Read Sehwi Hebrifoɛ 3 Bible Online

Hebrifoɛ 3 - Sehwi bible

Hebrifoɛ 3

¹Yiti aliɛmaa mɔ anwoteefoɛ bɔ Nyameɛ afrɛ ɛmɔ ɔ, ɛ́mɔnea Somafoɛ Yesu bɔ ɔte yɛ dwirɛ bɔ yɛkã ne anwo ɔsɔfo panyi paa ne kyɛ,

² olili nahorɛ mane bɔ otuli ye siele berɛ ne, kyɛbɔ Mose koso lili nahorɛ wɔ Nyameɛ awuro mukoraa nu ne.

³Na kyɛbɔ suasilɛfoɛ le animnyam paa tra sua nen, sɔ ala koso yeɛ Yesu le animnyam tra Mose ɔ.

⁴Ɔnate kyɛ, sua biala kuro sona yeɛ osi ɔ, nakoso Nyameɛ yeɛ ɔyɔ nningyein mukoraa ɔ.

⁵ Mose de, olili nahorɛ wɔ Nyameɛ awuro mukoraa nu kyɛ somvoɛ, na olili nningyein bɔ né Nyameɛ baahã ye nwo dwirɛ ne nwo adanzeɛ.

⁶Nakoso Kristo de, odi Nyameɛ awuro so kyɛ Baa. Yiti yɛ ole ye awuro ne, nakoso sana yɛsɔ yɛ gyidie ne yɛ anwohoahoa bɔ ɔwɔ yɛ anyelasoɛ nu yé kodwu ayieleɛ.

⁷ Yiti kyɛbɔ Sunzum Krongron kã hɔ ɛhe: “Ɛnɛ, sɛ ɛmɔte Nyameɛ dwudwolɛ a,

⁸nnɛma ɛmɔyɛ asoserɛ, kyɛbɔ bɛyɛle ye so lɔen, wɔ mmerɛ bɔ besole ye bɛneane wɔ ɛserɛ so ne.

⁹Berɛ yeɛ ɛmɔ nana mɔ gyegyele me besole me bɛneane, na benwuni me nnwumaa afoɛ aburanna ɔ.

¹⁰Yiti mvɛle sɔ aworɛ ndoatoasoɛ ne so yaa, na ngane kyɛ, ‘Daa biala bedi bɛ bɔbɔ bɛ ti piri, na bɛnze atee bɔ mefa so meyɔ me nningyein ɔ.’

¹¹Yiti nne ɛyaa ndale ndaen kyɛ, ‘Bengowura me nwomelelɛ ne anu bie le!’ ”

¹²Aliɛmaa mɔ, ɛmɔnea yé na ɛmɔ nu biala annya adwene tɛɛ bɔ ɔmma onne nni ɔ, na wandwe ye nwo wamvi Nyameɛ teasefoɛ ne nwo.

¹³Na mmom ɛmɔtutu bɛ nwo foɛ kyẽa biala bɔ bɛfrɛ ye “Ɛnɛ” ne, na bɔne annakalaka ɛmɔ nu biala amma wanyɛ asoserɛ.

¹⁴Na sɛ yɛsɔ gyidie bɔ yɛlili moa yɛnyane ye ne anu yé yɛkɔ ayieleɛ a, ye de yɛle kyɛfa wɔ Kristo nu.

¹⁵ Kyɛbɔ bɛkã kyɛ, “Ɛnɛ, sɛ ɛmɔte Nyameɛ dwudwolɛ a, nnɛma ɛmɔyɛ asoserɛ, kyɛbɔ bɛyɛle ye so lɔen ne.”

¹⁶Nwa mɔ yeɛ bɛtele Nyameɛ dwudwolɛ, nakoso bɛyɛle ye so lɔen ne? Aso nna bɛ bɔ Mose yele bɛ fili Misraim ne amu ɔ?

¹⁷ Nwa mɔ yeɛ Nyameɛ fɛle bɛ so yaa afoɛ aburanna ne? Aso nna bɛ bɔ bɛyɔle bɔne na bɛtotɔle amono nu wɔ ɛserɛ ne aso ne ɔ?

¹⁸Nyameɛ ndaen bɔ ɔtale kyɛ, “bengowura me nwomelelɛ ne anu bie le” nen, né ɔne nwa mɔ? Aso nna bɛ bɔ bɛyɛle asoserɛ ne ɔ?

¹⁹Na ɛhe maa yɛnwu ye kyɛ banwura nwomelelɛ ne anu, ɔnate kyɛ banne banni.