Read Sehwi Yosua 7 Bible Online

Yosua 7 - Sehwi bible

Yosua 7

¹Nakoso AWURADE mmeraa bɔ ɔfa nningyein bɔ watu wasie berɛ kyɛ bɛsɛkye ye ne anwo ne, Yisraelfoɛ buli so. Akan bɔ ɔse ole Karemi, bɔ ɔse ole Sabidi, bɔ ye koso ɔse ole Sera bɔ ofi Yuda abusua kure nu ne, ɔfale nningyein bɔ AWURADE atu asie berɛ kyɛ bɛsɛkye ye ne bie, yiti AWURADE fɛle Yisraelfoɛ so yaa piri paa.

²Yosua somane mmienzua biemɔ maa befili Yeriko bɛhɔle Aye, bɔ opingye Bete Awen, wɔ Betel eyia afiteleɛ kyɛ, “Ɛ́mɔfo bɛhɔ bɛɛtetɛ aseɛ ne.” Na mmenia ne hɔle bɛɛtetɛle Aye besiele.

³Na besa bɛwale bɛɛbɔle ye amaneɛ kyɛ, “Onhia kyɛ mmenia ne amukoraati bɛkɔfo bɛkɔhɔ dɔ ɔ. Ma mmienzua kɔyɛ apee nyɔ anaa apee nza beetua Aye beli so ngonim. Berɛ ama bɛnzone, yiti nnɛma mmenia ne amukoraa bɛkɔ dɔ bɛkɔko.”

⁴Yiti mmenia kɔyɛ apee nza fo hɔle dɔ, na bangora Ayefoɛ nyunu gyina, bɛnwatili.

⁵Ayefoɛ huhuni bɛ nu mmenia kɔyɛ aburasa ne nzia, bɛfoane bɛ befili kuro berɛ pambim ne asi toonn beedwuli Hyebarim, na behuhuni bɛ wɔ bokaa ne ndoroleɛ nu. Ɛserɛ hane Yisraelfoɛ, na bɛbɔle fuin.

⁶Ɛhe mane Yosua sunzuale ye ndaadeɛ nu, na ɔfale ye nyunu butuli aseɛnwo wɔ AWURADE alaka ne nyunu toonn maa oodwuli nɔsoa. Ɔne Yisrael mbanyi yeɛ bɛyɔle sɔ ɔ, na betuli mvuture beguale bɛ ti so.

⁷Na Yosua sele kyɛ, “O, AWURADE Nyameɛ! Nzu ati koraa yeɛ ɛfale maen he pɛle asue Yɔɔdan ɔ, kyɛ ɛbaafa yɛ wura Amorifoɛ sa maa bekuku yɛ ɔ? Sɛ né yɛse po a, ahaa yɛhale Yɔɔdan si dɔ!

⁸Mesrɛ wɔ ala, AWURADE, afei bɔ Yisrael wanwati wafi ye pɔfoɛ mɔ nyunu ye, nzikyɛ dwirɛ koraa yeɛ nga ɔ?

⁹ Kanaanfoɛ ne aseɛ ye asofoɛ mukoraati bɛkɔte sɔ dwirɛ ye, bɛkɔpɛ yɛ nwo bekoyia, na bɛkɔma yɛ boso konua. Nzikyɛ yeɛ ɛkɔyɔ kɔfa wɔ dumaa bɔ odi mu ne anwo ɔ?

¹⁰Na AWURADE sele Yosua kyɛ, “Dwɔso! Nzu ati yeɛ afa wɔ nyunu abutu ase ye?

¹¹Yisrael ayɔ bɔne. M’apam bɔ nhyɛle bɛ kyɛ beli so ne, babu so. Basesa nningyein bɔ matu masie berɛ kyɛ bɛsɛkye ye ne bie; bawua, bapɛ ngondombo, na bafa baafea bɛ bɔbɔ bɛ nningyein nu.

¹²Ɔnate sɔ ne ati yeɛ Yisraelfoɛ bɛngora bɛ pɔfoɛ mɔ nyunu gyina ɔ; bɛnwati befi bɛ pɔfoɛ mɔ nyunu, ofikyɛ bayɛ mmenia bɔ matu bɛ masie berɛ kyɛ ɔsɛ kyɛ beku bɛ ɔ. Mengogyina ɛmɔ si ko, sana nningyein bɔ matu masie berɛ kyɛ behũ bɛ ná bɛsɛkye bɛ ne, ɛ́mɔye befi ɛmɔ nu.

¹³Dwɔso! Te mmenia nemɔ nwo, ná ka kyɛ, ‘Ɛ́mɔte ɛmɔ nwo bésie bɛ́fa bɛ́nwondɛ ɛhema, ofikyɛ AWURADE Yisrael Nyameɛ ne nwa: O Yisrael, nningyein bɔ matu masie berɛ kyɛ bɛsɛkye ye ne, ebie wɔ wɔ berɛ. Na ɛngɔhora wɔ pɔfoɛ mɔ nyunu gyina, sana ɛmɔye nningyein bɔ matu masie berɛ kyɛ bɛsɛkye ye ne befi ɛmɔ nu.’

