Read Sehwi Yakobo 5 Bible Online

Yakobo 5 - Sehwi bible

Yakobo 5

¹Afei ɛmɔ, esikafoɛ, ɔnate amaneɛ bɔ ɔ́ba ɛmɔ so ne ati, ɛ́mɔsu ná ɛ́mɔbɔ awuye!

² Ɛmɔ anwonyadeɛ ne aporɔ, na mvrɔlɔ ali ɛmɔ ndena.

³Ɛmɔ sikaa kɔkorɛ ne ɛdwetɛ ali naakye, na bɛ nwo naakye ne kɔyɛ adanzeɛ kotia ɛmɔ, na okodidi ɛmɔ nwonaen kyɛ see. Ɛmɔaboaboa agyapadeɛ noa wɔ ngyẽa bɔ oli nziɛ ye anu.

⁴ Ɛ́mɔtie! Apaafoɛ bɔ bɛyɔle ɛmɔ fieso adwuma ne, b’akatuaa bɔ ɛmɔnate asisie so bɛfa besiele ne, ɔtea nu; na bɛ bɔ bɛtele ɛmɔ fieso nnɔbaeɛ ne, bɛ suɛ ne waadwu Asafo Awurade so anu.

⁵ Ɛmɔ asetena nu wɔ aseɛ ye aso te anigye ne ahohwibra; na ɛmɔayɛ bɛ nwo twɔtwɔfee bama akumyɛɛ kyẽa ne.

⁶Ɛmɔabua teneneeniɛ foɛ bahũ ye, wɔ aberɛ bɔ onzi ɛmɔ ate ɔ.

⁷ Yiti aliɛmaa mɔ, ɛ́mɔnya ndoboaseɛ maa oodwu kyɛ Awurade kɔwa ɔ. Ɛ́mɔtie, kuaniɛ bɔ ɔnwondɛ ma aseɛ kye aleɛ bɔ ye nyɔboɛ yɛ se ne, onya ye nwo aboterɛ maa okodwu kyɛ feefee ne asuso kotikye ɔ.

⁸Na ɛmɔ koso, ɔsɛ kyɛ ɛmɔnya aboterɛ, ɛ́mɔmia ɛmɔ nye, ofikyɛ Awurade walɛ ne apingye.

⁹Aliɛmaa mɔ, nnɛma ɛmɔbobɔ kwaadu betiatia ɛmɔ nwo, ná bammua ɛmɔ ndɛen. Ɛ́mɔnea, ndɛenbualɛniɛ ne ogyi anoa nu berɛ.

¹⁰Aliɛmaa mɔ, ngɔmhyɛlɛfoɛ bɔ bedwudwole Awurade dumaa nu ne, ɛ́mɔfa bɛ bɛ́yɛ amaneɛnwunɛ ne aboterɛ nwo nhwɛsoɛ.

¹¹ Ɛ́mɔtie, bɛ bɔ bemiane bɛ nye bɛfale amaneɛ nu ne, yɛbu bɛ kyɛ banya saleɛ. Yeɛ ɛmɔate Yob amaneɛnwunɛ nu animia ne, na ɛmɔanwu kyɛbɔ Awurade maa osi yiele ye ɔ, kyɛbɔ Awurade anwumvoinnwunɛ sone, ná osa le tema maa ɔbo so ɔ.

¹² Aliɛmaa mɔ, ɛhe amukoraa asi ne, nnɛma ɛmɔta ndaen! Nnɛma ɛmɔfa nyameɛso anaa aseɛ anaa nikyee biala bɛta ndaen. Na mmom ɛ́mɔma ɛmɔ “Yoo” yɛ yoo, ná ɛmɔ “Daabi” yɛ daabi, ná bammua ɛmɔ foɛ.

¹³Ɛmɔ nu bie onwu amaneɛ anaa? Maa ɔbɔ mbaeɛ. Ebie nye agye anaa? Maa ɔto ayɛyelɛ dwein.

¹⁴ Ɛmɔ nu bie nde apɔ anaa? Maa ɔfrɛ asɔre mbanyi mɔ ma bɛɛbɔ mbaeɛ bɛma ye, ná bɛfa ngoo bɛpopa ye wɔ Awurade dumaa nu.

¹⁵Gyidie mbaeɛ kole yarefoɛ ne ngoa, na Awurade kɔpagya ye; na sɛ wayɔ bɔne a, ɔkɔfa kɔhyɛ ye.

¹⁶Yiti ɛ́mɔkekã ɛmɔ mvomsoɛ behyirehyire ɛmɔ nwo, ná ɛ́mɔbobɔ mbaeɛ bɛma ɛmɔ nwo, amaa ɛmɔate apɔ. Na teneneeniɛ mbaeɛ bɔ nu yɛ se ne, ɔkora yɔ nikyee biala.

¹⁷ Né Elia te sona kyɛ yɛ ala, na ɔbɔle mbaeɛ serɛserɛ kyɛ nnɛma esue tɔ, na esue andɔ aseɛ so alaa afoɛ nza ne bosome nzia.

¹⁸ Na afei ɔbɔle mbaeɛ bieku, na nyameɛso tɔle nzue, na aseɛ suli ye aleɛ.

¹⁹Nniɛma mɔ, sɛ ɛmɔ nu bie di nahorɛ ne nwo makyebu, ná ebie sa fa ye ba a,

²⁰ ɛ́mɔkaye kyɛ, ebiala bɔ ɔkɔfa bɔnefoɛ kofi ye makyebu atee so kosa kɔwa ne, okole ye kra kofi ewue nu, na ɔkɔkata bɔne pee so.