Read Sehwi Hebrifoɛ 5 Bible Online

Hebrifoɛ 5 - Sehwi bible

Hebrifoɛ 5

¹Bɛye ɔsɔfo panyi paa biala befi mmenia nu maa ogyina bɛ gya nu wɔ Nyameɛ nyunu, na ɔfa ayɛyɛdeɛ ne afɔleɛ srɛ bɔnefakyɛ.

²Na ɔnate kyɛ ye bɔbɔ ɔtɔ sii wɔ nningyein pee nu ne ati, ɔkora nwu bɛ bɔ bɛnze na bɛyɔ mvomsoɛ ne anwumvoin.

³ Na ɔnate sɔ ne ati, nna mmenia bɛ bɔnefakyɛ afɔleɛ ngome yeɛ ɔbɔ ɔ; na mmom odi kyɛ ɔbɔ ye bɔbɔ ye deɛ koso.

⁴ Ebiala ngora mva sɔ dibea ne ndo ye nwo so, na mmom sana Nyameɛ afrɛ ye kyɛbɔ ɔfrɛle Aarɔn nen.

⁵ Sɔ ala koso yeɛ Kristo amva sɔ dibea ne wando ye nwo so kyɛ ɔte sɔfo panyi paa ɔ, na mmom Nyameɛ bɔbɔ hã hyirele ye kyɛ, “Ɛte Mma, ɛnɛ mayɛ wɔ Baba.”

⁶ Na Nyameɛ asa aha ye nekaa foforɛ kyɛ, “Ɛte sɔfo afebɔɔ, kyɛ Mɛlkisɛdɛke deɛ ne ala.”

⁷ Mmerɛ bɔ né Yesu wɔ aseɛ ye aso wa nen, ɔfale esuɛ ne ye nye moen teateane nu fale ye mbaeɛ ne nikyeesrɛlɛ tole Nyameɛ bɔ ɔkora ye ye fi ewue nu ne nyunu, na ɔnate ye nyamesuro ti Nyameɛ tiele ye.

⁸Na ɔwɔ nu kyɛ ɔte Baa de, nakoso osuane sotie fili ye amaneɛnwunɛ ne anu;

⁹ na olili mu yiele nen, ɔɔyɛle ngoa bɔ olle ayieleɛ ti mane bɛ bɔ bɛyɔ sotie bɛma ye nemɔ amukoraa,

¹⁰ na Nyameɛ yɛle ye sɔfo panyi paa kyɛ Mɛlkisɛdɛke deɛ ne ala.

¹¹Yɛle ɛhe nwo dwirɛ pee paa yɛkã, nakoso nu hyirehyirelɛ kɔyɛ se; ofikyɛ ɛmɔkyɛ koraa né ɛmɔate dwirɛ bo.

¹² Wahyɛ bɔ ahaa odi kyɛ kekesaala ye ɛmɔyɛ akyerɛkyerɛfoɛ ɔ, nakoso ɛmɔtɛhia sona bɔ ɔkɔhyɛ ye bo kosa kohyirehyire ɛmɔ Nyameɛ dwirɛ ne ɔ. Ɛmɔnhia aleɛ bɔ nu yɛ se ɔ, na mmom ɛmɔtɛhia nyɔfonesue.

¹³Na ebiala bɔ nyɔfonesue te ye aleɛ nen, ye nimdeɛ bɔ ɔwɔ tenenee nwo te kãa, ofikyɛ ɔte akwadaa.

¹⁴Nakoso bɛ bɔ banyi (sunzum nu) ne de, aleɛ bɔ nu yɛ no yeɛ ɔfata bɛ ɔ, ofikyɛ basua banwu ye, na bɛkora benwu nzonzoleɛ bɔ ɔwɔ paa ne tɛɛ nu ɔ.