asomdwee afɔleɛ wɔ so a, ye de ma AWURADE bɔbɔ ɔtɔ yɛ so wereɛ.

²⁴Nna sɔ ɔ! Ɛhe ati yeɛ yɛsili ɔ: Né yɛsuro kyɛ kyẽa bie ɛmɔ mma kɔha kohyire yɛ mma kyɛ, ‘Nzikyɛ ngitahoɛ koraa yeɛ ɔla ɛmɔ ne AWURADE Yisrael Nyameɛ b’afia ɔ?

²⁵Ofikyɛ ɛmɔ Rubenfoɛ ne Gadefoɛ de, AWURADE afa asue Yɔɔdan wato ɛwɛen wɔ yɛ ne ɛmɔ afia; na ɛmɔlle kyɛfa biala wɔ AWURADE nu.’ Na ɔba ye sɔ a, ɛmɔ mma mɔ kɔma yɛ mma kɔyakyi AWURADE sɔnenɛ.

²⁶Ye sɔ ne ati, yeɛ ɔmaa yɛhane kyɛ, ‘Ɛ́mɔma yɛsi afɔleɛ bokyea, bɔ yɛngɔbɔ naen yeralɛ afɔleɛ anaa afɔleɛ wɔ so ɔ.

²⁷Nakoso ɔkɔyɛ yɛ ne ɛmɔ afia adanzeɛ, ɔne yɛ bosofoɛ bɔ nziɛ ye bɛkɔwa ɔ adanzeɛ, kyɛ yɛfa yɛ naen yeralɛ afɔleɛ ne y’afɔleɛ ne y’asomdwee afɔleɛ yɛso AWURADE wɔ ye nyunu. Na ɔnate so kyẽa bie ɛmɔ mma mɔ ngɔhã ngohyire yɛ mma mɔ kyɛ, “Ɛmɔlle kyɛfa biala wɔ AWURADE nu.” ’

²⁸Na yɛsusuli kyɛ, sɛ kyẽa bie bɛka sɔ dwirɛ ne bekyire yɛ anaa yɛ bosofoɛ a, yɛkɔha kyɛ, ‘AWURADE afɔleɛ bokyea ne, ɛ́mɔnea ye sɛso bɔ yɛ nana mɔ sili ɔ; bɔ banzi kyɛ bɛbɔ naen yeralɛ afɔleɛ anaa afɔleɛ wɔ so ɔ, na mmom kyɛ ɔkɔyɛ yɛ ne ɛmɔ afia adanzeɛ ɔ.’

²⁹Yɛddwenene ye nwo le kyɛ yɛkɔyɛ AWURADE nwo lɔen, anaakyɛ ɛnɛ ye yɛkɔyakyi AWURADE si lilɛ ɔ. Yɛngosi afɔleɛ bokyea ngɔbɔ naen yeralɛ afɔleɛ, aburoo afɔleɛ, anaa afɔleɛ wɔ so, bɔ ɔngɔma yɛngɔbɔ afɔleɛ ne wɔ AWURADE yɛ Nyameɛ afɔleɛ bokyea bɔ ogyi ye nyianu sua ne nyunu ɔ!”

³⁰Ɔsɔfo Finehase ne Yisrael mbanyi atitire, bɔ bɛlela Yisrael mmusua mɔ noa, bɔ bɛ ne ye hɔle ne, mmerɛ bɔ bɛtele edwirɛ bɔ Rubenfoɛ, Gadefoɛ ne Manasefoɛ hane nen, bɛ kunu dwole bɛ fɔnwoo.

³¹Na ɔsɔfo Eleasa awa Finehase sele Rubenfoɛ, Gadefoɛ ne Manasefoɛ kyɛ, “Ɛnɛ de, yanwu ye kyɛ AWURADE gyi yɛ si, ofikyɛ ɛhe de, nna musue nikye yeɛ ɛmɔayɔ batia AWURADE ɔ; na kekesaala ye de, ɛmɔale Yisraelfoɛ bafi AWURADE tumi asohwenɛ nu.”

³²Afei ɔsɔfo Eleasa awa Finehase ne mbanyi atitirefoɛ nemɔ fili Rubenfoɛ ne Gadefoɛ nwo berɛ wɔ Gileade aseɛ so, na besa bɛhɔle Kanaan aseɛ so bɛɛfale amaneɛ bɛbɔle Yisraelfoɛ ngaa ne.

³³B’amaneɛ ne yɛle Yisraelfoɛ fɛ. Yisraelfoɛ yele Nyameɛ ayɛ, na banyɛ b’adwene ko kyɛ bɛkɔɔfa koɛ bɛkɔtoa Rubenfoɛ ne Gadefoɛ, bɔ ɔkɔmaa bekohũhũ b’aseɛ ne aso ama ná basɛkye so nningyein ɔ.

³⁴Na Rubenfoɛ ne Gadefoɛ bɛtole afɔleɛ bokyea ne dumaa kyɛ, Adanzeɛ. Ofikyɛ bɛhane kyɛ, “Ɔte yɛ ne b’afia adanzeɛ kyɛ AWURADE ole Nyameɛ.”