Read Sehwi 2 Tɛsalonika 3 Bible Online

2 Tɛsalonika 3 - Sehwi bible

2 Tɛsalonika 3

¹ Bɔ ɔpɛ ye bo ɔ, aliɛmaa mɔ, ɛ́mɔbɔ mbaeɛ bɛ́ma yɛ, kyɛ Awurade nzɛmba ne onya atee trɛ ndɛndɛ ná onya animnyam, kyɛbɔ wanya ye wɔ ɛmɔ berɛ ne.

² Ɛ́mɔsrɛ bɛ́ma yɛ kyɛ Nyameɛ ole yɛ fi amumuyɛɛfoɛ ne bɔnefoɛ sa nu, ofikyɛ nna mmenia mukoraa yeɛ bele gyidie ɔ.

³ Nakoso Awurade di nahorɛ; ɔkɔma ɛmɔ kogyina pindinn, ná wabɔ ɛmɔ nwo waen wafi bɔnefoɛ ne sa nu.

⁴Na y’adwene si pi wɔ ɛmɔ nwo wɔ Awurade nu, kyɛ edwirɛ bɔ yɛfale ye nwo ahyɛdeɛ yɛmane ɛmɔ ne, ɛmɔdi so, na ɛmɔkɔhɔ so bekoli so.

⁵Yɛsrɛ Awurade kyɛ obukye ɛmɔ adwene nu ma ɛmɔte Nyameɛ ɔdɔ ne Kristo aboterɛ ne bo.

⁶Aliɛmaa mɔ, yɛle y’Awurade Yesu Kristo dumaa yɛhyɛ ɛmɔ kyɛ, aliɛmaa biala bɔ ɔnatenate basabasa ná onni ngyerɛkyerɛ bɔ onya fili yɛ berɛ ne aso ne, ɛmɔhwe ɛmɔ nwo befi ye nwo.

⁷ Na ɛmɔ bɔbɔ ɛmɔse kyɛ ohia kyɛ ɛmɔsuasua yɛ ɔ, ofikyɛ mmerɛ bɔ né yɛwɔ ɛmɔ berɛ ne, yanyɛ foen;

⁸ yeɛ yanni ebiala aleɛ bɔ yandua ye kerɛ ɔ. Na mmom yɛyerele yɛ nwo yɛyɔle adwuma eyia ne kɔngɔen, kyɛbɔ ɔkɔyɛ bɔ yɛngɔyɛ ɛmɔ nu biala so tɔsom ɔ.

⁹Ɛhe ngyire kyɛ yɛlle ye nwo ate kyɛ yɛkobisa ɛmɔ dɔ nikyee biala ɔ, na mmom yɛfale yɛ nwo yɛyɛle mvandoho kyɛ ɛmɔsua yɛ.

¹⁰ Mmerɛ bɔ né yɛwɔ ɛmɔ berɛ nen, yɛmane ɛmɔ ahyɛdeɛ kyɛ, sona biala bɔ onguro kyɛ ɔyɔ adwuma ne, onni kyɛ odidi ɔ.

¹¹Ofikyɛ yatete ye kyɛ mmenia biemɔ wɔ ɛmɔ nu bɔ bɛnatenate basabasa, bɔ bɛnyɔ adwuma biala, na mmom bɛfa bɛ noa bɛtoto mmenia dwirɛ nu ɔ.

¹² Sɔ mmenia nemɔ, yɛ́hyɛ bɛ wɔ y’Awurade Yesu Kristo dumaa nu, ná yɛtu bɛ foɛ kyɛ, odi kyɛ bɛyɔ b’adwuma konn bɛfa bɛpena bɛ noa aleɛ.

¹³Aliɛmaa mɔ, nnɛmɔma paayɛlɛ yɛ ɛmɔ yea.

¹⁴Na sɛ ebie ngotie bɔ yahã ye wɔ krataa ye anu a, ɛmɔhyɛ sɔ sona ne nzorɛ, na nnɛma ɛmɔ ne ye bɛbɔ afɛ, ná ɛ́mɔma ɔfɛre.

¹⁵Nakoso nnɛma ɛmɔbu ye kyɛ ɔte ɛmɔ pɔfoɛ, na mmom ɛ́mɔbɔ ye kɔkɔ kyɛ aliɛmaa.

¹⁶Yɛsrɛ kyɛ asomdwee Awurade ne bɔbɔ ɔma ɛmɔ asomdwee daa wɔ atee biala so. Awurade ne ɛmɔ amukoraa bɛtena.

¹⁷Me bɔbɔ, Pɔɔlo, me sa noa ahyerɛlɛ yeɛ mefa mebisa ɛmɔ bisabisa ɔ, na ɛhe hyɛ me krataa biala bɔ mekyerɛ ne nzorɛ: kyɛbɔ mekyerɛ hɔ ɛne.

¹⁸ Y’Awurade Yesu Kristo ɔlo ɛmɔ amukoraa.