Read Sehwi Tito 1 Bible Online

Tito 1 - Sehwi bible

Tito 1

¹ Pɔɔlo, bɔ nde Nyameɛ akoaa ne Yesu Kristo somafoɛ mema bɛ bɔ Nyameɛ aneanea nu waye bɛ ɔ bɛ gyidie ɔne nahorɛ ne nwo nimdeɛ bɔ ɔma nyamesom paa ɔ,

² daa ngoa nwo anyelasoɛ nu, ngoa bɔ Ɛdangama Nyameɛ bɔ ɔmbɛ ngondombo ne ɔfa hyɛle bɔ koraka yeɛ ɔbɔ aleɛ ɔ;

³ na mmerɛ bɔ ɔsɛ ɔ nu, ɔlale ye dwirɛ ne ali wɔ nzɛmbahanɛ bɔ ɔte yɛ Ngoadefoɛ Nyameɛ ahyɛdeɛ bɔ wafa wawura me sa ne;

⁴ na mékyerɛ mebrɛ Tito, bɔ ɛte me bɔbɔ mma wɔ gyidie komapɛ ne ala nu ɔ. Adom, anwumvoinnwunɛ ne asomdwee bɔ ofi Baba Nyameɛ ne yɛ Ngoadefoɛ Awurade Yesu Kristo berɛ ɔyɛ wɔ deɛ.

⁵ Na ɛhe ati yeɛ nyakyili wɔ wɔ Krete ɔ, kyɛ ɛ́nea toto nningyein bɔ waha ne pɛpɛɛpɛ, ná ɛyeye mbanyi mɔ wɔ kuro biala so, kyɛbɔ ngane kyɛ ɛyɔ ne:

⁶ Bɔ ngekalewa biala nne ye bra nu; bɔ ɔye te komapɛ, bɔ ye mma mɔ bɛte agyidifoɛ bɔ bɛnyɛ basabasa anaa asoserɛ ɔ.

⁷ Na bɔ ɔfata neafoɛ ɛhe: ɔnzɛ kyɛ benwu ngekalewa wɔ ye bra nu, ofikyɛ ɔte Nyameɛ awuro so neafoɛ; ɔnzɛ kyɛ ɔmoma ye nwo so, onya ahone, ɔyɛ akɔnomnzaniɛ, patapaa, anaa adifuu sona;

⁸ na mmom ɔsɛ kyɛ ɔma ye nye gye ɛwɔfoɛsolɛ nwo, okuro bɔ ɔte paa, ɔte ebie bɔ ye adwene nu pi, ɔtengyɛ, ye nwo te, ná ole anwohyɛsoɛ ɔ;

⁹ ɔsɛ kyɛ otira nahorɛ dwirɛ ne anu bum kyɛbɔ behyirele ye ne, amaa ɔnate so wahora wafa ngyerɛkyerɛ paa watu foɛ, ná wama aporowaasulɛfoɛ bɛ mvomsoɛ ala ali.

¹⁰ Ofikyɛ mmeni pee wɔ berɛ bɔ bɛte asoserɛfoɛ, nzekurebɔlɛfoɛ, nnakannakafoɛ, nganga bienzuapɛlɛfoɛ nemɔ,

¹¹ bɔ ɔsɛ kyɛ bɛmaa bemua bɛ noa ɔ. Bɛ yeɛ mvasoɛ fiɛ ti bekyirekyire bɔ ɔnzɛ kyɛ bekyire ɔ, na bɛfa bɛsɛkye abusuafoɛ mukoraa b’adwene.

¹² Bɛ bɔbɔ bɛ nu sona ko, bɔ ɔte bɛ bɔbɔ bɛ ngɔmhyɛlɛniɛ ɔ, ɔhane kyɛ, “Kretefoɛ bɛte ngondombofoɛ daa biala, ngaka amumuyɛɛfoɛ, ɛfoen mmenia bɔ bɛte adifuu ɔ.”

¹³ Sɔ adanzeɛ he te nahorɛ, yiti twi bɛ nyunu paa, amaa ɔnate so bagyina pindinn wɔ gyidie ne anu;

¹⁴ ná banyɛ asoɛ bamma Yudafoɛ tete dwirɛ bɔ nahorɛ nne nu ne, ɔne mmenia bɔ bɛpo nahorɛ ne ɔ b’ahyɛdeɛ.

¹⁵ Nikyee biala nwo te ma bɛ bɔ bɛ nwo te ɔ; nakoso bɛ bɔ bɛ nwo nde ná benne benni ne de, nikye fee nwo nde mma bɛ; ofikyɛ b’adwene ne bɛ tiboa nwo agua fiɛ

¹⁶ Bekyire kyɛ bɛse Nyameɛ, nakoso bɛfa bɛ yɔleɛ bɛpo ye; bɛte akyiwadeɛyɔlɛ mmenia, asoserɛfoɛ, bɔ bɛngora bɛnyɔ nikye paa biala ɔ.