Read Sehwi Maenbulɛfoɛ 10 Bible Online

Maenbulɛfoɛ 10 - Sehwi bible

Maenbulɛfoɛ 10

¹Abimɛlɛke wue asi ne, Tola bɔ ɔse ole Pua bɔ ye koso ɔse ole Dodo bɔ ofi Yisaka abusua kure nu ne, otuli ye nwo siele berɛ kyɛ ɔkɔpepɛ kole Yisrael. Samiri bɔ ɔwɔ Efraim mmokaa aseɛ so ne, berɛ yeɛ né Tola te ɔ.

²Obuli Yisrael maen ne afoɛ aburanyɔ ne nza. Afei owuli, na besiele ye wɔ Samiri.

³Tola wue asi ne, Gileadeniɛ Yari tuli ye nwo siele berɛ buli Yisrael maen ne afoɛ aburanyɔ ne nyɔ.

⁴Ye mma mmienzua te aburasa, na né bɛ nu biala le ye ti anwo afunum bɔ ɔtena so ɔ. Né bele nguro aburasa wɔ Gileade mbɔtam, bɔ ɔbaadwu ɛnɛ ye bɛfrɛ bɛ Yari nguro ɔ.

⁵Yari wuli na besiele ye wɔ Kamon.

⁶Yisraelfoɛ sa yɔle bɔ ɔte bɔne wɔ AWURADE nyunu ɔ. Bɛsɔnene Baal ne Astarote mɔ, Siria nyameɛ mɔ, Sidon nyameɛ mɔ, Moabo nyameɛ mɔ, Amonfoɛ nyameɛ mɔ, yeɛ Filistifoɛ nyameɛ mɔ. Yiti bɛyakyili AWURADE si lilɛ, na banzɔne ye.

⁷Ɔnate so ma AWURADE fɛle Yisrael so yaa paa, na ɔfale bɛ wurale Filistifoɛ ɔne Amonfoɛ sa.

⁸Bemiane Yisraelfoɛ nu, na bɛhyɛle bɛ so sɔ afoɛ ne. Yisraelfoɛ amukoraa bɔ né bɛwɔ asue Yɔɔdan si dɔ, wɔ Amorifoɛ aseɛ bɔ ɔwɔ Gileade so ne, Filistifoɛ hyɛle bɛ so afoɛ buru ne mmɔtwɛ.

⁹Amonfoɛ koso pɛle asue Yɔɔdan bɛhɔle ye si, na bɛfale koɛ bɛɛtetale Yuda, Benyamin yeɛ Efraim boso ama; na ɛhe mane Yisrael nwo hyerele ye paa.

¹⁰Yiti Yisraelfoɛ sũ frɛle AWURADE kyɛ, “Yayɔ bɔne yatia wɔ, ofikyɛ wɔ bɔ ɛte yɛ Nyameɛ ne, yayakyi wɔ si lilɛ yaaso Baal mɔ.”

¹¹Na AWURADE sele Yisraelfoɛ kyɛ, “Aso manne ɛmɔ mamvi Misraimfoɛ, Amorifoɛ, Amonfoɛ ne Filistifoɛ bɛ sa nu?

¹²Sidonfoɛ, Amalɛkefoɛ yeɛ Mayɔnfoɛ koso bɛhyɛle ɛmɔ so, ná ɛmɔsu bɛfrɛle me ne, nnele ɛmɔ mvili bɛ sa nu.

¹³Nakoso ɛmɔayakyi me si lilɛ baaso nyameɛ foforɛ biemɔ. Ye sɔ ti mengɔpepɛ mengole ɛmɔ ko.

¹⁴Nyameɛ mɔ bɔ ɛmɔafa ɛmɔ ti baawura bɛ bo ne, ɛmɔɔsu behyire bɛ maa bele ɛmɔ wɔ ɛmɔ anwokyere mmerɛ ye anu.”

¹⁵Na Yisraelfoɛ sele AWURADE kyɛ, “Yayɔ bɔne, yiti bɔ wɔ bɔbɔ ekuro biala, fa di yɛ. Nakoso, pepɛ de yɛ kekesaala ye!”

¹⁶Yiti begyili Amaenmaensofoɛ nyameɛ mɔ bɔ bɛwɔ bɛ berɛ ne beguale, na bɛsole AWURADE. Na Yisrael amaneɛnwunɛ ne yɛle AWURADE ahomete.

¹⁷Yeɛ Amonfoɛ yɛle koɛ nwo anwoboa, na bɛɛkyekyele b’asikyeleɛ wɔ Gileade. Yisraelfoɛ koso boale bɛ noa, na bɛɛkyekyele b’asikyeleɛ wɔ Misepa.

¹⁸Na Gileadefoɛ bɛ safohene nemɔ sisele bɛ nwo kyɛ, “Nwa yeɛ okoli moa kɔfa koɛ kɔɔteta Amonfoɛ ɔ? Sɔ sona ne yeɛ ɔkɔla Gileadefoɛ amukoraa bɛ noa ɔ.”