Read Sehwi Tito 3 Bible Online

Tito 3 - Sehwi bible

Tito 3

¹ Kaye bɛ ma bɛbrɛ bɛ nwo ase bɛma maen mbanyi ne bɛ bɔ tumi wura bɛ sa ɔ, kyɛ bɛyɛ sotie, ná bésiesie bɛ nwo bɛ́ma nnwumaa paa biala;

² kyɛ, nnɛmaa bɛkã ebiala nwo dwirɛ tɛɛ, nnɛmaa bɛyɛ tuturefoɛ; na mmom bédwo bɛ nwo ase, ná bɛfa anidie bɔ odi mu ɔ bɛma mmenia mukoraa.

³ Ofikyɛ daa ne de, né yɛ koso yɛte ngwaseafoɛ, asoserɛfoɛ, bɛmaa yɛlili makyebu, yɛyɛle anwoɔnaen akɔnnɔ ne anigye ahoroɔ ngoaa, yɛfale nzɛmmɔne ne anyeboroborolɛ yɛbɔle yɛ bra, mmenia pɔle yɛ, na yɛ wora yɛpɔle bɛ.

⁴ Nakoso mmerɛ bɔ yɛ Ngoadefoɛ Nyameɛ ɔlale ye paayɛlɛ ne ye ɔdɔ ali hyirele adasa mmaa ne,

⁵ bɔ nna kyɛ tenenee nnwumaa bie bɔ yayɔ ti ɔ; na mmom ye bɔbɔ ye anwumvoinnwunɛ ti ɔ, na ɔfale aworɛ foforɛ ebialɛ nu ne foforɛyɛlɛ wɔ Sunzum Krongron so olele yɛ ngoa.

⁶ Na ɛhe yeɛ ɔnate yɛ Ngoadefoɛ Yesu Kristo so ohwie guale yɛ so mmorosoɛ ɔ,

⁷ amaa ɔnate ye adom so wabua yɛ be, bɔ ɔkɔma yɛ sa kɔhã daa ngoa nwo anyelasoɛ ne ɔ.

⁸ Ɛhe te edwirɛ nahorɛ, na mekuro kyɛ esi edwirɛ hemɔ so paa, amaa ɔnate so bɛ bɔ bale Nyameɛ bali ne badwene kyɛbɔ bɛkɔbɔ nnwumaa paa nwo mmɔden ɔ. Sɔ nningyein nemɔ yeɛ ɔte paa ɔ, na mvasoɛ wɔ so ma sona.

⁹ Nakoso twe wɔ nwo fi ngwaseaa aporowaasulɛ nwo, aworɛ ndoatoasoɛ nwo dwirɛ nwo, mbakyembakyemuɛ nwo, yeɛ mmeraa ne nwo aporowaasulɛ nwo; ofikyɛ mvasoɛ nne so, na bɛte mbaen.

¹⁰ Na sona bɔ ɔfa mbakyembakyemuɛ ba ne, sɛ edwudwo kyire ye ko anaa ye pɛen nyɔ so yie a, nnɛne ye bɔ afɛ ko.

¹¹Na nwu ye kyɛ, sona bɔ ɔte sɔ ne, wali makyebu, ɔte bɔnefoɛ, na obua ye bɔbɔ ye nwo foɛ.

¹² Sɛ mesoma Atɛma anaa Tihiko maa ɔba wɔ berɛ a, bɔ mmɔden kyɛ ɛkɔwa me berɛ wɔ Nikopoli; ofikyɛ berɛ yeɛ mayɛ m’adwene kyɛ ngooli prakasua mmerɛ ne ɔ.

¹³Bɔ mmɔden kyɛ ekogua mmeraa nwo nimdeɛniɛ Sena ɔne Apolo ate; nea kyɛ bengohia hwee ɔ.

¹⁴ Ma yɛ mmenia besua nnwumaa paa nwo mmɔdenbɔlɛ, ná bɛ́fa bɛ́boka bɛ bɔ behia mmokalɛ paa ɔ; na mmom ɔnzɛ kyɛ bɛyɛ foen bɔ mvasoɛ nne bɛ so ɔ.

¹⁵ Bɛ bɔ bɛne me wɔ wa ne amukoraa bebisa wɔ ahye. Bisa bɛ bɔ bekuro yɛ dwirɛ wɔ gyidie nu ne ahye (ma me). Adom ɔyɛ ɛmɔ amukoraa bɛ deɛ.