Read Sehwi Yuda 1 Bible Online

Yuda 1 - Sehwi bible

Yuda 1

¹ Yuda bɔ nde Yesu Kristo akoaa ne Yakobo aliɛma, mefa mebrɛ bɛ bɔ bafrɛ bɛ, bɔ bɛla Baba Nyameɛ ahone nwo, bɔ wafa bɛ wasie wɔ Yesu Kristo nu ɔ.

²Mesrɛ kyɛ anwumvoinnwunɛ, asomdwee ne ɔdɔ ɔsone pee ma ɛmɔ.

³Aliɛmaa mɔ, mabɔ mmɔden amukoraa kyɛ mekyerɛ ngoalelɛ bɔ yɛ mukoraa yanya ye ne nwo dwirɛ mebrɛ ɛmɔ, na ye nwo ahia kyɛ mekyerɛ mebrɛ ɛmɔ, ná metu ɛmɔ foɛ, kyɛ ɛ́mɔpere bégyina pindinn bɛ́ma gyidie bɔ bafa bama anwoteefoɛ pɛnko ne.

⁴ Ofikyɛ mmenia biemɔ bawuawua bɛ nwo baawura ɛmɔ nu, mmenia bɔ ofi tetetete bahyerɛ bɛ nwo dwirɛ bato berɛ bama ndɛenbualɛ he, amumuyɛɛfoɛ bɔ bafa yɛ Nyameɛ adom ne bakakyi ahowibra, ná bɛpo Awurade Yesu Kristo bɔ ɔte yɛ Meneɛ komapɛ ne ɔ.

⁵ Ɔwɔ nu kyɛ ɛmɔse ɛhemɔ dada de, nakoso mepena kyɛ mebɔ ɛmɔ so, kyɛ Awurade bɔ olele maen ne fili Misraim aseɛ so ne, nziɛ ye, ohuhuni bɛ bɔ banne banni ne.

⁶Na abɔfo mɔ bɔ bannea bɛ dibea so yé, ná mmom bɛyakyili bɛ bɔbɔ b’atenaleɛ berɛ ne, wabɔ bɛ afebɔɔ panwu wafa bɛ wasie awosii kabii nu, na ɔfa nwondɛ kyẽa piri ndɛenbualɛ ne.

⁷ Na sɔ ala yeɛ Sodom ne Gomora ne nguro bɔ bapɛ bɛ nwo bayia, bɔ bɛyɛle kyɛ ɛhemɔ, bɔ bɛlɔle asukɔ wɔ adwamanbɔlɛ nu, ná bɛbɔle nnaa nu musue ne, bafa bɛ bayɛ see afebɔɔ nwo nhwɛsoɛ bato berɛ ɔ.

⁸Na sɔ ala yeɛ sɔ laleɛhyenɛfoɛ nemɔ begua bɛ nwonaen nwo fiɛ ɔ. Bebu tumililɛ animtia, na bɛkekã dwirɛ betia animnyamfoɛ nemɔ.

⁹ Nakoso mmerɛ bɔ abɔfo panyi Mikayɛl ne abɔnzam bɛpereperele Mose fuin nwo ne, Mikayɛl anzi ye hue wanga dwirɛ wandia ye wammua ye ndɛen, na mmom ɔhane kyɛ, “Awurade hwi wɔ nyunu!”

¹⁰Nakoso mmenia hemɔ de, bɛkekã dwirɛ tɛɛ betia nikyee biala bɔ bɛnde ye bo ɔ; na nikyee bɔ befi bɛ sona sue nu bɛse, kyɛ ngaka bɔ adwene nne bɛ ti anu ne, ye ala yeɛ ogua bɛ nwo fiɛ ɔ.

¹¹ Bɛ yaakɔ! Ofikyɛ batu Kein agyirɛ ne bie, na adifuu ti bafa bɛ nwo baawura Balaam nnakannaka dwirɛ ne anu, na bekowuwu wɔ Kora ɛlɔenyɛlɛ ne anu.