¹⁴Yiti ɔsɛ kyɛ ngyerɛmɔ ɛmɔbagyina me nyunu mmusua kure mmusua kure. Na abusua kure bɔ AWURADE kɔye ye ne, nu mmenia kɔwa mmusua mmusua; yeɛ abusua bɔ AWURADE kɔye ye ne, nu mmenia kɔwa awuro ama awuro ama; na awuro ama bɔ AWURADE kɔye ye ne, nu mmenia kɔwa ngoko ngoko.

¹⁵Na sona bɔ ngɔye ye kyɛ nningyein bɔ matu masie berɛ kyɛ bɛsɛkye ye ne bie wɔ ye berɛ nen, ɛ́mɔfa see bɛ́yera ye, ɔne ye nwo ama ne ye nikyee biala, ofikyɛ wabu AWURADE apam ne aso, na wabɔ nyanzoen bra wɔ Yisrael.”

¹⁶Yiti Yosua dwɔsole ngyerɛmɔ tutuutu, ɔmane Yisraelfoɛ wale AWURADE nyunu abusua kure abusua kure, na serewagualɛ ne yele Yuda abusua kure ne.

¹⁷Ɔmane Yuda mmusua mmusua nemɔ pingyele berɛ, na serewagualɛ ne yele Serafoɛ abusua. Ɔmane Serafoɛ abusua ne anu ama pingyele berɛ bɛ sasofoɛ bɛ sasofoɛ, na serewagualɛ ne yele Sabidi sasofoɛ.

¹⁸Ɔmane Sabidi sasofoɛ wale ngoko ngoko, na serewagualɛ ne yele Akan bɔ ɔse ole Karemi, bɔ ɔse ole Sabodi, bɔ ɔse ole Sera bɔ ofi Yuda abusua kure nu ne.

¹⁹Na Yosua sele Akan kyɛ, “Mma, fa animnyam ma AWURADE Yisrael Nyameɛ, ná ka nahorɛ wɔ ye nyunu. Nikyee bɔ ayɔ ne, ka kyire me kekesaala ye. Nnɛfa fea me.”

²⁰Na Akan buale Yosua kyɛ, “Ɔte nahorɛ, me yeɛ mayɔ bɔne matia AWURADE Yisrael Nyameɛ ɔ. Bɔ nyɔle ɛhe:

²¹Nwuni aguasoɛ nyemenenyemene bie bɔ bɛyɔle ye wɔ Sinari, ɛdwetɛ kilo nyɔ, ɔne sikaa kɔkorɛ bɔ nu nonɛ te kilo bue wɔ koɛ nu nzesadeɛ ne anu. Me nye yɛle bɛ nwo koakoa, na nzesale. Mafu mawura ase wɔ me tena sua ne anu, na ɛdwetɛ ne yeɛ ɔwɔ ye bo paa ɔ.”

²²Yiti Yosua somane mmenia, betuli amirika bɛhɔle ɛtena sua ne anu, na amba, né wafa wafea ye tena sua ne anu, bɔ ɛdwetɛ ne wura ye bo paa ɔ.

²³Bɛsesale nningyein ne befili ɛtena sua ne anu, bɛfa bɛbrɛle Yosua ne Yisraelfoɛ amukoraati, na bɛfa beguale AWURADE nyunu.

²⁴Afei Yosua ne Yisraelfoɛ amukoraati bɛfale Sera awa Akan, ɛdwetɛ ne, aguasoɛ ne, sikaa kɔkorɛ ne, Akan mma mmienzua ne mmrasua, ye nandwie mɔ, ye afunum mɔ, ye mmoaen, ye tena sua ne, ɔne ye nwo nningyein amukoraa, na bɛfale bɛ bɛwale Akɔre Bɔnza nu.

²⁵Na Yosua sele kyɛ, “Nzikyɛ amaneɛ yeɛ aahwe abrɛ yɛ ye? AWURADE kɔma amaneɛ kɔto wɔ ɛnɛ kyẽa ye.” Na Yisraelfoɛ amukoraati bɛborole ye nyɔboɛ behuni ye. Bɛfale see bɛyerale bɛ, na bɛsesale nyɔboɛ beguale bɛ so.

²⁶Na bɛboaboale nyɔboɛ kure kandinga beguale ye so, bɔ nyɔboɛ kure ne tɛ wɔ berɛ maa waadwu ɛnɛ ɔ. Na AWURADE mane ye ahone tɔle nzue nu. Yiti bɛfrɛ berɛ Akɔre[3] bɔnza maa waadwu ɛnɛ.