Read Sehwi Hebrifoɛ 8 Bible Online

Hebrifoɛ 8 - Sehwi bible

Hebrifoɛ 8

¹ Edwirɛ bɔ yɛkã ne, porɛ bɔ ogyi so paa ɛhe: ɔsɔfo panyi paa sɔaa yeɛ yɛle ye ɔ, na ɔte Tuminiɛ n’ahennie bia ne famaa so wɔ nyameɛso.

²Na odi ye sɔfo ne wɔ nekaa krongron ne anu, ɔne ɛtena sua kaenn bɔ nna dasaniɛ, na mmom Awurade yeɛ osili ɔ nu.

³Bɛye ɔsɔfo panyi paa biala kyɛ ɔfa ayɛyɛdeɛ ne afɔlebɔdeɛ ma Nyameɛ; na ye sɔ ne ati, ohia kyɛ ɔsɔfo panyi paa he koso nya nikyee fa bɔ afɔleɛ.

⁴Na sɛ ɔwɔ aseɛ ye aso a, ahaa ɔngɔyɛ sɔfo po, ofikyɛ asɔfo mɔ wɔ berɛ bɔ begyina mmeraa ne aso bɛfa ayɛyɛdeɛ bɛma ɔ.

⁵ Na bɛ dwumadie ne, ɔte nyameɛso deɛ ne nwo nhwɛsoɛ, ɔne wawoɛ; ofikyɛ anzana Nyameɛ baama Mose si ɛtena sua nen, osele ye kyɛ, “Nea kyɛ ɛkɔyɔ nikyee biala maa ye sɛso kɔyɛ kyɛ bɔ mva ngyirele wɔ wɔ bokaa ne aso nen pɛpɛɛpɛ.”

⁶Nakoso kekesaala ye de, Kristo sa ahã sɔfodwuma bɔ odi mu bɔkɔɔ tra bɛ deɛ ne, ofikyɛ apam bɔ odi mu, na afei ogyi bɔhyɛ bɔ odi mu so yeɛ ɔte nu ndamgyinaniɛ ɔ.

⁷Na sɛ apam bɔ oli moa ne ɔndɔ sii a, ahaa né ye nwo nhia kyɛ yɛkonya apam bɔ ɔtɔ so nyɔ ɔ.

⁸ Nyameɛ nwuni mvomsoɛ wɔ ye mmenia nwo, yiti ɔhane kyɛ, “Tie, mmerɛ bie kɔwa, bɔ me ne Yisrael awuro ama ne Yuda awuro ama yɛkɔhyehyɛ apam foforɛ ɔ, Awurade noa dwirɛ ɛne;

⁹na ɔngɔyɛ kyɛ apam bɔ me ne bɛ nana mɔ hyehyɛle wɔ kyẽa bɔ nzɔle bɛ sa nyele bɛ mvili Misraim aseɛ so ne; ɔnate kyɛ bangɔso banni m’apam ne aso, na me koso nyele me nye mvili bɛ so, Awurade noa dwirɛ ɛne.

¹⁰Na sɔ ngyẽa ne asi ne, apam bɔ me ne Yisrael awuro ama yɛkɔhyehyɛ hɔ ɛhe, Awurade noa dwirɛ ɛne: Ngɔfa me mmeraa ngowura b’adwene nu, na mahyerɛ ye wɔ b’ahone nu, ngɔyɛ bɛ Nyameɛ, na bɛ wora bayɛ me mmenia.

¹¹Na bɛ nu biala ngohyirehyire obiɛngo, anaa ɔngɔhã ngohyire oliɛma kyɛ ‘Nwu Awurade,’ ofikyɛ bɛ mukoraa, fite ngwadaa so kodwu mbanyi so bekonwu me.

¹²Ngonwu b’amumuyɛɛ nwo anwumvoin, na mengɔkaye bɛ bɔne ne bɛ mvomsoɛ ko.”

¹³Na sɛ Nyameɛ kã kyɛ “Apam foforɛ” a, né obu bɔ oli moa ne kyɛ wayɛ daa; yeɛ nikyee biala bɔ ye mmerɛ ogu so ɔpɛ nu ná ɔyɛ daa nen, ɔngyɛ né watu wamini.