Read Sehwi Nyekyire 10 Bible Online

Nyekyire 10 - Sehwi bible

Nyekyire 10

¹Afei nwuni abɔfo foforɛ anwoserɛniɛ bie kyɛ ofi nyameɛso odwu ba ase; né wafa munungum wahera, nyangondoen wɔ ye ti so, ye nyunu te kyɛ eyia, na ye gya te kyɛ see bonima.

²Né otira nwomaa kaaba bie bɔ babukye nu ɔ wɔ ye sa nu. Na otuli ye gya famaa siele ɛpo so, yeɛ otuli ye gya bɛen siele aseɛ so.

³Na ɔteane nu serɛserɛ kyɛ gyata bɔ ɔbobɔ nu ɔ. Na ɔteane nu nen, agralaa nzoo ne bobɔle nu kurudududu.

⁴Na agralaa nzoo ne bobɔle nu kurudududu nen, nyɛle kyɛ mekyerɛ, nakoso ndele kyɛ komviɛ bie fi nyameɛso ɔkã kyire me kyɛ, “Edwirɛ bɔ agralaa kurudududu nzoo nemɔ bahã ne, sɔ ye noa, na nnɛkyerɛ.”

⁵ Na abɔfo bɔ nwuni ye kyɛ ogyi ɛpo ne aseɛ so ne, ɔmane ye sa [famaa] so hyirele nyameɛso,

⁶na ɔfale bɔ ɔte ase afebɔɔ, bɔ ɔbɔle anwuro ne bɔ ɔwɔ nu, aseɛ ne ne bɔ ɔwɔ nu, yeɛ ɛpo ne bɔ ɔwɔ nu ne tale ndaen kyɛ, “Mmerɛ biala nne berɛ ko,

⁷na mmom mmerɛ bɔ abɔfo bɔ ɔtɔ so nzoo ne kohu ye totorobɛndo ne, yeɛ Nyameɛ mvealeɛ nu dwirɛ ne kɔwa nu ɔ, kyɛbɔ ɔhane ye nwo dwirɛ hyirele ye ngoaa ngɔmhyɛlɛfoɛ nemɔ ne.”

⁸Na komviɛ bɔ nde mvili nyameɛso ne odwudwo hyirele me bieku kyɛ, “Nwomaa kaaba bɔ babukye nu, bɔ ɔwɔ abɔfo bɔ ogyi ɛpo ne aseɛ so ye sa nu ne, kole.”

⁹Yiti ngɔle abɔfo ne nwo berɛ, na nzele ye kyɛ, “Fa nwomaa kaaba ne ma me.” Na osele me kyɛ, “De ná di; na ɔkɔyɛ weewee wɔ wɔ kunu, nakoso ɔkɔyɛ menemene kyɛ woɛ wɔ wɔ noa nu.”

¹⁰Na nnele nwomaa kaaba ne mvili abɔfo ne sa nu nnili; na ɔyɛle me noa nu menemene kyɛ woɛ, nakoso nni nyiele nen, ɔyɛle me kunu dɔ weewee.

¹¹ Na osele me kyɛ, “Ɔsɛ kyɛ ɛhyɛ ngɔm fa mmenia, maen maen, edwudwolɛ ahoroɔ ne ahemvo pee nwo bieku.”