Read Sehwi Maenbulɛfoɛ 8 Bible Online

Maenbulɛfoɛ 8 - Sehwi bible

Maenbulɛfoɛ 8

¹ Afei Efraimfoɛ sele Gideon kyɛ, “Nzikyɛ dwirɛ yeɛ afa ali yɛ ye? Nzu ati yeɛ ɛne Midianfoɛ bɛkwaaho ne, amvrɛ yɛ ɔ?” Na behwili ye nyunu ɛyaa so.

²Yiti Gideon buale bɛ kyɛ, “Nikyee titire beni yeɛ mayɔ bɔ odwu bɔ ɛmɔayɔ ye ɔ? Aso Efraim bobe bɔ wate maa waha ye si ne, ɔnzone ɔndera Abiesa bobe abiribira?

³ Nyameɛ afa Midian safohene Orebo ne Seebo wawura ɛmɔ sa. Nikyee titire beni yeɛ mahora mayɔ bɔ odwu bɔ ɛmɔayɔ ye ɔ?” Ɔhane sɔ ne, b’ahone bɔ wahu ne tɔle nzue nu.

⁴Afei Gideon ne koɛhonɛfoɛ ɛyaa nza bɔ bɛboka ye so ne, beedwuli asue Yɔɔdan noa, na bɛpɛle bɛhɔle ye si. Né ɛhɔen apɛ bɛ, nakoso né bɛtɛ gu bɛ so.

⁵Yiti Gideon srɛle Sukotefoɛ kyɛ, “Ɛ́mɔma me mmenia bɔ beli me si ye aleɛ kãa. Ɛhɔen apɛ bɛ, na mefoa Midian ahemvo Seba ne Samuna mekɔkye bɛ.”

⁶Nakoso Sukote mbanyi buale kyɛ, “Aso wɔ sa anya aha Seba ne Samuna, bɔ yɛma wɔ lɔen ne aleɛ ɔ?”

⁷Yeɛ Gideon sele kyɛ, “Yoo, mate. Sɛ AWURADE fa Seba ne Samuna wura me sa a, ngɔfa ɛserɛ so agurɛ ne ɛfone ngofi ɛmɔ ma ɛmɔ nwonaen kɔtete.”

⁸Gideon fili berɛ ne, ɔhɔle Penuel, na ɔɔsrɛle bɛ sɔ ala. Na Penuelfoɛ buale ye kyɛbɔ Sukotefoɛ buale ye ne ala.

⁹Yiti osele Penuelfoɛ kyɛ, “Sɛ medi ngonim ná mesa meba a, ngobubu abandenden he ngogua.”

¹⁰Né Seba ne Samuna, bɛ ne bɛ koɛhonɛfoɛ kɔyɛ apee buru ne nnu bɛwɔ Kakɔɔ. Eyia afiteleɛfoɛ koɛhonɛfoɛ ne, bɛ ngaa bɔ né baha hɔ ɛne, ofikyɛ né bɛ nu koɛhonɛfoɛ apee ɛyaa ko ne aburanyɔ yeɛ batotɔ ɔ.

¹¹Yiti Gideon fale teaseɛnam atee bɔ ɔla Noba ne Yobeha eyia afiteleɛ so ne aso, na oofuni koɛhonɛfoɛ nemɔ anu fale koɛ tetale bɛ.

¹²Midian ahemvo nyɔ bɔ bɛ ole Seba ne Samuna ne, bɛnwatili. Gideon foane bɛ ɔɔhyele bɛ, na ɔmane bɛ koɛhonɛfoɛ ne amukoraati bɛbɔle aya.

¹³Yoase awa Gideon fi koɛ noa ɔba ne, ɔfale Herese pambaa ne aso.

¹⁴Ɔhyele Sukote aberandeɛ ko, na ɔmaa ɔhyerɛle Sukote atitire ne mbanyi mɔ dumaa mane ye. Né bɛte aburasoo ne nzoo.

¹⁵Afei Gideon hɔle Sukotefoɛ berɛ, na osele kyɛ, “Seba ne Samuna bɛ ɛhe. Bɛ nwo ti yeɛ ɛmɔhane me ayinga kyɛ, ‘Aso wɔ sa anya aha Seba ne Samuna, bɔ yiti wɔ koɛhonɛfoɛ bɔ bafɛ ye, yɛma bɛ aleɛ ɔ.’ ”

¹⁶Yiti Gideon hyele kuro berɛ mbanyi, na ɔfale ɛserɛ so agurɛ ne ɛfone bole kuro berɛ ama hyirele bɛ nworɛ.

¹⁷Obubuli Penuel abandenden ne guale ase, na ohuhuni kuro berɛ mmienzua nemɔ.

