Read Sehwi Maenbulɛfoɛ 11 Bible Online

Maenbulɛfoɛ 11 - Sehwi bible

Maenbulɛfoɛ 11

¹Gileadeniɛ Yɛfeta bɔ oni te gyanderaniɛ ne, né ɔte koɛhonɛniɛ ahoneserɛniɛ. Yɛfeta ɔse ole Gileade.

²Gileade ne ɔye koso bɛwole mma mmienzua. Na ɔye mma mmienzua nemɔ nyini ne, betuli Yɛfeta befili awuro berɛ, na bɛhane kyɛ, “Yɛ ne wɔ ngɔhyɛ yɛ baba agyapadeɛ, ofikyɛ wɔ maame ngome.

³Yiti Yɛfeta nwati fili oliɛma nemɔ anwo ɔɔtenane Tobo aseɛ so. Na mmenia biemɔ bɔ benni dwirɛ ngɔ kuro so fale bɛ tena bɛɛbɔle Yɛfeta deɛ noa, bɔ né ɔne bɛ kɔbɔ apaa ɔ.

⁴Mmerɛ bie asi ne, Amonfoɛ fale koɛ bɛɛtetale Yisrael.

⁵Na Amonfoɛ fale koɛ bɛɛtetale Yisraelfoɛ ne, Gileade mbanyi bɛɛfale Yɛfeta befili Tobo aseɛ so bɛwale.

⁶Besele Yɛfeta kyɛ, “Bra baayɛ yɛ safohene, maa yɛ ne Amonfoɛ yɛho.”

⁷Nakoso Yɛfeta buale Gileade mbanyi nemɔ kyɛ, “Aso nna ɛmɔ komapɛ ye ala yeɛ ɛmɔpole me, ná ɛmɔfoane me befili me baba awuro ɔ? Nzu ati yeɛ ɛnɛ bɔ ɛmɔ nwo ahyere ɛmɔ ye, ɛmɔba me berɛ ɔ?”

⁸Na Gileade mbanyi sele Yɛfeta kyɛ, “Ɛhe ati yeɛ yasa yawa wɔ gya so ɔ, kyɛ ɛne yɛ hɔ ma yɛne Amonfoɛ yɛɛho, ná da yɛ Gileadefoɛ amukoraa yɛ noa.”

⁹Yɛfeta buale Gileade mbanyi nemɔ kyɛ, “Sɛ ɛmɔsa bɛfa me bɛkɔ me kuro maa me ne Amonfoɛ yɛkɔko, ná sɛ AWURADE fa bɛ wura me sa a, ye de ngɔla ɛmɔ noa.”

¹⁰Yeɛ Gileade mbanyi sele Yɛfeta kyɛ, “AWURADE yeɛ ɔte yɛ ne wɔ adanzeɛ ɔ: yɛkoli bɔ aha ne aso pɛpɛɛpɛ.”

¹¹Yiti Yɛfeta ne Gileade mbanyi nemɔ sili nu bɛhɔle, na Gileadefoɛ bɔle ye bɛ so panyi ne safohene. Na Yɛfeta fale ye dwirɛ amukoraa tole AWURADE nyunu wɔ Misepa.

¹²Afei Yɛfeta tuli ɛbɔfoɛ maa bɛhɔle Amonfoɛ hene berɛ beesele ye kyɛ, “Nzikyɛ dwirɛ yeɛ ɔwɔ me ne wɔ yɛ afia bɔ ye ti yeɛ ɛbaafa koɛ ɛtoa me maen ye?”

¹³Na Amonfoɛ hene buale Yɛfeta ɛbɔfoɛ nemɔ kyɛ, “Ofikyɛ Yisrael fili Misraim wale ne, oolele m’aseɛ bɔ ofi asue Anɔn ɔkwaadwu asue Yabɔko ɔne asue Yɔɔdan noa fili me sa nu. Yiti sɛ enguro wɔ nwo dwirɛ a, sa fa me nikyee ma me.”

