Read Sehwi Maenbulɛfoɛ 3 Bible Online

Maenbulɛfoɛ 3 - Sehwi bible

Maenbulɛfoɛ 3

¹AWURADE yakyili maen maen biemɔ maa bɛhale aseɛ ne aso, kyɛbɔ ɔkɔfa bɛ so ná Yisraelfoɛ bɔ koɛ ɔttole bɛ le wɔ Kanaan ne, okoso bɛ kɔnea ɔ.

²Ɔyɔle ye sɔ, amaa ɔnate so sɔ aworɛ ndoatoasoɛ mɔ bɔ koɛ ɔttole bɛ le ne, wahyire bɛ koɛhonɛ.

³Maen nemɔ ole Filistifoɛ ahemvo nnu ne, Kanaanfoɛ amukoraa, Sidonfoɛ, ɔne Hiwifoɛ bɔ bɛte Lebanon bokaa ne aso ne, ofi Baal Hɛmɔn bokaa ne aso bɔ ɔkwaadwu Lebo Hamate ne.

⁴AWURADE mane maen nemɔ hale berɛ, amaa ɔnate bɛ so waso Yisrael wanea, sɛ aso ye mmeraa dwirɛ bɔ ɔnate Mose so hyɛle bɛ nana mɔ ne, Yisrael koli so anaa.

⁵Yiti Yisraelfoɛ bɛ ne Kanaanfoɛ, Hitifoɛ, Amorifoɛ, Perisifoɛ, Hiwifoɛ ɔne Yebusifoɛ bɛbɔle nu bɛtenane aseɛ ne aso.

⁶Na Yisraelfoɛ gyigyale bɛ mma mmrasua mɔ, yeɛ bɛfale bɛ mma mmrasua deɛ mɔ bɛmomane Kaananfoɛ mma mmienzua agyaa. Afei bɛsole Kanaanfoɛ mmosoen nemɔ.

⁷Yisraelfoɛ yɔle bɔ ɔte bɔne wɔ AWURADE nyunu ɔ. Bɛmane bɛ wora fili AWURADE bɛ Nyameɛ, na bɛsɔnene Baal mɔ ne Asera mɔ.

⁸Yiti AWURADE fɛle Yisrael so yaa. Ɔfale bɛ wurale Mesopotamia hene Kusan Risatim sa, na Yisraelfoɛ sole Kusan Risatim afoɛ mmɔtwɛ.

⁹Nakoso Yisraelfoɛ sũ frɛle AWURADE nen, AWURADE yele defoɛ mane bɛ maa ɔɔpepɛ lele bɛ. Ye ole Otiniɛl bɔ ɔse ole Kalebo aliɛma bienzua kãa Kenase ne.

¹⁰AWURADE Sunzum kanyane Otiniɛl, na Otiniɛl ɔɔlale Yisrael maen ne noa. Ɔhɔle koɛ, na AWURADE fale Siria hene Kusan Risatim wurale ye sa. Olili Kusan Risatim so ngonim.

¹¹Yiti asomdwee wale aseɛ ne aso afoɛ aburanna. Na Kenase awa Otiniɛl wuli.

¹²Yisraelfoɛ sa yɔle bɔ ɔte bɔne wɔ AWURADE nyunu ɔ. Na AWURADE mane Moabo hene Eglon nyane anwoserɛ oolili Yisrael so ngonim, ofikyɛ Yisraelfoɛ yɔle bɔ ɔte bɔne wɔ AWURADE nyunu ɔ.

¹³Eglon fale Amonfoɛ ne Amalɛkefoɛ bokale ye nwo so, na oolili Yisrael so ngonim. Na bɛfale Ayee kuro ne.

¹⁴Yiti Yisraelfoɛ sole Moabo hene Eglon afoɛ buru ne mmɔtwɛ.

¹⁵Nakoso Yisraelfoɛ sũ frɛle AWURADE nen, AWURADE yele defoɛ mane bɛ maa ɔɔpepɛ lele bɛ. Ye ole Ehude bɔ ɔse ole Benyaminniɛ Gera ne. Ehude te bɛen.

¹⁶Ehude yɔle sɛpɔ bɔ ye tendenn te agyirɛ ko ɔ. Ɔkyekyele sɛpɔ ne batale ye sɔ famaa anwo, na owurale ye ataadeɛ guale so.

