Read Sehwi Yosua 24 Bible Online

Yosua 24 - Sehwi bible

Yosua 24

¹Afei Yosua mane Yisrael mmusua kure ne amukoraati yiale wɔ Sɛkem. Ɔfrɛle Yisrael mbanyi, mmusua mbanyi, ndɛenbualɛfoɛ ne atitirefoɛ, na beegyinane Nyameɛ nyunu.

² Na Yosua sele maen ne amukoraati kyɛ, “AWURADE Yisrael Nyameɛ nwa nyoo, ‘Daa tete ne, ɛmɔ nana mɔ Tera ne ye mma Abraham ne Nahɔ bɛtenane asue Yufreti si, na bɛsole nyameɛ foforɛ biemɔ.

³ Yeɛ nyele ɛmɔ nana Abraham mvili asue ne asi dɔ, mvale ye mvale Kanaan aseɛ ne aso amukoraa, na mmane ye bosofoɛ yɛle pee. Mmaa ɔwole Yisake.

⁴ Na Yisake koso mmaa ɔwole Yakob ne Yisɔ. Mvale Sɛre mmokaa aseɛ mane Yisɔ kyɛ ɔfa tena so, nakoso Yakob ne ye mma mɔ de, bɛhɔle Misraim.

⁵ Afei nzomane Mose ne Aarɔn, na nikyee bɔ nyɔle ye wɔ Misraim ne, ɔmane ɛhawo pirikua wale berɛ. Na ɛhe asi ne, nyele ɛmɔ mvili berɛ.

⁶ Na nyele ɛmɔ nana mɔ mvili Misraim nen, ɛmɔɔdwuli ɛpo ne noa. Na Misraimfoɛ fale teaseɛnam mɔ ne pɔngɔhanɛfoɛ bɛpole ɛmɔ nana mɔ so toonn beedwuli Ɛpo Kɔkorɛ ne noa.

⁷Yisraelfoɛ sũ frɛle AWURADE, na ɔfale awosii kabii tole ɛmɔ ne Misraimfoɛ b’afia. Ɔmane ɛpo oobu fale bɛ so katale bɛ so; na ɛmɔ nye nwuni nikyee bɔ mva nyɔle Misraim ɔ. Na ɛhe asi ne, ɛmɔtenane ɛserɛ so bɛhyɛle.

⁸ Afei Amorifoɛ bɔ né bɛte Yɔɔdan si dɔ ne, mvale ɛmɔ male b’aseɛ so. Bɛ ne ɛmɔ hone, na mvale bɛ nwurale ɛmɔ sa. Ɛmɔfale b’aseɛ ne, na ngukuni bɛ mvili ɛmɔ nyunu.

⁹ Na Moabo hene Balake bɔ ɔse ole Sipore ne, ɔfale koɛ ɔɔtetale Yisrael. Ɔtole ye sa frɛle Beɔ awa Balaam kyɛ ɔɔnoma ɛmɔ,

¹⁰nakoso mandie Balaam dwirɛ. Yiti oyirale ɛmɔ; na nnele ɛmɔ mvili ye sa nu.

¹¹ Na ɛmɔpɛle asue Yɔɔdan bɛwale Yeriko nen, Yerikofoɛ ne ɛmɔ hone. Sɔ ala yeɛ Amorifoɛ, Perisifoɛ, Kanaanfoɛ, Hitifoɛ, Gɛgasifoɛ, Hiwifoɛ ne Yebusifoɛ bɛ ne ɛmɔ hone ɔ. Na mvale bɛ nwurale ɛmɔ sa.

¹² Nzomane kotokuradu mɔ maa belili ɛmɔ nyunu, na bɛfoane Amorifoɛ ahemvo nyɔ nemɔ befili ɛmɔ nyunu. Nna wɔ ngrandɛ anaa w’agyaen yeɛ ɛfa yɔle sɔ ɔ.

¹³ Aseɛ bɔ ɛmɔamvɛ ye nwo, ɔne nguro bɔ nna ɛmɔ yeɛ ɛmɔkyekyele ɔ yeɛ mva mane ɛmɔ ɔ, na ɛmɔtenane so. Bobe boo ne olive boo bɔ nna ɛmɔ yeɛ ɛmɔyɔle ɔ yeɛ ɛmɔdi so mmaa ɔ.’

¹⁴“Yiti ɛ́mɔsuro AWURADE ná ɛ́mɔso ye ferengyemm ne nahorɛ nu. Na mmosoen bɔ ɛmɔ nana mɔ sole bɛ wɔ asue Yufreti asi dɔ, ɔne Misraim nen, ɛ́mɔgyi bégua ná ɛ́mɔso AWURADE.

¹⁵ Na sɛ ɛmɔ kunu ndwo kyɛ ɛmɔkɔso AWURADE de a, nzaade ɛnɛ kyẽa ye ɛ́mɔhyire bɔ ɛmɔkɔso ye ɔ: sɛ mmosoen bɔ ɛmɔ nana mɔ sole bɛ wɔ asue ne asi dɔ ne ahɔ oo, anaakyɛ Amorifoɛ bɔ ɛmɔte b’aseɛ so ye bɛ mmosoen nemɔ ahɔ oo. Nakoso me ne m’awuro ama de, yɛ de yɛkɔso AWURADE.”

¹⁶Na Yisraelfoɛ buale kyɛ, “Ɔngɔwa ye sɔ le kyɛ yɛkɔyakyi AWURADE berɛ yɛkɔɔso nyameɛ foforɛ biemɔ ɔ.

