Read Sehwi Maenbulɛfoɛ 17 Bible Online

Maenbulɛfoɛ 17 - Sehwi bible

Maenbulɛfoɛ 17

¹Né biaa bie wɔ berɛ bɔ bɛfrɛ ye Mika. Né ɔte Efraim mmokaa aseɛ ne aso.

²Osele oni kyɛ, “Ɛdwetɛ apee ko ɛyaa ko bɔ ebie wuale fili wɔ berɛ, bɔ ɛwale ye nwo amoen maa me bɔbɔ ndele me so anu ne, sɔ ɛdwetɛ ne, ɔwɔ me berɛ. Me yeɛ mvale ɔ, nakoso afei de ngosa ngɔfa ngɔma wɔ.” Na ye maame sele kyɛ, “AWURADE, yira mma ye!”

³Yeɛ Mika sa fale ɛdwetɛ apee ko ɛyaa ko ne brɛle ye maame; na ye maame sele kyɛ, “Ngyi mma ye gya nu yeɛ métu ɛdwetɛ ne mesie berɛ mema AWURADE ɔ, kyɛ béhuro ye bɛ́fa bɛ́yɔ buralɛ amoen.”

⁴Na osa fale ɛdwetɛ ne mane ye maame ne, braa ne yele nu ɛyaa nyɔ mane ɛdwetɛ dwumvoɛ maa ohurole ye yɔle buralɛ amoen. Né amoen ne gyi Mika awuro.

⁵Sɔ biaa Mika he, né ole amoen asɔneyɛɛ. Ɔpale ɔsɔfo ataadeɛ, na ɔyɔle abusua amoen. Ɔhyɛle ɔwa bienzua ko sɔfo maa ɔyɛle ye sɔfo.

⁶ Sɔ mmerɛ ne, né ɛhene biala nne Yisrael, yiti né ebiala yɔ bɔ okuro ɔ.

⁷Né aberandeɛ bie fi Betlehem bɔ ɔwɔ Yuda. Ofi Yuda abusua nu. Ɔte Lewiniɛ bɔ waatena berɛ ɔ.

⁸Sɔ aberandeɛ ne tu fili Betlehem bɔ ɔwɔ Yuda, kyɛ kuro biala bɔ okonya ye ne, ɔkɔtena so. Ye ateetulɛ ne anu, oodwuli Mika awuro wɔ Efraim mmokaa aseɛ ne aso.

⁹Mika bisale ye kyɛ, “Efi ni yeɛ ɛba ye?” Obuale kyɛ, “Nde Lewiniɛ bɔ mvi Betlehem bɔ ɔwɔ Yuda, na kuro biala bɔ ngonya ye ne, ngɔtena so.”

¹⁰Yeɛ Mika sele ye kyɛ, “Tena m’awuro wa. Maa mva wɔ nyɛ me baba ne me sɔfo, na ngɔma wɔ ɛdwetɛ buru afoɛnoa biala, yeɛ ndaadeɛ ne wɔ noa aleɛ.”

¹¹Lewiniɛ aberandeɛ ne penene so kyɛ ɔne Mika kɔtena, na Mika fale ye yɛle kyɛ ye bɔbɔ ye mma nemɔ anu ko.

¹²Yiti Mika hyɛle Lewiniɛ aberandeɛ ne sɔfo maa ɔɔyɛle ye sɔfo. Né ɔte Mika awuro berɛ.

¹³Na Mika sele kyɛ, “Afei de, mese kyɛ AWURADE kɔmaa okoyie me yé, ofikyɛ manya Lewiniɛ maa waayɛ me sɔfo.”