Read Sehwi 1 Timoteo 5 Bible Online

1 Timoteo 5 - Sehwi bible

1 Timoteo 5

¹ Nnɛtwi panyi nyunu, na mmom tu ye foɛ kyɛ wɔ baba; yeɛ yɛ mmerandeɛ nemɔ kyɛ eliɛma mmienzua;

²yɛ mmrasua mbanyi nemɔ kyɛ wɔ maame mɔ; yeɛ yɛ ndaluwa nemɔ kyɛ eliɛma mmrasua wɔ anwotelɛ amukoraa nu.

³Boka mmrasua akunafoɛ bɔ belle bie ɔ.

⁴ Na sɛ brasua kunaniɛ bie ole mmaa anaa nnomaa a, maa beli moa besua kyɛ bɛkɔla nyamesom paa ali wɔ awuro, kyɛ bɛkɔnea b’awofoɛ ɔ; ofikyɛ sɔ yeɛ ɔte paa ná ɔsɔ Nyameɛ nye ɔ.

⁵ Brasua kunaniɛ bɔ olle bie, bɔ waha ye ngome ne, ɔfa ye nye to Nyameɛ so, na otu ye nwo sie berɛ ma ngotosrɛ ne mbaeɛ kɔngɔen ne eyia.

⁶ Nakoso brasua kunaniɛ bɔ wama ahohwibra ali ye ti ne de, ɔte teaseawuo.

⁷ Fa ɛhemɔ tu foɛ paa, ná bannya bɛ nwo dwirɛ tɛɛ banga.

⁸Sɛ ebie nnea ye abusuafoɛ, nganga ye awuroama a, né wapo gyidie ne, na wafõ watra sona bɔ onne nni ɔ.

⁹Nnɛfa brasua kunaniɛ biala boka so, sana wali afoɛ aburasia bɔ ɔkɔ ɔ, bɔ ogyale biaa komapɛ ɔ;

¹⁰ bɔ bedi ye ne ye nnwumaa paa nwo adanzeɛ: kyɛ watete mmaa, kyɛ waso ɛwɔfoɛ mɔ, kyɛ wanwunzi anwoteefoɛ gya bo, kyɛ waboka bɛ bɔ bɛwɔ anwokyere nu, ɔne kyɛ watu ye nwo wasie berɛ wama nnwumaa paa mukoraa ɔ.

¹¹Na akunafoɛ mmrasua bɔ bennyini ne, nnɛfa bɛ boka so; ofikyɛ sɛ b’akɔnnɔ ne ɔbo anwofama bɔ banya ye bama Kristo ne aso a, né bekuro kyɛ begya biaa,

¹²na ɔnate sɔ ti bedi b’anohoba bɔ belili moa bɛbɔle ne nwo fɔ.

¹³ Afei koso, besua akwadworɔ, na bekyinikyini awuro mɔ nu; nna kyɛ bɛyɛ foen ngome, na mmom bɛyɛ asɛmbɛ ne nzekure, na bɛkekã edwirɛ bɔ ɔmvata ɔ.

¹⁴ Yiti mekuro kyɛ akunafoɛ ndaluwa nemɔ begyigya mmiaa ná bɛwo, ná bɛnea b’awuro so yé, ná yamma pɔfoɛ ne ate ma wangekã yɛ nwo dwirɛ tɛɛ;

¹⁵ofikyɛ ebiemɔ ali makyebu baali Satan si.

¹⁶Sɛ brasua[2] gyidiniɛ bie ole abusuafoɛ akunafoɛ mmrasua a, maa ɔnea bɛ; ɔnzɛ kyɛ ɔyɛ adesoa da asɔre ne aso, amaa ɔnate so asɔre ne ahora anea akunafoɛ mmrasua bɔ belle bie ne.

¹⁷ Mbanyi bɔ bɛte bɛ nye bɛnea asɔre ne aso ne, ɛ́mɔfa anidie mmɔhoɛ bɛ́ma bɛ, nganga, bɛ bɔ bɛbɔ mmɔden wɔ nzɛmbahanɛ ne ngyerɛkyerɛ nu ne;

¹⁸ ofikyɛ Ahyerɛlɛ ne nwa, “Sɛ nandwie boro aburoo a, nnɛkyekye ye noa,” yeɛ “Adwumayɔlɛniɛ fata kyɛ ye sa kã ye akatuaa.”

¹⁹ Sɛ ebie bɔ asɔre panyi bie kwaadu a, nnede to nu, sana ate afi adanzefoɛ nyɔ anaa nza noa.

²⁰ Na bɛ bɔ bɔne ali bɛ ti ne, kã bɛ nyunu wɔ asɔre mma ne amukoraa nyunu, amaa ɔnate so bɛ ngaa ne basuro.

²¹ Ngyi Nyameɛ ne Awurade Kristo Yesu ne abɔfo bɔ baneanea nu baye bɛ ne anyunu mehyɛ wɔ kyɛ, di nhyehyɛleɛ hemɔ so, bɔ ɛnnea sona nyunu anaa ɛnyɛ nyeyemuɛ ɔ.

²² Nnɛpe ndɛen fa wɔ sa gua ebie so, yeɛ nnɛfa wɔ nwo dide ebiemɔ bɔne nu: Ma wɔ bra yɛ sannwuu!

²³ Nnɛno nzue ngome ko, na ɔnate wɔ ko bɔ ɔha wɔ, ɔne fonɔnfonɔn bɔ ɛtaa yɛ ne ati, no bobe nzaa kãa.

²⁴Mmenia biemɔ bɛ bɔne la dwaaso, na odi bɛ nyunu kɔ ndɛenbualɛ nu; nakoso ebiemɔ deɛ de, ɔda ali nziɛ ye.

²⁵Na sɔ ala yeɛ nnwumaa paa bɛda ali pefee ɔ, na sɛ banna ali po a, bɛngora bɛmvea.