¹⁸Yeɛ obisale Seba ne Samuna kyɛ, “Mmienzua bɔ ɛmɔhuhuni bɛ wɔ Tabɔ ne, bɛ sue te sɛɛ?” Bebuale kyɛ, “Bɛ nu biala te kyɛ wɔ ala; besoma mmenia bɔ bɛ se te ɛhene ɔ.”

¹⁹Na Gideon buale kyɛ, “Nniɛma mɔ ɛne, me ne bɛ yɛfi niɛ. Kyɛ AWURADE te ase ye, sɛ ɛmɔyakyili bɛ maa benyane bɛ ti bedidili nu a, ahaa mengohu ɛmɔ.

²⁰Yiti osele ye bamuɛbaa Yeta kyɛ, “Kɔ kohũ bɛ!” Nakoso aberandeɛ ne andwe ye ngrandɛ. Né osuro, ofikyɛ né ɔtɛ te abɛɛmaa.

²¹Yeɛ Seba ne Samuna hane kyɛ, “Bra na baahu yɛ, na kyɛ bɔ sona te ne, sɔ ala yeɛ ye anwoserɛ te ɔ.” Yiti Gideon dwɔsole oohuni Seba ne Samuna; na ɔyeyele mbembenanneɛ bɔ ɔya b’afupɔngɔ nemɔ ne.

²²Na Yisraelfoɛ sele Gideon kyɛ, “Di yɛ so hene, ɛne ɛwa ne w’anomaa koso; ofikyɛ ale yɛ afi Midian sa nu.”

²³Gideon buale bɛ kyɛ, “Me de mengoli ɛmɔ so hene, yeɛ mma koso ngoli ɛmɔ so hene; mmom AWURADE yeɛ okoli ɛmɔ so hene ɔ.”

²⁴Yeɛ Gideon toale so sele bɛ kyɛ, “Ɛ́mɔma nzrɛ ɛmɔ nikyee ko: Koɛ nu nzesadeɛ asomade bɔ ebiala wanya ye ne, ɔ́ma me ko.” (Né pɔfoɛ nemɔ bele esikaa kɔkorɛ asomade, ofikyɛ bɛte Yismael boso ama.)

²⁵Na bebuale ye kyɛ, “Yɛkofia yɛ kunu yɛkɔfa yɛkɔma wɔ.” Yiti bɛfale ɛtena bɛsɛle berɛ, na bɛ nu biala fale koɛ nzesadeɛ asomade bɔ wanya ye ne anu ko tole so.

²⁶Esikaa kɔkorɛ asomade bɔ bɛfa bɛmane Gideon ne, nu nonɛ te kilo buru ne ngona (asora mbembenanneɛ, akomuade, ɔne kende bɔ Midian ahemvo mɔ fa siesie bɛ nwo ɔ, ɔne ngaa bɔ ogua b’afupɔngɔ mɔ kɔme anu ɔ).

²⁷Gideon fa yɔle amoen bɔ ɔte kyɛ ɔsɔfo ataadeɛ, na ɔsɔle amoen ne wɔ ye kuro Ofra. Yisrael maen amukoraa sɔnene amoen ne, na ɔɔyɛle ngaen mane Gideon ne ye abusuafoɛ.

²⁸Yiti Yisraelfoɛ lili Midian so ngonim bɔ maen ne angora ye ti so pagya ko ɔ. Na ɛhe mane asomdwee wale aseɛ ne aso afoɛ aburanna wɔ Gideon aberɛ so.

²⁹Yoase awa Yerubaal (bɔ besa bɛfrɛ ye Gideon ne) ɔɔtenane ye bɔbɔ ye awuro.

³⁰Gideon wole mma mmienzua aburasoo, ofikyɛ ogyale mmraa pee.

³¹Ɔne ye sómaa bɔ ɔwɔ Sɛkem ne koso bɛwole baa bienzua, na ɔtole ye dumaa Abimɛlɛke.

³²Yoase awa Gideon nyini yɛle aworowaa posoposo koraka yeɛ owu ɔ, na besiele ye wɔ ɔse Yoase ye nyɔboɛ sua nu wɔ Abiesefoɛ kuro Ofra.

³³Gideon wuli pɛ yeɛ Yisraelfoɛ hyɛle ye bo besa bɛɛsɔnene Baal mɔ ɔ, na bɛfale Baal Berite bɛkakyili bɛ nyameɛ.

³⁴AWURADE bɛ Nyameɛ bɔ olele bɛ fili bɛ pɔfoɛ amukoraa sa nu wɔ nekaa biala ne de, Yisraelfoɛ mane bɛ wora fili ye.

³⁵Ɔwɔ nu kyɛ Yerubaal (bɔ besa bɛfrɛ ye Gideon ne), ɔyɔle nningyein paa pee mane Yisrael de, nakoso bɛyele ye awuro ama boniayɛ.