¹⁷Ɔfale ɛtoɔ ne ɔɔmane Moabo hene Eglon. Né Eglon te sona bɔ ɔte piri ɔ.

¹⁸Ehude fale ɛtoɔ ne mane Eglon yiele ne, Ehude guale mmenia bɔ bɛsoale ɛtoɔ ne ate.

¹⁹Nakoso ye de, osale ye si wɔ nyɔboɛ amoen bɔ opingye Gilgal ne anwo. Ɔhɔle Eglon berɛ na osele kyɛ, “Nana, mepena kyɛ me ne wɔ yɛtu asure.” Eglon sele ye somvoɛ nemɔ kyɛ, “Ɛ́mɔhwe ɛmɔ nwo kãa.” Na bɛ mukoraa befili ye nyunu berɛ befitele.

²⁰Ehude hɔle ye nwo berɛ wɔ mmerɛ bɔ né ye ngome ɔwɔ ye aborɔsaen so pumbu nu dɔ ode mvrama ɔ. Na Ehude hane kyɛ, “Nyameɛ nwa nga ngraa bie ngyire wɔ.” Yiti Eglon dwɔso fili ye bia ne aso.

²¹Yeɛ Ehude fale ye sa bɛen yele sɛpɔ ne fili ye sɔ famaa ne anwo, na ɔfa wɔle Eglon kunu.

²²Sɛpɔ ne ye bo ne ye noa ne oowurale Eglon kunu, na ye loe bungamone fale dadeɛ ne anwo, ofikyɛ Ehude andwe sɛpɔ ne wamvi Eglon kunu. Na ye nyaa tu guale.

²³Afei Ehude fite hɔle abrannaa ne aso dɔ, na ɔtotole aborɔsaen so pumbu anoa nemɔ anu nzafoaa.

²⁴Ehude hɔle ne, ye si ye, Eglon somvoɛ nemɔ sa hɔle dɔ. Na benwuni kyɛ batoto aborɔsaen so dɔ anoa nemɔ anu nen, bɛdwenene kyɛ, “Ebiaa, ɔ́kɔ bakaa so wɔ aborɔsaen ne aso dɔ.”

²⁵Bɛnwondɛle bɛhyɛle maa oodwuli kyɛ ɔyɛle bɛ ahomete. Benwuni kyɛ Eglon ommukye aborɔsaen so dɔ anoa nemɔ nen, bɛfale nzafoaa nemɔ bebukyebukyele. Na benwuni kyɛ bɛ mene wawu la aseɛnwo berɛ ɔ.

²⁶Na mmerɛ bɔ né bɛnwondɛ ne, Ehude nwatili ɔɔpɛle nu wɔ nyɔboɛ amoen ne anwo hɔle Seyira.

²⁷Odwuli berɛ ne, ohuli totorobɛndo ne wɔ Efraim mmokaa aseɛ ne aso. Na Yisraelfoɛ ne Ehude bɛtorotorole befili mmokaa aseɛ ne aso, bɔ né Ehude ɔla bɛ noa ɔ.

²⁸Osele bɛ kyɛ, “Ɛ́mɔli me si, ofikyɛ AWURADE afa ɛmɔ pɔfoɛ Moabofoɛ wawura ɛmɔ sa.” Yiti belili ye si, na beetuale Yɔɔdan apɛleɛ nemɔ bɔ bamma Moaboniɛ biala wambɛ ye wangɔ ye si dɔ ɔ.

²⁹Sɔ mmerɛ ne, behuni Moabofoɛ kɔyɛ apee buru bɔ bɛ mukoraa bɛ nwo yɛ se ná bɛte apɔ ɔ, na bamma bɛ nu ko po wanya ye ti wannidi nu.

³⁰Yiti sɔ kyẽa ne, Moabo lili ngoguo wɔ Yisrael sa nu. Na asomdwee wale aseɛ ne aso afoɛ aburawɔtwɛ.

³¹Ehude ewue asi ne, Anate awa Samega dwɔsole, ná ɔfale pɔmaa bɔ bɛfa bɛka nandwie huni Filistifoɛ ɛyaa nzia. Ye koso ɔɔpepɛ lele Yisrael.