Read Sehwi Maenbulɛfoɛ 14 Bible Online

Maenbulɛfoɛ 14 - Sehwi bible

Maenbulɛfoɛ 14

¹Ɛlɛho bie, Samson hɔle Timina, na onwuni Filistiniɛ braa bie wɔ berɛ.

²Yiti osa wale awuro ne, ɔfa tole ye baba ne ye maame nyunu kyɛ, “Manwu Filistiniɛ brasua bie wɔ Timina, yiti ɛmɔɔgya ye bɛma me.”

³Nakoso ye baba ne ye maame buale ye kyɛ, “Aso w’abusua nu, anaakyɛ yɛ maen ye anu amukoraati, brasua biala ɔnne nu, bɔ yiti ɔsɛ kyɛ ɛkɔ Filistifoɛ bɔ bɛmbɛ bɛ bienzua ye mɔ anu ekogya braa ɔ?” Nakoso Samson sele ye baba kyɛ, “Kogya ye ma me, ofikyɛ ye yeɛ mekuro ye ɔ.”

⁴Né ye baba ne maame bɛnze kyɛ bɔ ɔkɔ so ne ofi AWURADE ɔ; ofikyɛ né AWURADE fa sɔ atee ne aso ɔfa koɛ kɔteta Filistifoɛ. Sɔ mmerɛ ne, né Filistifoɛ di Yisrael so.

⁵Yeɛ Samson ne ye baba ne ye maame bɛhɔle Timina. Na Samson dwuli Timina bobe boo nemɔ anu ne, mvum nu, gyata akrɔngrɔma bie pole, na ɔwale Samson so.

⁶AWURADE Sunzum wale ye so, na ole ye sa mbaen tetele gyata ne anu pasaa kyɛ wanya abɔngye ba bie bɔ ɔtete ye nu ɔ. Nakoso wanga bɔ wayɔ ne wangyire ye baba anaa ye maame.

⁷Afei Samson hɔle ɔne braa ne beelili ngɔmɔ, na ye nye gyele braa ne anwo.

⁸Na mmerɛ kãa pɛle nu ne, Samson sa hɔle kyɛ ɔkwaagya braa ne. Atee nu, ɔmakyele ɔɔneane gyata ne fuin, na onwuni kyɛ gyata fuin ne alɔ woɛ, na né ɛwommaa wɔ nu mitimiti.

⁹Opiane woɛ ne guale ye sa nu, na ɔkɔ ne, né odi kɔ. Oodwuli ye baba ne ye maame nwo berɛ ne, ɔmane bɛ bie maa belili. Nakoso wanga wangyire bɛ kyɛ ɔnyene woɛ ne wɔ gyata fuin nu.

¹⁰Ye baba hɔle braa ne awuro berɛ, na Samson tole poen wɔ berɛ kyɛbɔ kuro berɛ mmerandeɛ bɛyɔ ne ala.

¹¹Mmenia ne nwuni ye ne, bɛmane mmerandeɛ aburasa bɛɛbokale ye so.

¹²Samson sele bɛ kyɛ, “Ɛ́mɔma mva anyandera he ndo ɛmɔ nyunu: Sɔ ɛlɛsoo bɔ yɛfa yɛto poen ye anu, sɛ ɛmɔkora bekyire me ye bo a, ye de ngɔma ɛmɔ nwera ndaadeɛ aburasa, ɔne ndaadeɛ bɔ bewura bɛkɔ dwaabɔlɛ bo ɔ aburasa.

¹³Nakoso sɛ ɛmɔangora bangyire me ye bo a, ye de ɛmɔ koso ɛmɔkɔma me nwera ndaadeɛ aburasa, ɔne ndaadeɛ bɔ bewura bɛkɔ dwaabɔlɛ bo aburasa.” Na besele ye kyɛ, “Fa w’anyandera ne to dwaa maa yɛtie.”

¹⁴Samson sele bɛ kyɛ, “Nana Nyameɛ abɔdeɛ bie bɔ ɔwɔ berɛ ɔ, ɔkye abɔdeɛ mɔ di, nakoso benyane nikyee bɔ bedi ɔ befili ye nu. Abɔdeɛ anwoserɛniɛ ne, benyane nikyee menemene befili ye nu. Nzikyɛ ɔ” Nakoso ɛlɛsa mumua, bangora bangyire anyandera ne abo.

¹⁵Ye ɛlɛnna[4] ne aso, besele Samson aye ne kyɛ, “Dɛfɛdɛfɛ ehu maa ohyire yɛ anyandera ne abo. Anyɔ sɔ a, yɛkɔfa see yɛkɔyera wɔ ne wɔ baba awuro. Ɛtole wɔ sa frɛle yɛ wa kyɛ ɛbaafa yɛ to kerɛ nu anaa?”

¹⁶Yiti Samson aye ne sũ guale ye so kyɛ, “Ɛpɔ me; enguro me koraa. Abu me mmenia mɔ anyandera, nakoso angyire me ye bo.” Na Samson buale ye kyɛ, “Nea, me baba ne me maame po, ngyirele bɛ ye bo. Nzu ati yeɛ odi kyɛ mekyire wɔ ye bo ɔ?

¹⁷Braa ne sũ guale Samson so ɛlɛsoo bɔ bɛwɔ poentolɛ bo ne amukoraa. Na ɔnate kyɛ né odwane Samson nwo ne ati, ohyirele ye anyandera ne abo ɛlɛsoo ne aso. Braa ne hɔle oohyirele anyandera ne abo hyirele ye kuro ama nemɔ.

¹⁸Yiti ye ɛlɛsoo ne aso, kuro berɛ mmienzua sele Samson koraka yeɛ eyia kwaatɔ ɔ kyɛ, “Nzikyɛ yeɛ ɔte menemene tra woɛ ɔ? Nzikyɛ yeɛ ye nwo yɛ se tra gyata ɔ?” Na Samson buale bɛ kyɛ, Sɛ ɛmɔamva me bɔbɔ me ye so a, ahaa ɛmɔande anyandera ne abo.”

¹⁹Yeɛ AWURADE Sunzum wale Samson so, na osili nu hɔle Asekelɔn. Ohuni kuro berɛ mmienzua aburasa. Opuropurole bɛ ndaadeɛ yɛle koɛ nu nzesadeɛ. Na ndaadeɛ bɔ bewura bɛkɔ dwaabɔlɛ bo ne, ɔfa brɛle bɛ bɔ behyirele anyandera ne abo ne. Afei ole ɛyaa piri sa hɔle ye baba kuro.

²⁰Na bɛfale Samson aye ne bɛmane obiɛngo bɔ né ɔte ye agyaa nu adamvoa ne.