Read Sehwi Maenbulɛfoɛ 7 Bible Online

Maenbulɛfoɛ 7 - Sehwi bible

Maenbulɛfoɛ 7

¹Yerubaal (bɔ osa li Gideon ne) ɔne koɛhonɛfoɛ bɔ bɛboka ye so ne amukoraati, bedwɔsole ngyerɛmɔ tutuutu bɛɛkyekyele asikyeleɛ wɔ Harode mbombonzue ne anwo. Né Midian asikyeleɛ wɔ bɛ sorɔ wɔ More bokaa ne anwo, wɔ bɔnza ne anu.

²Na AWURADE sele Gideon kyɛ, “Koɛhonɛfoɛ bɔ bɛboka wɔ so bɔ mepena kyɛ mefa Midianfoɛ mewura bɛ sa ne, bɛsone soma. Ɔba ye sɔ a, Yisrael kɔhoahoa ye nwo kohyire me, ná waha kyɛ, ‘Me bɔbɔ m’anwoserɛ yeɛ wapepɛ wale me ɔ.’

³ Yiti bɔ ye dawure ma koɛhonɛfoɛ nemɔ bɛte kyɛ, ‘Ebiala bɔ osuro ná ye kra anwati ne, osa ɔhɔ awuro.’ ” Na Gideon sale bɛ nu: bɛ nu apee aburanyɔ ne nyɔ sa hɔle, na apee buru de, bɛhale berɛ.

⁴Yeɛ AWURADE sele Gideon kyɛ, “Koɛhonɛfoɛ nemɔ bɛtɛ sone. Fa bɛ torotoro kɔ asue ne noa, ná ngɔsa bɛ nu wɔ dɔ ngɔma wɔ. Sɛ meka kyɛ, ‘Ɛne ɛhesɔa bɛhɔ’ a, ye de ɛne ye bɛhɔ. Yeɛ sɛ meka kyɛ ‘Nnɛma ɛne ɛhesɔa bɛkɔ’ a, onni kyɛ ɛne ye bɛkɔ.”

⁵Yiti Gideon fale koɛhonɛfoɛ nemɔ torotoro hɔle asue ne noa; na AWURADE sele ye kyɛ, “Ebiala bɔ ɔkɔfa ye temverema kɔno nzue ne bie, kyɛbɔ kyẽa no nzue ne, maa ogyina bue ko. Yeɛ ebiala bɔ okobu ndwerɛ kɔfa ye noa kɔbɔ nzue ne anu kɔno bie ne, maa ye koso ogyina bue ko.”

⁶Bɛ bɔ bele bɛ temverema bɛnone nzue ne bie ne, bɛ somaa te ɛyaa nza. Nakoso koɛhonɛfoɛ ngaa nemɔ de, bebuli ndwerɛ yeɛ bɛnone nzue ne bie ɔ.

⁷Na AWURADE sele Gideon kyɛ, “Mmenia ɛyaa nza bɔ bele bɛ temverema bɛnone nzue ne, ngɔfa bɛ so ngole ɛmɔ, ná mafa Midianfoɛ mawura wɔ sa. Ma bɛ ngaa ne amukoraa besa bɛ́hɔ b’awuro.”

⁸Yiti Gideon lele koɛhonɛfoɛ nemɔ b’aleɛ ne bɛ totorobɛndo mɔ fili bɛ sa nu. Ɔmane Yisrael koɛhonɛfoɛ ngaa ne amukoraati besa bɛhɔle b’ɛtena sua mɔ nu, nakoso koɛhonɛfoɛ ɛyaa nza ne de, ɔmaa bɛhale ye nwo berɛ. Nekaa bɔ né Gideon wɔ ne, né Midian asikyeleɛ wɔ ye ngwaen wɔ bɔnza ne anu.

⁹Sɔ kɔngɔen ne ala, AWURADE sele Gideon kyɛ, “Dwɔso, na fa koɛ kɔteta asikyeleɛ ne; ofikyɛ mafa mawura wɔ sa.”

¹⁰Nakoso sɛ esuro kyɛ ɛkɔfa koɛ kɔɔteta asikyeleɛ ne a, ye de ma wɔ somvoɛ Pura ɔne wɔ bɛhɔ.

¹¹Kotie edwirɛ bɔ bɛkeka ɔ, na afei wɔ hue kɔyɛ se maa ɛkɔfa koɛ kɔɔteta asikyeleɛ ne.” Yeɛ Gideon ne ye somvoɛ Pura bɛhɔle beedwuli koɛhonɛfoɛ nemɔ b’asikyeleɛ ne tiwaa.

¹²Né Midianfoɛ, Amalɛkefoɛ ɔne eyia afiteleɛfoɛ nemɔ bayɛ bɔnza ne anu mitimiti kyɛ ngyein. B’afupɔngɔ mɔ de, bɛka a bennwu ye noa; ne bɛ somaa te kyɛ mboanoa anweaa.