¹⁴Yɛfeta sa tuli ɛbɔfoɛ maa bɛhɔle Amonfoɛ hene gya so

¹⁵beesele ye kyɛ, “Yɛfeta nwa nyoo: Yisrael amva Moabo aseɛ anaakyɛ Amonfoɛ aseɛ,

¹⁶na mmom Yisraelfoɛ fili Misraim bɛwale ne, bɛfale ɛserɛ ne aso beedwuli Ɛpo Kɔkorɛ ne noa, na bɛtoale so beedwuli Kadese.

¹⁷ Yeɛ Yisrael tuli ɛbɔfoɛ maa bɛhɔle Edom hene berɛ beesele ye kyɛ, ‘Maa yɛfa w’aseɛ ye aso yɛpɛ nu yɛhɔ’; nakoso Edom hene ambene so. Yisrael sa tuli ɛbɔfoɛ maa bɛhɔle Moabo hene berɛ, nakoso wambene so. Yiti Yisrael tenane Kadese.

¹⁸ Afei bɛtoale so bɛfale ɛserɛ ne aso, na bɛkondone bɛɛfale Edom aseɛ ne noa ɔne Moabo aseɛ ne noa. Beedwuli Moabo aseɛ ne eyia afiteleɛ so, na bɛkyekyele asikyeleɛ wɔ asue Anɔn si dɔ. Bamva Moabo aseɛ ne aso, ofikyɛ né asue Anɔn yeɛ ɔte Moabo ɛwɛen ɔ.

¹⁹ Afei Yisrael tuli ɛbɔfoɛ maa bɛhɔle Amorifoɛ hene Sihon bɔ né odi hene Hesebon ne berɛ; na Yisrael srɛle ye kyɛ, ‘Maa yɛfa w’aseɛ ye aso yɛpɛ nu yɛhɔ yɛ maen deɛ so.’

²⁰Nakoso Sihon wanne Yisrael wanni, yiti wamma ye ate maa wamva ye aseɛ ne aso. Na Sihon boaboale ye koɛhonɛfoɛ amukoraati noa. Bɛkyekyele asikyeleɛ wɔ Yahase, na bɛ ne Yisrael hone.

²¹Yeɛ AWURADE Yisrael Nyameɛ fale Sihon ne ye mmenia amukoraa wurale Yisrael sa, na Yisraelfoɛ lili bɛ so ngonim. Yiti Amorifoɛ bɔ bɛ yeɛ né bɛte maen ne anu ne, Yisrael fale b’aseɛ amukoraa.

²²Bɛtenane Amorifoɛ aseɛ ne amukoraati so fi asue Anɔn kɔpem asue Yabɔko, yeɛ afei fi ɛserɛ ne aso kɔpem asue Yɔɔdan.

²³Na afei, AWURADE Yisrael Nyameɛ ne lele aseɛ ne fili Amorifoɛ sa nu fa mane ye maen Yisrael. Aso ɛpena kyɛ ede aseɛ ne fi Yisraelfoɛ sa nu anaa?

²⁴Aso nna nikyee bɔ wɔ nyameɛ Kemose wafa wama wɔ ne yeɛ odi kyɛ ɛfa ɔ? Nikyee biala bɔ AWURADE yɛ Nyameɛ wali so ngonim wafa wama yɛ ne, aso nna yɛ yeɛ odi kyɛ yɛfa ɔ?

²⁵ Sipore awa Balake bɔ né ɔte Moabo hene ne, aso ɛte paa tra ye? Aso ɔfale ye dwirɛ wale Yisrael so le, anaa ɔfale koɛ ɔtoale Yisrael le?

²⁶Afoɛ ɛyaa nza ɛhe yeɛ Yisrael atena Hesebon ne ye nwo nguraa mɔ nu, Aroye ne ye nwo nguraa mɔ nu, ɔne asue Anɔn noa nguro amukoraa nu ɔ. Nzu ati yeɛ sɔ mmerɛ ne, ɛmɔanne aseɛ ne bamvi bɛ sa nu ɔ?