¹²Sɔ mmenia nemɔ, bɛte ngekalewa wɔ ɛmɔ ɔdɔ adidie bo, bɛne ɛmɔ didi a, bɛte mmoaenneafoɛ bɔ bɛ ngome bɛ ko yeɛ ohia bɛ ɔ, bɛte munungum bɔ nzue nne nu bɔ mvrama fa ye kyinikyini ɔ; mmakaa bɔ odwu bɛ sulɛ a benzu mma ɔ, bawu pɛen nyɔ, bɔ bɛ bo atutu ɔ,

¹³bɛte ɛpo asorɔkye bɔ obu fa so, bɔ opu bɛ bɔbɔ b’animguaseɛ gua ɔ, nzramaa mɔ bɔ bekyinikyini bɔ basiesie awosii kabii bama bɛ ɔ.

¹⁴ Na sɔ mmenia nemɔ yeɛ Henɔke, bɔ ɔte aworɛ ndoatoasoɛ nzoo fi Adam so ne, ɔhyɛle ngɔm fale bɛ nwo kyɛ, “Tie, Awurade ne ye anwoteefoɛ apee apee bɛ́ba;

¹⁵kyɛ ɔbaabua ebiala ndɛen, na okobua amumuyɛɛfoɛ amukoraa foɛ wɔ b’amumuyɛɛ yɔleɛ amukoraa nwo, ɔne edwirɛ tɛɛ amukoraa bɔ bɔnefoɛ amumuyɛɛfoɛ bakekã batia ye ɔ nwo.”

¹⁶Ɛhemɔ te mmenia bɔ bɛ kunu ndwo, somoɛbɔlɛfoɛ, bedi bɛ bɔbɔ b’akɔnnɔ si, bɛfa bɛ noa bɛhoahoa bɛ nwo, na adifuu ti bɛdɛfɛdɛfɛ mmenia.

¹⁷Yiti aliɛmaa mɔ, ɛ́mɔkaye edwirɛ bɔ y’Awurade Yesu Kristo asomafoɛ mɔ bahã bato berɛ ne.

¹⁸ Bɛhã behyirele ɛmɔ kyɛ, “Mmerɛ bɔ oli nziɛ ne anu, ngorohoɛfoɛ kodwɔso, na bekoli bɛ bɔbɔ b’akɔnnɔ si.”

¹⁹Bɛ yeɛ bɛfa mbakyembakyemuɛ bɛba ɔ, Sunzum ne ɔnne bɛ nu, na bɛte mmenia bɔ bedi anwoɔnaen si ɔ.

²⁰Nakoso ɛmɔ de, aliɛmaa mɔ, ɛmɔhɔ so benyi wɔ ɛmɔ gyidie krongron paa ne anu, ná ɛ́mɔbɔ mbaeɛ wɔ Sunzum Krongron nu;

²¹Ɛmɔhɔ so bɛtena Nyameɛ ɔdɔ nu, ná ɛ́mɔnwondɛ y’Awurade Yesu Kristo anwumvoinnwunɛ ne bɛhɔ daa ngoa nu.

²²Bɛ bɔ b’adwene yɛ bɛ naa ne, ɛ́mɔnwu bɛ anwumvoin;

²³ ebiemɔ koso, ɛ́mɔhwe bɛ béfi see nu bele bɛ ngoa; ebiemɔ koso, ɛ́mɔfa anwowosolɛ benwu bɛ anwumvoin, nakoso ɛmɔhyi ndaadeɛ po bɔ bɛ nwonaen ayɛ ngekalewa wɔ nu ne.

²⁴Na ye bɔ ɔkora sɔ ɛmɔ nu ma ɛmɔmvi ase, ná ɔfa ɛmɔ gyina ye animnyam ne nyunu bɔ ngekalewa biala nne ɛmɔ nwo, wɔ anigye nu ne,

²⁵Nyameɛ[1] komapɛ bɔ ɔnate y’Awurade Yesu Kristo so ɔte yɛ Ngoadefoɛ ne, animnyam, ahennie, anwoserɛ ne tumi ɔyɛ ye deɛ daa, kekesaala ne afebɔɔ. Amen.