Read Sehwi 3 Yohane 1 Bible Online

3 Yohane 1 - Sehwi bible

3 Yohane 1

¹ Krataa ye fi me bɔ nde panyi berɛ. Mefa mebrɛ Gayɔso bɔ mekuro ye dwirɛ wɔ nahorɛ nu ɔ.

²Aliɛmaa, mebɔ mbaeɛ mema wɔ kyɛ nikyee biala hɔ so yé ma wɔ, ná enya anwoserɛ anwoɔnaen nu, kyɛbɔ nningyein kɔ so yé ma wɔ kra ne.

³ Ofikyɛ nyane anigye pee mmerɛ bɔ aliɛmaa nemɔ bɛwale belili wɔ nahorɛlilɛ nwo adanzeɛ, kyɛbɔ amba ɛfa nahorɛlilɛ bɔ wɔ bra ne.

⁴Nikyee biala mma me anigye bɔ ɔtra so te kyɛ ngɔte kyɛ me mma mɔ nate nahorɛ ne anu ɔ.

⁵ Aliɛmaa, nikyee biala bɔ ɛyɔ ma aliɛmaa nemɔ ne, yeɛ afei ɛwɔfoɛ mɔ po ne, ɛyɔ ye nahorɛ nu.

⁶Bɛ yeɛ bali wɔ dɔ ne nwo adanzeɛ bahyire asɔre ne ɔ. Na ɔte paa kyɛ ekogua bɛ ate kama bɔ ɔfata Nyameɛ solɛ ɔ.

⁷ Ofikyɛ ɔnate ye ti yeɛ besili nu bɛhɔle ɔ, na banne hwee bamvi Amaenmaensofoɛ berɛ.

⁸Yiti ɔsɛ kyɛ yɛboka sɔ mmenia nemɔ, amaa yɛ ne bɛ yayɛ aliɛmaa adwumayɔlɛfoɛ wɔ nahorɛ ne anu.

⁹Mahyerɛ krataa maama asɔre ne, nakoso Diotrefe bɔ okuro kyɛ ɔyɛ ye nwo panyi tra ebiala ne, onne yɛ ndo nu.

¹⁰ Yiti sɛ meba a, ngɔfa bɔ ɔyɛ ne ngɔto dwaa: odi nzekure yeayea fa yɛ nwo. Nna ɛhe angome, afei koso onzikye aliɛmaa mɔ wɔ ye awuro. Asa koso osi bɛ bɔ bekuro kyɛ bede aliɛmaa nemɔ bɛto nu ne ate, na ɔfoa bɛ fi asɔre ne anu.

¹¹ Aliɛmaa, nnɛdi tɛɛ si na mmom di paa si. Sona biala bɔ ɔyɔ paa ne te Nyameɛ deɛ, na sona bɔ ɔyɔ tɛɛ ne, onnwuni Nyameɛ.

¹² Mmenia mukoraa di Demetrio nwo adanzeɛ paa, yeɛ ye yɔleɛ koso di ye nwo adanzeɛ paa. Yɛ koso yɛdi ye nwo adanzeɛ, na ɛmɔse kyɛ y’adanzeɛ ne te nahorɛ.

¹³Edwirɛ pee wɔ berɛ bɔ ahaa ɔsɛ kyɛ mekyerɛ mebrɛ wɔ ɔ, nakoso menguro kyɛ mefa krataa ne pɛn mekyerɛ ɔ;

¹⁴na mmom ɔngɔhyɛ biala ngonwu wɔ dɔ, ná manwu wɔ nyunu ná yali ngɔmɔ.

¹⁵ Nyameɛ ma wɔ asomdwee. Wɔ mmango mɔ bebisa wɔ ahye. Bisa yɛ mmango mɔ ahye ma yɛ ngoko ngoko.