Read Sehwi Maenbulɛfoɛ 16 Bible Online

Maenbulɛfoɛ 16 - Sehwi bible

Maenbulɛfoɛ 16

¹Ɛlɛho bie, Samson hɔle Gasa. Onwuni brasua gyanderaniɛ bie wɔ berɛ, na ɔne ye bɛɛlale.

²Bɛbɔle Gasafoɛ amaneɛ kyɛ, “Samson awa wa.” Yiti bɛpɛle sua ne anwo beyiale, yeɛ bɛtetɛle ye wɔ kuro berɛ pambim ne anu kɔngɔen ne amukoraa. Bɛyɛle konn kɔngɔen ne amukoraa na bɛdwenene ye nwo kyɛ, “Ɛmɔma yɛnwondɛ maa aleɛ hye, ná yahu ye.”

³Nakoso Samson lale berɛ maa bebuli aleɛ nu. Bebuli aleɛ nu ne, odwɔsole, na kuro ne pambim anoa nemɔ, ye bonima nyɔ nemɔ, ɔne ye mbuna ne amukoraa, otuli bɛ bo. Ɔfa tole ye kɔme anwo, na ɔsoale hɔle bokaa bɔ ɔwɔ Hebron ndendeneɛ so ne ti afia.

⁴Ɛhe asi ne, oohurole braa bie bɔ ye kuro wɔ Soreke bɔnza ne anu ɔ. Bɛfrɛ ye Delila.

⁵Filistifoɛ mbanyi hɔle braa ne berɛ beesele ye kyɛ, “Dɛfɛdɛfɛ ye ná pena nikye horɛ bɔ ɔmaa ye nwo yɛ se sɔa ne, ɔne atee bɔ yɛkɔfa so yɛkoli ye so ngonim, amaa ɔnate so yafa nyamaa yakyekye ye yabrɛ ye ase. Sɛ ɛyɔ sɔ ma yɛ a, yɛ nu biala kɔma wɔ ɛdwetɛ apee ko ɛyaa ko.”

⁶Yiti Delila bisale Samson kyɛ, “Mesrɛ wɔ, nzikyɛ yeɛ ɔmaa wɔ nwo yɛ se paa sɔa ne? Ka kyire me. Ɔkɔyɛ sɛɛ né ebie ahora afa nyamaa wakyekye wɔ, ná wabrɛ wɔ ase?”

⁷Samson buale ye kyɛ, “Sɛ bɛfa nyamaa monɛ nzoo bɔ ɔwwole bɛkyekye me a, ngɔyɛ mmerɛ ná mayɛ kyɛ kuro sona biala.”

⁸Yiti Filistifoɛ mbanyi nemɔ fale nyamaa monɛ nzoo bɔ ɔwwole ɔ bɛbrɛle Delila, na ɔfa kyekyele Samson.

⁹Sɔ mmerɛ ne, né mmenia nemɔ baatetɛ wɔ pumbu nu. Na Delila sele Samson kyɛ, “Samson, Filistifoɛ awa wɔ so oo!” Nakoso Samson tetele nyamaa ne anu kyɛ atendirehuo bɔ waha see ɔ. Yiti ye anwoserɛ anwo mvealeɛ dwirɛ ne, bannwu ye.

¹⁰Afei Delila sele Samson kyɛ, “Agoro me nwo, yeɛ apɛ ngondombo ahyire me. Mesrɛ wɔ, kyire me nikyee bɔ bɛkɔhora bɛkɔfa bɛkɔkyekye wɔ ɔ.”

¹¹Samson buale ye kyɛ, “Sɛ bɛfa findima monɛ bɔ bɛffa bɛyyɔle hwee le bɛkyekye me a, ye de ngɔyɛ mmerɛ, ná mayɛ kyɛ kuro sona biala.”

¹²Yiti Delila fale findima monɛ kyekyele Samson, na osele ye kyɛ, “Samson, Filistifoɛ awa wɔ so oo!” (Sɔ mmerɛ ne, né mmenia bɔ bɛtetɛ ye ne, baafea pumbu nu.) Nakoso Samson tetele findima ne anu fili ye sa kyɛ gyese bie.

¹³Yeɛ Delila sele Samson kyɛ, “Agoro me nwo, yeɛ apɛ ngondombo ahyire me maa waadwu bekye. Kyire me nikyee bɔ bɛkɔhora bɛkɔfa bɛkɔkyekye wɔ ɔ.” Na obuale ye kyɛ, “Sɛ ɛfa me ti nwiaa mbɛsɛmbɛsɛ nzoo ne fra eduku ɛnwo, ná ɛfa buralɛ mia nu dweredwere a, ngɔyɛ mmerɛ ná mayɛ kyɛ kuro sona biala.”

¹⁴Samson lale, na Delila sɔle ye ti nwiaa mbɛsɛmbɛsɛ nzoo ne anu frale eduku nwone, na ɔfale buralɛ miane nu dweredwere. Na osele ye kyɛ, “Samson, Filistifoɛ awa wɔ so oo!” Nakoso Samson dwɔso fili nnaa nu, otuli buralɛ ne, na ɔsangyele eduku bɔ wafa wafra ye ti nwiaa mbɛsɛmbɛsɛ wanwo ne.

¹⁵Yeɛ Delila sele ye kyɛ, “Aso ede di kyɛ ekuro me, wɔ aberɛ bɔ enguro me mvi w’ahone nu ɔ? Agoro me nwo pɛen nza ɛhe, na nikyee bɔ ɔmaa wɔ nwo yɛ se paa sɔa ne, anga angyire me.”