¹⁷Ofikyɛ AWURADE yɛ Nyameɛ yeɛ ɔyele yɛ ne yɛ nana mɔ fili Misraim aseɛ so ngoaasolɛ nu wale ɔ. Na nzɛngyerɛnneɛ mbiri mbiri bɔ yɛnwuni ye ne, ye yeɛ ɔyɔle ɔ. Atee bɔ yɛfale so ne amukoraa, yeɛ maen maen mukoraa bɔ yɛɛfale so ne, ɔbɔle yɛ nwo waen fili nu.

¹⁸Na AWURADE foane maen maen amukoraa, yeɛ Amorifoɛ bɔ né bɛte aseɛ ne aso ne fili yɛ nyunu. Yiti yɛ koso yɛkɔso AWURADE, ofikyɛ ye yeɛ ɔte yɛ Nyameɛ ɔ.”

¹⁹Nakoso Yosua sele maen ne kyɛ, “Ɛmɔngɔhora ngɔso AWURADE, ofikyɛ ɔte Nyameɛ bɔ ɔte krongron ɔ. Ɔte nungunɛ Nyameɛ; na ɔngɔfa ɛmɔ mmeraatolɛ ne ɛmɔ bɔne ngɔhyɛ ɛmɔ.

²⁰Sɛ ɛmɔyakyi AWURADE si lilɛ bɛkɔɔso Amaenmaensofoɛ nyameɛ mɔ a, ye de ɔmva ye nwo kyɛ AWURADE ayɛ ɛmɔ paa ɔ, ɔkɔpɛ ye nwo kɔprapra amaneɛ kogua ɛmɔ so kɔmaa ɛmɔkowuwu.”

²¹Na maen ne buale Yosua kyɛ, “Daabi! AWURADE yeɛ yɛkɔso ye ɔ.”

²²Na afei Yosua sele maen ne kyɛ, “Ɛmɔ bɔbɔ ɛmɔte ɛmɔ nwo adanzefoɛ kyɛ AWURADE yeɛ ɛmɔaneanea nu baye ye kyɛ ɛmɔkɔso ye ɔ.” Na bɛ koso bebuale kyɛ, “Yɛte adanzefoɛ.”

²³ Na osele kyɛ, “Nzaade ɛ́mɔgyi Amaenmaensofoɛ nyameɛ mɔ bɔ ɛmɔle ye ne begua, ná ɛ́mɔfa ɛmɔ nwo bɛ́ma AWURADE Yisrael Nyameɛ.”

²⁴Na maen ne buale Yosua kyɛ, “AWURADE yɛ Nyameɛ yeɛ yɛkɔso ye ɔ, na ye dwirɛ so yeɛ yɛkoli ɔ.”

²⁵Yiti Yosua ne Yisraelfoɛ yɛle apam sɔ kyẽa ne, na ɔmane bɛ ahyɛdeɛ ne nhyehyɛleɛ wɔ Sɛkem.

²⁶Yosua hyerɛle sɔ dwirɛ ne wɔ Nyameɛ mmeraa nwomaa ne anu. Na ɔfale nyɔboɛ kandinga bie penane eluii bakaa bɔ ogyi AWURADE nekaa krongron berɛ ne abo.

²⁷Na Yosua sele maen ne amukoraati kyɛ, “Ɛ́mɔtie, nyɔboɛ he yeɛ ɔte adanzeɛ ɔ, ofikyɛ wate AWURADE dwirɛ amukoraa bɔ waha wahyire yɛ ne. Na sɛ ɛmɔanni nahorɛ bamma ɛmɔ Nyameɛ a, nyɔboɛ ne kɔyɛ adanzeɛ kotia ɛmɔ.”

²⁸Na Yosua mane mmenia ne amukoraa betuli apo besa bɛhɔle b’aseɛ nemɔ aso.

²⁹Na ɛhemɔ asi ne, Nun awa Yosua bɔ ɔte AWURADE somvoɛ ne, owuli. Olili afoɛ ɛyaa ko ne buru.

³⁰ Besiele ye wɔ ye bɔbɔ ye aseɛ so wɔ Timinate Sera, wɔ Efraim mmokaa ne anu dɔ, wɔ Gaase bokaa ne sorɔ dɔ.

³¹ Mmerɛ amukoraa bɔ né Yosua te ase ne, Yisrael sole AWURADE. Na Yosua wue asi ne koso, maen ne anu mbanyi bɔ né bɛtɛ te ase, ná afei benwuni nikyee biala bɔ AWURADE ayɔ ama Yisrael nen, mmerɛ mukoraa bɔ né bɛte ase ne, Yisrael hɔle so sole AWURADE.

³² Yosef mmowue bɔ Yisraelfoɛ sesa fili Misraim wale ne, besiele ye wɔ Sɛkem, wɔ aseɛ bɔ Yakob tɔ fili Sɛkem baba Hamɔ mma nemɔ berɛ ne aso. Ɔtɔle ye sikaa ɛdwetɛ ɛyaa ko. Na aseɛ ne ɔɔyɛle Yosef boso ama agyapadeɛ.

³³Aarɔn awa Eleasa wuli, na besiele ye wɔ ɔwa Finehase kuro Gibea, bɔ bɛfa bɛmane Finehase wɔ Efraim mmokaa ne anu dɔ ne aso.