²⁷Nna me yeɛ mayɔ wɔ tɛɛ ɔ, na mmom wɔ yeɛ ayɔ me tɛɛ bɔ ɛfa koɛ batoa me ɔ. AWURADE bɔ ɔte ndɛenbualɛniɛ ne, ɛnɛ okohyire Yisraelfoɛ ne Amonfoɛ bɛ nu horɛ bɔ ye dwirɛ yɛ fɛ ɔ.”

²⁸Nakoso Yɛfeta ngraa bɔ ɔmaa bɛfa bɛɛmane Amonfoɛ hene ne, wamva wanyɛ dwirɛ.

²⁹Yeɛ AWURADE Sunzum kanyane Yɛfeta, na Yɛfeta ɔɔpɛle nu Gileade ne Manase. Ɔtoale so hɔle Misepa bɔ ɔwɔ Gileade ne. Ofili Misepa bɔ ɔwɔ Gileade, na ɔpɛle nu fale koɛ ɔɔtoale Amonfoɛ.

³⁰Na Yɛfeta hyɛle AWURADE bɔ kyɛ, “Sɛ ɛfa Amonfoɛ wura me sa a,

³¹ye de sɛ medi Amonfoɛ so ngonim meyie ná mesa meba a, sona bɔ okofi m’awuro kofite kooyia me ne, ɔkɔyɛ AWURADE deɛ, na ngɔfa ye ngɔbɔ ɛyeralɛ afɔleɛ.”

³²Yiti Yɛfeta pɛle nu hɔle Amonfoɛ berɛ ɔfale koɛ ɔɔtetale bɛ, na AWURADE fale bɛ wurale ye sa.

³³Ohuhuni bɛ pasaa wɔ nguro aburanyɔ bɔ bɛwɔ ofi Aroye ɔkwaadwu Minite mbɔtam nemɔ aso ne, maa oodwuli Abel Keramim. Yiti Yisraelfoɛ lili Amonfoɛ so ngonim.

³⁴Afei Yɛfeta sa wale ye awuro wɔ Misepa. Na edwirɛ nwanwa! Ɔwa brasua ne le akasaa ne abilie fitele kyɛ ɔbaayia ye! Né odi ye bahorɛ. Né olle baa bienzua anaa baa brasua ko boka ye so.

³⁵ Yɛfeta nwuni ye pɛ, osunzuale ye bɔbɔ ye ndaadeɛ nu, na osele kyɛ, Yieee, mma, ate m’ahone! Afa edwirɛ awura me paa! Ofikyɛ mahyɛ AWURADE bɔ, na mengɔhora mengɔhwe mengosa.”

³⁶Na osele ɔse kyɛ, “Baba, sɛ ahyɛ AWURADE bɔ de a, ye de kekesaala ye bɔ AWURADE amaa atɔ wɔ pɔfoɛ Amonfoɛ so wereɛ ye, kyɛbɔ ato wɔ noa nu tui aha ne, fa sɔ ala yɔ me.”

³⁷Na ɔtoale so sele ɔse kyɛ, “Mesrɛ wɔ nikyee ko, na yɔ ma me: Ma me ate bosome nyɔ maa ngongyini mmokaa nemɔ aso, ná me ne me mmango mɔ yɛɛbɔ awuye, ofikyɛ mékɔ wue bɔ ndɛte ababunu bɔ onnwuni biaa le ɔ.”

³⁸Yɛfeta buale ye kyɛ, “Atee la ase.” Na ɔmane ye ate bosome nyɔ. Yiti ɔne ye mmango mɔ bɛhɔle mmokaa nemɔ aso, na bɛɛbɔle awuye wɔ ye ababunuyɛlɛ, bɔ wannwu biaa le, bɔ ɔfa kɔ wue ne anwo.

³⁹Bosome nyɔ ne ayieleɛ, osa wale ye baba berɛ, na ye baba fale ye yɔle nikyee bɔ wahyɛ ye nwo bɔ ne. Né onnwuni biaa le. Yiti ɛhe mane amammerɛ bie ɔɔlale berɛ mane Yisraelfoɛ kyɛ,

⁴⁰afoɛ biala, Yisrael mmrasua betu ɛlɛnna besie berɛ bekosu Gileadeniɛ Yɛfeta ɔwa brasua ne.