¹⁶Delila fale edwirɛ ne dwanene Samson nwo daa biala, na ɔhɔle so hale ye adwene alaa maa yiti edwirɛ ne yɛle Samson ahomete.

¹⁷Na Samson hane ye mvealeɛ nu dwirɛ ne amu hyirele ye kyɛ, “Me ti ne, bɛttetele ye le, ofikyɛ nde nasiriteniɛ ma Nyameɛ fi me maame kunu. Sɛ bɛtete me ti a, m’anwoserɛ ne amukoraa kotu komini, ngɔyɛ mmerɛ ná mayɛ kyɛ kuro sona biala.”

¹⁸Delila nwuni kyɛ Samson aha ye mvealeɛ nu dwirɛ ne amukoraa wahyire ye ne, ɔsomane maa bɛɛfrɛle Filistifoɛ mbanyi nemɔ bɛbrɛle ye, na ɔbɔle bɛ amaneɛ kyɛ, “Afei de ɛmɔbra, ofikyɛ wabukye ye mvealeɛ nu dwirɛ ne amukoraa so wahyire me.” Yiti Filistifoɛ mbanyi ne amukoraati wale Delila berɛ, na né betiratira b’esikaa ne.

¹⁹Delila fale Samson ti tole ye sɔ so maa ɔlafele, na ɔfrɛle biaa bie maa ɔɔpoane ye ti nwiaa mbɛsɛmbɛsɛ nzoo ne. Na Samson hyɛle ye bo yɛle mmerɛ, na ye anwoserɛ tu minini.

²⁰Na afei Delila sele kyɛ, “Samson, Filistifoɛ nemɔ awa wɔ so oo!” Yeɛ Samson fili nnaa nu dwɔsole, na ɔyɛle ye adwene kyɛ, “Ngofite ná mawoso me nwo male me nwo kyɛbɔ meyɔ ye daa ne.” Nakoso né Samson nze kyɛ AWURADE aye ye sa ye bo ɔ.

²¹Yiti Filistifoɛ hyele ye, na betutuli ye nye. Bɛfale ye bɛhɔle Gasa, na bɛfale kɔɔbere ngɔnzɔngɔnzɔ beguale ye. Na ɔla kuku nu berɛ ne, né ye yeɛ opia ngaen bɔ bɛfa beti aburoo ɔ.

²²Nakoso ye ti nwiaa bɔ bɛpoane ne, osa hyele ye bo fuli.

²³Afei Filistifoɛ mbanyi bɔle dwaa kyɛ bɛbɔ afɔleɛ kandinga bɛma bɛ nyameɛ Dagɔn, ná bɛgye bɛ nye; ofikyɛ bɛhane kyɛ, “Yɛ nyameɛ yeɛ wafa yɛ pɔfoɛ Samson wawura yɛ sa ɔ.”

²⁴Na mmenia ne nwuni Samson ne, bɛyɛle bɛ nyameɛ ne ayɛ ofikyɛ bɛhane kyɛ, “Yɛ pɔfoɛ bɔ wahũ yɛ nu pee bɔ ɔbɔ yɛ maen ne, yɛ nyameɛ afa ye awura yɛ sa.”

²⁵Na mmerɛ bɔ bɛ nye gyele paa ne, bɛhane kyɛ, “Ɛ́mɔfrɛ Samson maa ɔgyegye yɛ nye.” Yiti bɛɛfale Samson befili kuku nu bɛwale, ná ɔgyegyele bɛ nye. Bɛmane Samson ogyinane bonima nemɔ b’afia;

²⁶na osele akwadaa bɔ otira ye sa okyire ye ate ne kyɛ, “Bonima mɔ bɔ betira sua ne anu ne, maa ngɔnzɔ nu ná ngisa bɛ.”

²⁷Né mmienzua ne mmrasua ayi sua ne anu tɛkyɛ, bɔ né Filistifoɛ mbanyi amukoraa wɔ berɛ bie ɔ. Né mmienzua ne mmrasua kɔyɛ apee nza begua sua ne aso nekaa bɔ basamo so ne, bɔ bɛnea Samson angorɛ ne bie ɔ.

²⁸Yeɛ Samson sũ frɛle AWURADE kyɛ, “AWURADE Nyameɛ, kaye me ná ma me anwoserɛ sɔ mmerɛ ye ala angome, O Nyameɛ; na mandɔ Filistifoɛ so wereɛ ɔnate me nye nyɔ bɔ batutu ne ati.”

²⁹Yiti bonima nyɔ bɔ bɛwɔ afia paa bɔ betira sua ne anu ne, Samson le ye anwoserɛ amukoraa tirale nu. Ɔfale ye sa famaa fuale ko, yeɛ ɔfale bɛen ne koso fuale ko.

³⁰Na Samson sele kyɛ, “Maa me ne Filistifoɛ yɛwu!” Ole ye anwoserɛ amukoraati piane bonima nemɔ; na sua ne bu guale mbanyi ne mmenia bɔ né bayia berɛ ne amukoraati so. Yiti mmenia bɔ ohuni bɛ wɔ ye wue nu ne, bɛsone bɛtra mmenia bɔ ohuni bɛ mmerɛ bɔ né ɔte ase ɔ.

³¹Na oliɛma mmienzua mɔ ne ye abusuafoɛ amukoraa bɛɛfale ye fuin beesiele ye wɔ ye baba Manoa asieleɛ nu, wɔ Sora ne Esetao b’afia. Samson buli Yisrael maen afoɛ aburanyɔ.