Read Sehwi 1 Yohane 5 Bible Online

1 Yohane 5 - Sehwi bible

1 Yohane 5

¹ Ebiala bɔ ode di kyɛ Yesu ole Kristo ne te Nyameɛ awa. Na ebiala bɔ okuro Baba ne dwirɛ ne, okuro Baa ne koso dwirɛ.

²Na sɛ yɛkuro Nyameɛ dwirɛ ná yɛdi ye ahyɛdeɛ so a, ɛhe yeɛ ɔmaa yɛnwu kyɛ yɛkuro Nyameɛ mma dwirɛ ɔ.

³ Sɛ yɛdi Nyameɛ ahyɛdeɛ so a yeɛ okyire kyɛ yɛkuro ye dwirɛ ɔ, na ye ahyɛdeɛ ne aso lilɛ koso nyɛ se.

⁴ Ofikyɛ nikyee biala bɔ Nyameɛ awo ye ne, odi wiase so ngonim, na yɛ gyidie yeɛ ole ngonim bɔ yɛfa yɛdi wiase so ne.

⁵Nwa yeɛ odi wiase so ngonim ɔ? Ye ole sona bɔ ode di kyɛ Yesu ole Nyameɛ Awa ne ɔ.

⁶Yesu Kristo yeɛ ole bɔ bafa nzue ne mogya[2] bali ye walɛ ne nwo adanzeɛ ne. Nna nzue ngome, na mmom nzue ne mogya. Na Sunzum ne yeɛ odi adanzeɛ ɔ, ofikyɛ Sunzum ne ole nahorɛ ne.

⁷ Adanzefoɛ nza yeɛ bɛwɔ berɛ ɔ:

⁸Sunzum ne, nzue ne, yeɛ mogya ne, na bɛ mmɛsa b’adanzeɛ ne te ko.

⁹ Na sɛ yɛde kuro sona adanzeɛ yɛto nu a, nzaade Nyameɛ adanzeɛ deɛ ne di mu tra so. Ofikyɛ ɛhe te Nyameɛ adanzeɛ bɔ wali wafa Ɔwa ne nwo ɔ.

¹⁰ Yiti ebiala bɔ ode Nyameɛ Awa ne di ne, ole sɔ adanzeɛ ne wɔ ye ahone nu. Nakoso ebiala bɔ onne Nyameɛ nni ne, ɔma Nyameɛ yɛ ngondomboniɛ, ofikyɛ onne adanzeɛ bɔ Nyameɛ wali wafa Ɔwa ne nwo nni.

¹¹ Adanzeɛ ne ɛhe: Nyameɛ ama yɛ daa ngoa, na sɔ ngoa ne wɔ Ɔwa ne anu.

¹² Yiti ebiala bɔ ode Baa ne di ne ole ngoa, nakoso bɔ onne Baa ne nni ne de, olle ngoa.

¹³ Mekyerɛ ɛhemɔ mebrɛ ɛmɔ bɔ ɛmɔde Nyameɛ Awa ne dumaa bedi ne, amaa ɛmɔanwu kyɛ ɛmɔle daa ngoa, na ɛmɔahɔ so bale Nyameɛ Awa ne dumaa bali.

¹⁴ Na anyelasoɛ bɔ yɛle wɔ ye nu ne ole kyɛ, sɛ yɛbisa nikyee biala kyɛbɔ ye pɛ te a, otie yɛ.

¹⁵Na sɛ yɛse kyɛ bɔ yɛbisa biala otie yɛ de a, nzaade yɛse kyɛ yɛ sa ahã nningyein bɔ yɛbisa ye ne dada.

¹⁶ Sɛ ebie nwu oliɛma kyɛ ɔyɔ bɔne bɔ ɔmva ye ngɔ ewue nu a, maa ɔbɔ mbaeɛ ɔma ye, na Nyameɛ kɔfa ye mbaeɛ ne aso kɔma ye ngoa. Mekyire bɛ bɔ bɛyɔ bɔne bɔ ɔmva bɛ ngɔ ewue nu ɔ. Nakoso bɔne bie wɔ berɛ bɔ ɔfa sona kɔ ewue nu ɔ, na ɛhe de mengyire kyɛ ɔbɔ ye nwo mbaeɛ.

¹⁷Bɔ ɔndengyɛ biala te bɔne, nakoso nna ye mukoraa yeɛ ɔfa sona kɔ ewue nu ɔ.

¹⁸ Yɛse kyɛ ebiala bɔ Nyameɛ awo ye ne, ɔnyɔ bɔne; na mmom bɔ Nyameɛ awo ye ne, ɔnea ye nwo so, na bɔnefoɛ ne mva ye sa nga ye.

¹⁹ Yɛse kyɛ yɛte Nyameɛ deɛ, yeɛ ewiase amukoraa wura bɔnefoɛ ne bo.

²⁰ Yɛsa yɛse kyɛ Nyameɛ Awa ne awa, na wabukye y’adwene nu maa yanwu nahorɛniɛ ne. Yɛne Ɔwa Yesu Kristo bɔ ɔte nahorɛniɛ ne atira abiɛngoɛ, na ye yeɛ ɔte nahorɛ Nyameɛ ne ɔne daa ngoa ne ɔ.

²¹ Me ngwadaa mɔ, ɛmɔhwe ɛmɔ nwo béfi mmosoen nwo.