Read Sehwi Hebrifoɛ 6 Bible Online

Hebrifoɛ 6 - Sehwi bible

Hebrifoɛ 6

¹Yiti ɛ́mɔma yɛyakyi Kristo nwo ngwadaa ngwadaa ngyerɛkyerɛ ne, ná yɛfa yɛ ti yɛwura mbanyi nikyeesualɛ nu. Ɔnzɛ kyɛ yɛkɔhyɛ ye bo bieku yɛpena yɔleɛ basabasa nwo adwenesakyera ne Nyameɛ nu gyidie ko;

²asubɔlɛ ahoroɔ nwo ngyerɛkyerɛ, asaa bɔ bɛfa begua sona so, awufoɛ ewutingyelɛ ne ndɛenbualɛ bɔ olle ayieleɛ ne.

³Na ɛhe yeɛ sɛ Nyameɛ ma ye nwo ate a, yɛkɔyɔ ɔ.

⁴ Na ɔngɔhora ngɔwa kyɛ bɛ bɔ mmerɛ bie bɛwale kanea ne anu, bɔ benyane nyameɛso akyɛdeɛ ne, bɔ bɛ sa hane Sunzum Krongron ne bie,

⁵ná benwuni Nyameɛ dwirɛ ne nwo mvasoɛ, ɔne ewiase foforɛ bɔ ɔbaawa ne anu tumi ne,

⁶sɛ bedi gyidie ne anwo makyebu a, bekosa bɛkɔsakyera b’adwene ko ɔ; ofikyɛ besa bɛbɔ Nyameɛ Awa ne mmeamudua nu bɛma bɛ nwo, na begua ye nyunu ase wɔ mmenia nu.

⁷Aseɛ bɔ ɔmeme nzue bɔ ɔtaa tɔ gua so, na ofifi aleɛ bɔ ye nwo hia ma mmenia bɔ bɛ ti yeɛ bɛyɔ so boo nen, Nyameɛ yira ye.

⁸ Nakoso sɛ ofifi mmowue ne ɛfone de a, ye de mvasoɛ biala nne ye so; ɔngyɛ né Nyameɛ apaye ye, na ye ayieleɛ ole kyɛ ɔfa see sɛkye ye.

⁹Nakoso aliɛmaa mɔ, sɛ yɛkã sɔ po a, y’adwene si yɛ pi wɔ ɛmɔ nwo, kyɛ atee paa bɔ ɔkɔ ngoalelɛ nu yeɛ ɛmɔnate so ɔ.

¹⁰Ofikyɛ Nyameɛ de, ɔtte asisie bɔ ɔkobu ye nye kogua ɛmɔ mmɔdenbɔlɛ, ɔne ɔdɔ bɔ ɔnate ye dumaa ti ɛmɔaye ye ali bahyire anwoteefoɛ, ná ɛmɔtɛyɔ ɔ.

¹¹Na yɛpena kyɛ ɛmɔ nu biala kɔ so bɔ mmɔden sɔ ala kɔ ayieleɛ, amaa ɛmɔ sa ahã bɔ ɛmɔ nye la so ne.

¹²Yɛnguro kyɛ ɛmɔkɔyɛ nyaanyaa, na mmom yɛkuro kyɛ ɛmɔsua bɛ bɔ bɛnate gyidie ne aboterɛ so benya Nyameɛ bɔhyɛ ne.

¹³ Mmerɛ bɔ Nyameɛ hyɛle Abraham bɔ nen, ɔnate kyɛ ebiala nne berɛ bɔ ɔtra ye (Nyameɛ) bɔbɔ bɔ ɔkɔfa ye kɔta ndaen ne ati, ɔtale ye bɔbɔ ye nwo ndaen

¹⁴kyɛ, “Amba, ngoyira wɔ ná mama wɔ boso ama bata pee.”

¹⁵Abraham nyane aboterɛ nwondɛle, na ye sa hane bɔhyɛ ne.

¹⁶Ofikyɛ amba, sona fa ebie bɔ odi mu tra ye ɔ, ye dumaa yeɛ ɔta ndaen ɔ, na ndaen bɔ ɔfa foa so ne ma aporowaasulɛ biala so pɛ.

¹⁷Yiti mmerɛ bɔ Nyameɛ yɛle kyɛ ɔkɔma bɛ bɔ bɔhyɛ ne te bɛ deɛ konwu ye pefee kyɛ ɔnzesã ye adwene nen, ɔfale ndaen foale so.

¹⁸Yiti ɔnate nningyein nyɔ[1] bɔ ɔnzesã, bɔ okyire kyɛ Nyameɛ ngɔhora ngɔpɛ ngondombo ne wamaa yɛ bɔ yanwati yaafea ye nu ne yanya nguraenhyɛlɛ mmorosoɛ, na yasɔ anyelasoɛ bɔ ɔla yɛ nyunu ne anu yé.

¹⁹ Na anyelasoɛ he te sɛkyɛ bɔ otira yɛ kra nu ɔ; ɔnde, na ɔkɔworo ɛtena bɔ onwi nyameɛso Asɔneyɛɛ sua ne anu kɔ Krongron nu Krongron ne anu.

²⁰ Berɛ yeɛ Yesu ali moa ahɔ ama yɛ ɔ, na waayɛ ɔsɔfo panyi paa afebɔɔ kyɛ Mɛlkisɛdɛke deɛ ne ala.