Read Sehwi Maenbulɛfoɛ 12 Bible Online

Maenbulɛfoɛ 12 - Sehwi bible

Maenbulɛfoɛ 12

¹ Efraimfoɛ frɛfrɛle bɛ koɛhonɛfoɛ, na bɛpɛle nu bɛhɔle Safon beesele Yɛfeta kyɛ, “Nzu ati yeɛ ɛpɛle nu ɛne Amonfoɛ bɛɛhone, ná amvrɛ yɛ maa yɛne wɔ angɔ ɔ? Yɛkɔyera wɔ sua ne yɛkɔfra wɔ!”

²Yɛfeta buale bɛ kyɛ, “Amonfoɛ bɔ né bɛhyɛ yɛ so yeayea ne, me ne me mmenia mɔ yɛne bɛ nyane ngondii. Nakoso mvrɛle ɛmɔ ne, ɛmɔambepɛ banne me bamvi bɛ sa nu.

³Na nwuni kyɛ ɛmɔngɔpepɛ bengole me ne, mvale me ngoa ndole serewa, mbɛle ɛwɛen ne mvale koɛ ngɔndetale Amonfoɛ, na AWURADE fale bɛ wurale me sa. Nzu ati yeɛ ɛnɛ ye de ɛmɔawa me so bɔ ɛmɔ ne me baaho ye?”

⁴Yeɛ Yɛfeta boaboale Gileade koɛhonɛfoɛ amukoraa noa, na ɔne Efraim bɛɛhone, ofikyɛ Efraimfoɛ sele kyɛ, “Ɛmɔ Gileadefoɛ, ɛmɔte mmenia bɔ ɛmɔabɔ ko bafi Efraim ne Manase ɔ.” Na Gileadefoɛ lili Efraim so ngonim.

⁵Yeɛ Gileadefoɛ hɔle asue Yɔɔdan apɛleɛ nemɔ beegyinagyinane berɛ, kyɛbɔ Efraimfoɛ bengonya ate bɛngɔnwati ɔ. Na Efraimfoɛ bɔ bɛnwati ne, sɛ bɛ nu bie ka kyɛ, “Ɛ́mɔma mbɛ asue ne” a, né Gileadefoɛ babisa ye kyɛ, “Ɛte Efraimniɛ anaa?” Na sɛ obua kyɛ “Daabi” a,

⁶né base ye kyɛ, nzaade ka ‘Hyibolɛte’ maa yɛtie. Ɔnate kyɛ ɔngora nga ‘Hyibolɛte’ yé ne ati, ɔka ye ‘Sibolɛte’. Sɛ ɔba ye sɔ a, Gileadefoɛ kye sɔ sona ne beku ye wɔ asue Yɔɔdan apɛleɛ berɛ. Efraimfoɛ apee aburanna ne nyɔ yeɛ bɛtotɔle sɔ mmerɛ ne ɔ.

⁷Yɛfeta buli Yisrael maen ne afoɛ nzia. Afei Yɛfeta wuli, na besiele ye wɔ ye kuro wɔ Gileade.

⁸Yɛfeta wue asi ne, Yibesan bɔ ofi Betlehem yeɛ obuli Yisrael maen ne ɔ.

⁹Né ole mmaa mmienzua aburasa ne mmaa mmrasua aburasa. Ye mma mmrasua aburasa nemɔ, ɔfale bɛ mane ɛwɔfoɛ mɔ bɔ nna ye abusuafoɛ ahɔ ɔ agyaa. Yeɛ ɔɔpenane ndaluwa aburasa bɔ nna ye abusuafoɛ ahɔ ɔ mane ye mma mmienzua nemɔ gyigyale bɛ. Yibesan buli Yisrael maen ne afoɛ nzoo.

¹⁰Afei Yibesan wuli, na besiele ye wɔ Betlehem.

¹¹Yibesan wue asi ne, Sebulɔnniɛ Elon yeɛ obuli Yisrael maen ne ɔ, na obuli Yisrael maen ne afoɛ buru.

¹²Afei Sebulɔnniɛ Elon wuli, na besiele ye wɔ Ayalɔn, wɔ Sebulɔn aseɛ so.

¹³Elon wue asi ne, Piratonniɛ Hilel awa Abedon yeɛ obuli Yisraelfoɛ maen ne ɔ.

¹⁴Né ole mmaa mmienzua aburanna ne nnomaa mmienzua aburasa. Sɔ mmenia aburasoo ne, né bɛ nu biala le ye ti anwo afunum bɔ ɔtena so ɔ. Abedon buli Yisraelfoɛ maen ne afoɛ mmɔtwɛ.

¹⁵Piratonniɛ Hilel awa Abedon wuli, na besiele ye wɔ Piraton, wɔ Efraim aseɛ so, wɔ Amalɛkefoɛ mmokaa aseɛ ne aso.