Read Sehwi 2 Timoteo 1 Bible Online

2 Timoteo 1 - Sehwi bible

2 Timoteo 1

¹Pɔɔlo bɔ ɔnate Nyameɛ pɛ so nde Kristo Yesu somafoɛ, kyɛbɔ ngoa bɔhyɛ bɔ ɔwɔ Kristo Yesu nu te ne,

² mefa mebrɛ mma Timoteo bɔ ɔla m’ahone nwo ɔ. Adom, anwumvoinnwunɛ ne asomdwee bɔ ofi Baba Nyameɛ ne y’Awurade Kristo Yesu berɛ ɔyɛ wɔ deɛ.

³Mefa asennaa mema Nyameɛ bɔ mefa tiboa paa meso ye, kyɛbɔ me nana mɔ bɛsole ye ne, kyɛ daa biala mekaye wɔ wɔ me mbaeɛ nu eyia ne kɔngɔen.

⁴Na mekaye wɔ nye moen ne a, ɔma me wora dɔ wɔ kyɛ ngonwu wɔ paa ɔ, ná ahaa me nye agye.

⁵ Na ɔmaa mekaye wɔ nahorɛ gyidie ne, gyidie bɔ wɔ nana Loyese ne wɔ maame Yunise belili moa benyane ye ne, na mede medi kyɛ wɔ koso ele bie.

⁶Yiti mékaye wɔ kyɛ, Nyameɛ akyɛdeɛ bɔ ɔwɔ wɔ nu, bɔ mvale me sa nguale wɔ so maa enyane ye ne, maa ɔyɛ hye wɔ wɔ nu;

⁷ofikyɛ Nyameɛ amma yɛ esurolɛ sunzum, na mmom tumi ne ɔdɔ ne anwohyɛsoɛ sunzum.

⁸Yiti nnɛma y’Awurade adanzeɛlilɛ ne ɔyɛ wɔ nya, anaa me bɔ nde ye kukununiɛ ne me nwo yɛ wɔ nya; na mmom nya kyɛfa wɔ nzɛmba ne nwo amaneɛnwunɛ nu, kyɛbɔ Nyameɛ tumi ɔte ne.

⁹Ye yeɛ oolele yɛ ná ɔfale ɛfrɛlɛ krongron frɛle yɛ ɔ, nna kyɛ yɛ nnwumaa ti ɔ; na mmom kyɛbɔ ye bɔbɔ ye nhyehyɛleɛ ne adom bɔ wafa walo yɛ wɔ Kristo Yesu nu fi tetetete ne ɔte ne.

¹⁰Na afei de, ɔnate yɛ Ngoadefoɛ Yesu Kristo nwo aliyelɛ ne aso wala ye ali. Ye bɔ watu ewue bo, ná ɔnate nzɛmba ne aso wala ngoa ɔne tebea bɔ ewue nne nu ɔ ali wahyire ɔ.

¹¹ Na nzɛmba he ati yeɛ babɔ me dumaa bayɛ me nzɛmbahanɛniɛ ne somafoɛ ne kyerɛkyerɛniɛ ɔ.

¹²Na ɔnate ɛhe ati yeɛ menwu amaneɛ hemɔ ye, nakoso ɔnyɛ me nya; ofikyɛ mese bɔ male ye mali ne, na mede medi kyɛ ɔkora ɔbɔ bɔ mafa mawura ye sa[1] ne nwo waen maa okoodwu Kyẽa ne.

¹³Edwirɛ paa mɔ bɔ ate afi me berɛ ne, sɔ ye nwo nhwɛsoɛ nu yé, gyidie ne ɔdɔ bɔ ɔwɔ Kristo Yesu nu ne anu.

¹⁴Nahorɛ ne bɔ bafa bawura wɔ sa ne, fa Sunzum Krongron bɔ ɔte yɛ nu ne aso nea so yé.

¹⁵Ɛse kyɛ bɛ bɔ bɛwɔ Asia amukoraa bayakyi me nu bahɔ; Figɛlo ne Hɛmogen koso bɛboka so.

¹⁶Mesrɛ Awurade kyɛ onwu Onesiforo awuro ama anwumvoin, ofikyɛ ɔkyekyele me wora mmerɛ pee, na me ngɔnzɔngɔnzɔ ne anyɛ ye nya.

¹⁷Ɔwale Rome nen, ɔpenane me dee fɛle koraa yeɛ onwu me ɔ.

¹⁸Mesrɛ Awurade kyɛ ɔma Awurade nwu ye anwumvoin wɔ Kyẽa ne. Na wɔ bɔbɔ ɛse ɛsolɛ worawora bɔ ɔsole me wɔ Ɛfeso ɔ.