¹³Gideon oodwuli berɛ ne, né biaa bie ɔka ye laleɛ nu dwirɛ kyire obiɛngo kyɛ, “Ngyene laleɛ, nwuni kyɛ ayuo paanoo mumua ko amunu waatɔ Midian asikyeleɛ ne anu. Na oodwuli ɛtena sua ne anwo ne, ɔpemone ye maa otu tɔle; ɛtena sua ne gya tuatuale anwuro na ɔsɛkyele bɔkɔɔ.”

¹⁴Yeɛ obiɛngo ne buale kyɛ, “Laleɛ he de nna hwee ɔ; Yoase awa Yisraelniɛ Gideon, ye ngrandɛ ne ɔ. Nyameɛ afa Midian ne koɛhonɛfoɛ ne amukoraa wawura ye sa.”

¹⁵Gideon tele kyɛ ɔka laleɛ ne anu dwirɛ ná okyire ye bo ne, ɔsɔnene AWURADE; na osa wale Yisrael asikyeleɛ ne anu oosele kyɛ, “Ɛ́mɔdwɔso, ofikyɛ AWURADE afa Midian koɛhonɛfoɛ ne wawura ɛmɔ sa.”

¹⁶Afei, ɔhyɛle koɛhonɛfoɛ ɛyaa nza ne anu kure nza, na ɔfale totorobɛndo wurawurale bɛ mukoraa bɛ sa nu. Osa mane ebiala kwangoa too bɔ ɛtɛen wura nu ɔ.

¹⁷Na osele bɛ kyɛ, “Nikyee bɔ ngɔyɔ ne, ɛ́mɔnea ná ɛmɔ koso ɛ́mɔyɔ sɔ ala. Sɛ meba asikyeleɛ ne tiwaa a, nikyee bɔ ngɔyɔ biala ɛ́mɔyɔ bie.

¹⁸Sɛ me ne koɛhonɛfoɛ amukoraa bɔ bɛboka me so ne, yɛhu totorobɛndo nemɔ a, ɛmɔ koso ɛ́mɔhu totorobɛndo nemɔ bɛfa asikyeleɛ ne anwo amukoraa bɛ́bra béyia, ná ɛ́mɔtea nu kyɛ, Yɛwɔ AWURADE ne Gideon bue nu!”

¹⁹Abunnamu bɔ bɛsesane kuro berɛ awɛmvoɛ nemɔ nen, Gideon ne koɛhonɛfoɛ ɛyaa ko bɔ bɛboka ye so ne, bɛwale asikyeleɛ ne tiwaa. Behuli totorobɛndo nemɔ, na bɛbobɔle kwangoa bɔ né otiratira bɛ nemɔ.

²⁰Na koɛhonɛfoɛ kure nza ne, behuli bɛ totorobɛndo nemɔ, na bɛbobɔle bɛ kwangoa nemɔ. Betiratirale ɛtɛen ne wɔ bɛ sa bɛen nu, yeɛ totorobɛndo bɔ behu ne koso wɔ bɛ sa famaa nu; na bɛteateane nu kyɛ, “AWURADE ne Gideon ngrandɛ!”

²¹Koɛhonɛfoɛ nemɔ, bɛ mukoraa begyinagyinane Midian asikyeleɛ ne anwo bɛbra beyiale. Asikyeleɛ ne anu mmenia amukoraa bɛnwatili, na bɛnwati ne, né bɛbɔ awuye.

²²Behuli totorobɛndo ɛyaa nza nemɔ nen, AWURADE mane Midian koɛhonɛfoɛ nemɔ bɔbɔ bɛpɛle bɛ nwo bɛfale ngrandɛ behuhuni bɛ nwo. Na bɛnwatili toonn beedwuli Bete Sita. Bɛfale bɛ nye behyirele Serera beedwuli Abel Melola wɛen so, bɔ opingye Tabate ne.

²³Yeɛ Yisraelfoɛ frɛfrɛle bɛ koɛhonɛfoɛ befili Nafetali, Asɛ ɔne Manase amukoraa, na bɛpole Midianfoɛ nemɔ so.

²⁴Gideon somane mmenia maa bɛhɔle Efraim mmokaa aseɛ ne amukoraa so beesele berɛ ama kyɛ, “Ɛ́mɔtorotoro beeyia Midianfoɛ nemɔ, ná ɛ́mɔle asue Yɔɔdan befi bɛ sa nu maa oodwu Bete Bara.” Yiti Efraim mmienzua amukoraati boale bɛ noa, na beelele asue Yɔɔdan befili bɛ sa nu alaa maa oodwuli Bete Bara.

²⁵Bɛpole Midianfoɛ so, na Midianfoɛ safohene nyɔ nemɔ bɔ bɛ ole Orebo ne Seebo ne, bɛhyele bɛ. Behuni Orebo wɔ Orebo nyɔbotaen ne anwo, yeɛ Seebo koso behuni ye wɔ Seebo nekaa bɔ betwi nzaa ne. Bɛpepɛle bɛ ti bɛfa bɛbrɛle Gideon wɔ asue Yɔɔdan si dɔ.