Read Sehwi 1 Timoteo 1 Bible Online

1 Timoteo 1 - Sehwi bible

1 Timoteo 1

¹ Pɔɔlo, Kristo Yesu somafoɛ, kyɛbɔ yɛ Ngoadefoɛ Nyameɛ ne Kristo Yesu bɔ ɔte yɛ anyelasoɛ ne hyɛle ne,

² mefa mebrɛ Timoteo, bɔ ɔte me bɔbɔ mma wɔ gyidie nu ne. Adom, anwumvoinnwunɛ ne asomdwee bɔ ofi yɛ Baba Nyameɛ ne yɛ Awurade Kristo Yesu berɛ ɔyɛ wɔ deɛ.

³ Mmerɛ bɔ né mekɔ Makedonia nen, nzrɛle wɔ kyɛ ɛtena Ɛfeso, ná etu mmenia biemɔ foɛ kyɛ nnɛmaa bekyirekyire ngyerɛkyerɛ foforɛ,

⁴ yeɛ nnɛmaa bɛha bɛ nwo wɔ ɛhoaa ne afilie nu aworɛ ndoatoasoɛ nwo dwirɛ bɔ ye bo mbɛ ɔ, bɔ ɔfa aporowaasulɛ ba tra nyamesom paa ne bɔ ɔwɔ gyidie nu ne.

⁵ Na kɔkɔbɔlɛ ne, ye botaeɛ ole ɔdɔ bɔ ofi ahone bɔ nu te ɔ nu, tiboa paa ne gyidie kaenn nu.

⁶Na ɛhe yeɛ mmenia biemɔ bali makyebu bafi ye nwo baali aporowaasulɛ mbaen mbaen si,

⁷ bɔ bekuro kyɛ bɛyɛ mmeraa akyerɛkyerɛfoɛ, nakoso edwirɛ bɔ bɛkã ne, ɔne nningyein bɔ besi bɛ hue bɛkã bɛ nwo dwirɛ ne, bɛnde bɛ bo ɔ.

⁸ Na yɛse kyɛ mmeraa ne te paa, sɛ ebie di so kyɛbɔ ɔfata hɔ a.

⁹ Yeɛ yɛse kyɛ mmeraa ne ɔnne berɛ mma teneneeniɛ, na mmom ɔwɔ berɛ ma mmeraatolɛfoɛ, asoserɛfoɛ, bɛ bɔ benzuro Nyameɛ, bɔnefoɛ, bɛ bɔ bɛ nwo nde, ɔne bɛ bɔ bɛ nwo agua fiɛ ɔ, bɛ bɔ beku bɛ se ne bɛ ni, awudifoɛ,

¹⁰adwamanbɔlɛfoɛ, mmienzua bɔ bɛne mmienzua bɛda ɔ, bɛ bɔ bɛtɔne mmenia, ngondombofoɛ, ndaentolɛfoɛ, yeɛ nikyee biala bɔ ɔboka so bɔ otia ngyerɛkyerɛ paa ɔ;

¹¹ kyɛbɔ saleɛ Nyameɛ animnyam nzɛmba bɔ bafa bawura me sa ne ɔte ne.

¹²Meda y’Awurade Kristo Yesu bɔ wama me anwoserɛ ne ase; ofikyɛ wabu me nahorɛniɛ wafa me wawura ɛsolɛ adwuma ne anu.

¹³ Ɔwɔ nu kyɛ daa ne de, ngekane musue dwirɛ ndiale ye, ndanene ye nye, nyɛle ye so patapaa; nakoso onwuni me anwumvoin, ofikyɛ né menze bɔ meyɔ ɔ, na nyɔle ye wɔ elelɛ bɔ né menne menni ne anu.

¹⁴ Na y’Awurade adom ne wale me so mmorosoɛ, wɔ gyidie ne ɔdɔ bɔ ɔwɔ Kristo Yesu nu ɔ.

¹⁵ Ɛhe te nahorɛ dwirɛ bɔ ɔsɛ kyɛ bede bɛto nu bɔkɔɔ ɔ, kyɛ Kristo Yesu wale wiase oolele bɔnefoɛ bɔ nde bɛ hene ne ngoa.

¹⁶ Nakoso ɛhe ati yeɛ onwuni me anwunvoin ɔ, kyɛ me bɔ nni moa ne anu, Yesu Kristo kɔla ye aboterɛ amukoraa ali maa ɔkɔyɛ nhwɛsoɛ kɔma bɛ bɔ bekole ye bekoli bɛkɔhɔ daa ngoa nu ne.

¹⁷ Afei, anidie ne animnyam hã daa daa Hene ne, bɔ ɔte ase daa, bɔ anyeɛ nnwu ye, Nyameɛ komapɛ twe ne, afebɔɔ! Amen.

¹⁸ Mma Timoteo, ahyɛdeɛ he yeɛ mefa mewura wɔ sa ɔ, kyɛbɔ ngɔm dwirɛ bɔ mmerɛ bie bɛhã bɛfale wɔ nwo ne ɔte ne, kyɛ ɔ́hyɛ wɔ nguraen, ná fa ko koɛ paa ne,

¹⁹ ná nya gyidie ne tiboa paa bɔ ebiemɔ de bagyi bato nekaa bie, ná bafi ase wɔ gyidie nu ne.

²⁰ Bɛ nu biemɔ ole Himeneo ne Aleksandro bɔ maye bɛ mama Satan, kyɛ besua kyɛbɔ bɛngɔkekã musue dwirɛ ɔ.