Read Sehwi 1 Timoteo 4 Bible Online

1 Timoteo 4 - Sehwi bible

1 Timoteo 4

¹ Sunzum ne kã ye pefee kyɛ mmerɛ bɔ oli nziɛ ne anu, ebiemɔ koli makyebu bekofi gyidie ne anwo bekooli ngondombo sunzum mɔ ne sunzummɔne mɔ ngyerɛkyerɛ si,

² bɔ ɔnate ngondombo nnakannakafoɛ bɔ bɛ tiboa awu so ɔ.

³ Bɛ yeɛ bɛbera agyaa, ná bɛhyɛ kyɛ sona otua aleɛ bɔ Nyameɛ bɔle kyɛ bɛ bɔ bede bedi, ná banwu nahorɛ ne bɛfa asennaa beli ɔ.

⁴ Ofikyɛ Nyameɛ abɔdeɛ biala te paa, na sɛ yɛfa asennaa yɛsɔ nu de a, ye de ɔnzɛ kyɛ yɛkyi nikyee fee ɔ;

⁵ ofikyɛ Nyameɛ dwirɛ ne mbaeɛ yeɛ bɛfa bɛte ye nwo ɔ.

⁶ Sɛ ɛfa sɔ ngyerɛkyerɛ hemɔ ekyire aliɛmaa nemɔ a, ɛkɔyɛ Kristo Yesu somvoɛ paa bɔ bafa gyidie nwo dwirɛ ne ngyerɛkyerɛ paa bɔ eli ye si ne batete ye ɔ.

⁷ Nakoso daa tete dwirɛ mbaen mbaen mɔ bɔ bɛmmoka ne de, twe wɔ nwo fi ye nwo, ná bɔ nyamesom paa nwo mmɔden;

⁸ ofikyɛ anwoɔnaen nu mmɔdenbɔlɛ nwo le mvasoɛ kãa de, nakoso nyamesom paa nwo le mvasoɛ wɔ nikyee biala nu, na ole kekesaala ye ngoa ɔne ngoa bɔ ɔbaawa ne nwo bɔhyɛ.

⁹ Ɛhe te nahorɛ dwirɛ, bɔ ɔsɛ kyɛ bede bɛto nu bɔkɔɔ ɔ.

¹⁰ Ɛhe ati yeɛ yɛyere yɛ nwo yɛyɔ adwuma serɛ ɔ, ofikyɛ yafa yɛ nye yato Nyameɛ teasefoɛ, bɔ ɔte mmenia amukoraa, nganga agyidifoɛ Ngoadefoɛ ne aso.

¹¹ Fa ɛhemɔ tu foɛ paa, ná fa kyirekyire.

¹² Nnɛma ebiala bu wɔ animtia kyɛ ɛte aberandeɛ ɔ, na mmom ma agyidifoɛ bɛyɛ nhwɛsoɛ wɔ edwudwolɛ nu, brabɔlɛ nu, ɔdɔ nu, gyidie nu ne anwotelɛ nu.

¹³ Tu wɔ nwo sie berɛ ma Ahyerɛlɛ ne kengalɛ wɔ badwa nu, nzɛmbahanɛ ne ngyerɛkyerɛ kɔpem kyɛ ngɔwa ɔ.

¹⁴ Adom akyɛdeɛ bɔ ɔnate ngɔmhyɛlɛ so ɔne mbanyi mɔ sa bɔ bɛfa beguale wɔ so bɛfa bɛmane wɔ ne, nnɛbu wɔ nye gua so.

¹⁵Bɔ mmɔden wɔ sɔ nningyein hemɔ anwo, tu wɔ nwo sie berɛ ma bɛ bɔkɔɔ, amaa ɔnate so wɔ ngɔsoɛ ala ali ama ebiala anwu ye.

¹⁶ Nea wɔ nwo yé ɔne wɔ ngyerɛkyerɛ nwo yé, kɔ so tira nu; ofikyɛ sɛ ɛyɔ sɔ a, ekole wɔ nwo ne w’atiefoɛ ngoa.