Read Sehwi Nyekyire 12 Bible Online

Nyekyire 12 - Sehwi bible

Nyekyire 12

¹Na sɛngyerɛnneɛ piri bie lale ye nwo ali wɔ nyameɛso: Braa bie bɔ wafa eyia wahera, bɔ ye gya gyigyi ɛsraen so, ná nzramaa buru ne nyɔ abotire bobɔ ye ti ɔ.

² Né ɔnwonzɛ, yeɛ afei né aworɛ ahã ye maa onwu aworɛ nu amaneɛ ɔteatea nu.

³ Na sɛngyerɛnneɛ bieku lale ye nwo ali wɔ nyameɛso: na yieee, sasrabɔnzam pirikua kɔkorɛ bie bɔ ye ti nzoo, ye mmɛen buru, bɔ ahennie abotire nzoo bobɔ ye ti nemɔ ɔ.

⁴ Na ɔfale ye dua piane ewienu nzramaa ngyɛmuɛ nza nu ko, na ogyili bɛ guale aseɛ so. Na sasrabɔnzam ne oogyinane braa bɔ wafo aworɛ so ne nyunu berɛ, kyɛ ɔwo ala a ɔkye ɔwa ne di.

⁵ Ɔwole baa bienzua, bɔ ye yeɛ ɔbaafa buralɛ pɔmaa di maen maen amukoraa so ɔ. Na ɔwa ne, behwimini ye bɛhɔle Nyameɛ ne ye ahennie bia ne nwo.

⁶ Na braa ne nwati hɔle ɛserɛ so, nekaa bɔ Nyameɛ asiesie ama ye kyɛ bɛnea ye so ngyẽa apee ko ɛyaa nyɔ ne aburasia ne.

⁷ Na afei koɛ sili nyameɛso. Mikayɛl ne ye abɔfo mɔ bɛfale koɛ bɛtetale sasrabɔnzam ne; na sasrabɔnzam ne ne ye abɔfo mɔ bɛhone;

⁸nakoso bangora koɛ ne noa gyina, na bannya atenaleɛ wɔ nyameɛso ko.

⁹ Yiti betuli sasrabɔnzam kandinga ne befili berɛ, sɔ daa tetetete ewoo ne, bɔ bɛfrɛ ye Abɔnzam ne Satan ne, bɔ ɔlakalaka wiase amukoraa ne; befindini ye bɛtole aseɛ so, na befindini ye ne ye abɔfo mɔ yeɛ bɛtole ɔ.

¹⁰ Na ndele komviɛ pirikua bie wɔ nyameɛso kyɛ, “Afei yeɛ ngoalelɛ ne tumi ne ahennie ayɛ yɛ Nyameɛ deɛ, ná tumi ayɛ ye Kristo ne deɛ ɔ, ofikyɛ bafindi y’eliɛma mɔ bɛ kwaadubɔlɛniɛ ne bato ase, ye bɔ ɔbɔ bɛ kwaadu alehyeleɛ ne alesaleɛ wɔ Nyameɛ nyunu ne.

¹¹Na bɛfale Boaen Ba ne mogya so ne b’adanzeɛ dwirɛ so yeɛ belili ye so ngonim ɔ, na banzuro kyɛ bɛkɔfa bɛ ngoa bɛkɔpɛ so ɔ.

¹² Yiti nyameɛso ne ɛmɔ bɔ ɛmɔte nyameɛso ɔ, ɛ́mɔli ahurusi! Nakoso aseɛ ne ɛpo de, bɛ yaakɔ! Ɔnate kyɛ abɔnzam le ɛyaa pirikua wadwu waatoa ɛmɔ wɔ dɔ, ofikyɛ ɔse kyɛ ye mmerɛ aha tikaape bie.”

¹³Na sasrabɔnzam ne nwuni kyɛ bafindi ye bato aseɛ so nen, otuli ye nye siele braa bɔ ɔwole baa bienzua ne aso.

¹⁴ Nakoso bɛmane braa ne kɔleɛ pirikua bie ndaa nyɔ, kyɛ ɔfa tu fi ewoo ne nyunu hɔ ɛserɛ so, wɔ ye atenaleɛ, nekaa bɔ bɛkɔnea ye mmerɛ ne mmerɛ ne mmerɛ bue ne.

¹⁵Na ewoo ne puli ye noa nu nzue bɔ ɔte kyɛ asue ɔ olili braa ne si, kyɛ asue ne fa ye hɔ.

¹⁶Nakoso aseɛ bokale braa ne; na aseɛ bukyele ye noa nu, na ɔmene asue bɔ sasrabɔnzam ne pu fili ye noa nu ne.

¹⁷Afei sasrabɔnzam ne fɛle braa ne so yaa, na ɔɔfale koɛ toale ye bosofoɛ ngaa bɔ bedi Nyameɛ ahyɛdeɛ so, ná betira Yesu Kristo adanzeɛ nu ne.

¹⁸Na oogyinane mboanoa anweaa so.[3]