Read Sehwi Maenbulɛfoɛ 21 Bible Online

Maenbulɛfoɛ 21 - Sehwi bible

Maenbulɛfoɛ 21

¹Né Yisraelfoɛ ata ndaen wɔ Misepa kyɛ, “Yɛ nu biala ngɔfa ɔwa brasua ngɔma Benyaminniɛ agyaa.”

²Yisraelfoɛ hɔle Betel. Bɛtenane Nyameɛ nyunu wɔ berɛ maa oodwuli nɔsoa, na besuni hahii.

³Bɛhane kyɛ, “Ao AWURADE Yisrael Nyameɛ, ɔwale ye sɛ bɔ ɛnɛ ye de yɛpena abusua kure ko a, yɛnnwu ye wɔ Yisrael ɔ?”

⁴Ye alehyeleɛ ne, maen ne dwɔsole ngyerɛmɔ tutuutu. Besili afɔleɛ bokyea wɔ berɛ, na bɛbobɔle naen yeralɛ afɔleɛ ne asomdwee afɔleɛ.

⁵Yeɛ Yisraelfoɛ bisale kyɛ, “Yisrael mmusua kure ne, bɛ nu beni yeɛ dwaa bɔ yɛbɔle wɔ AWURADE nyunu ne, wamma ye bo bie ɔ?” Ofikyɛ né bata ndaen bato berɛ kyɛ, ebiala bɔ wamma AWURADE nyunu wɔ Misepa ne, odi kyɛ beku ye.

⁶Nakoso Yisraelfoɛ nwuni b’eliɛma mɔ Benyaminfoɛ anwumvoin, na bɛhane kyɛ, “Abusua kure ko de, ɛnɛ wabɔ wɔ Yisrael.

⁷Bɛbɔ baha ye, ɔkɔyɛ sɛɛ né yanya mmraa yamaa bagyigya, wɔ aberɛ bɔ yafa AWURADE yata ndaen kyɛ yɛngɔfa yɛ mma mmrasua ngɔma Benyaminfoɛ agyaa ɔ?”

⁸Na bebisale kyɛ, “Yisrael mmusua kure ne, aso nu bie wamma AWURADE nyunu wɔ Misepa anaa?” Benwuni kyɛ ebiala wamvi Yabese Gileade wamma dwaabɔlɛ ne bie wɔ asikyeleɛ ne anu.

⁹Ofikyɛ bɛhale mmenia bɔ bayia nu berɛ ne, né Yabese Gileadeniɛ biala nne berɛ bie.

¹⁰Yiti maen ne somane koɛhonɛfoɛ apee buru ne nyɔ maa bɛhɔle berɛ, na bɛhyɛle bɛ kyɛ, “Ɛ́mɔfa ngrandɛ beehuhu Yabese Gileadefoɛ; mmrasua ne ngwandaa koso boka so.

¹¹Ɛhe yeɛ odi kyɛ ɛmɔyɔ ɔ: bienzua biala, yeɛ brasua biala bɔ wanwu biaa le ne, odi kyɛ ɛmɔku ye.”

¹²Benyane ndaluwa bɔ bennwuni biaa le ɔ ɛyaa nna wɔ Yabese Gileadefoɛ nu, na bɛfale bɛ bɛwale asikyeleɛ ne anu berɛ wɔ Silo, bɔ ɔwɔ Kanaan aseɛ so.

¹³Afei Yisraelfoɛ amukoraa bɛfale ngraa bɛɛmane Benyaminfoɛ bɔ baatena Rimon nyɔbotaen ne anwo ne kyɛ, afei de bɛ ne bɛ kɔtena asomdwee nu.

¹⁴Sɔ mmerɛ ne, Benyaminfoɛ sale bɛ si bɛwale, na Yabese Gileade mmrasua bɔ Yisraelfoɛ yakyili bɛ maa benyane bɛ ti bedidili nu ne, bɛfale bɛ bɛmane Benyaminfoɛ, nakoso banzo Benyaminfoɛ ti.

¹⁵Yisraelfoɛ nwuni Benyaminfoɛ anwumvoin, ofikyɛ né AWURADE ama Yisrael mmusua kure nemɔ anu atete.

¹⁶Yiti Yisrael mbanyi bisale kyɛ, “Benyaminfoɛ ngaa bɔ baha ye, yɛkɔyɛ sɛɛ né yanya mmraa maa bagya, ofikyɛ brasua biala wanga wɔ Benyaminfoɛ nu.”

¹⁷Na bebuale kyɛ, “Benyaminfoɛ bɔ banya bɛ ti badidi nu ne, odi kyɛ benya bɛ bosofoɛ, amaa ɔnate so abusua kure ko boso wannua wɔ Yisrael.

¹⁸Nakoso yɛngɔhora yɛngɔfa yɛ mma mmrasua yɛngɔma bɛ agyaa.” Ofikyɛ né Yisraelfoɛ bali moa bata ndaen kyɛ, “Ebiala bɔ ɔkɔma Benyaminniɛ braa maa okogya ne, musue to ye.”

¹⁹Yiti bɛhane kyɛ, “AWURADE afoɛnoa aluolue ne, bekoli ye wɔ Silo bɔ ɔwɔ Betel sorɔ dɔ ne. Atimbire bɔ ofi Betel kɔ Sɛkem ne, Silo wɔ ye eyia afiteleɛ so, na osa wɔ Lebona ngwaen.”

²⁰Yiti bɛha behyirele Benyaminfoɛ kyɛ, “Ɛmɔhɔ bɛɛtetɛ bobe boo nemɔ anu

²¹ná ɛ́mɔnea. Sɛ Silo ndaluwa nemɔ fite ba kyɛ bɛbaago b’abilie ne a, ɛ́mɔfi bobe boo nemɔ anu befite. Ɛmɔ anu biala ɔɔbɔ Silo brasua ko abum ɔfa ye yɛ ɔye, ná ɛmɔfa bɛ bɛhɔ Benyamin aseɛ so.

²²Na sɛ bɛ baba mɔ anaa b’eliɛma mmienzua mɔ fa ye nwo dwirɛ bato yɛ nyunu a, yɛkɔha yɛkohyire bɛ kyɛ, ‘Ɛ́mɔfa ɛmɔ nye bɛ́to yɛ, ná ɛmɔlo bɛ; ofikyɛ nna koɛ nu yeɛ yɛhyele braa yɛmane bɛ nu biala ɔ. Yeɛ ɛmɔ koso ɛmɔnni fɔ kyɛ ɛmɔafa ɛmɔ mma mmrasua bama bɛ agyaa ɔ.’ ”

²³Benyaminfoɛ yɔle sɔ ala. Mmrasua bɔ bego abilie bɔ bɛbobɔle bɛ abum ne, ɔnate so mane bɛ nu biala nyane braa ogyale. Besa bɛhɔle b’aseɛ so, na besa bɛkyekyele bɛ nguro mɔ bɛtenane nu.

²⁴Afei Yisraelfoɛ fili berɛ mmusua kure mmusua kure ne mmusua mmusua, na besili nu bɛhɔle bɛ bɔbɔ b’aseɛ mɔ so.

²⁵ Sɔ mmerɛ ne, né ɛhene biala nne Yisrael, yiti né ebiala yɔ bɔ okuro ɔ.