Read Sehwi Nyekyire 14 Bible Online

Nyekyire 14 - Sehwi bible

Nyekyire 14

¹ Afei ndole me nye, na yieee, né Boaen Ba ne gyi Sion bokaa ne aso. Na bɛ bɔ bɛboka ye so ne bɛte apee sɔ alaa ɛyaa ko ne aburanna ne nna, bɔ bahyerɛ ye dumaa ne ye Baba dumaa wɔ bɛ nwoma so ɔ.

²Na ndele komviɛ bie mvili nyameɛso bɔ ɔte kyɛ asue pee bɔ bɛsẽ wuruwuru, ɔne esue bɔ ɔbɔ nu kurudududu serɛserɛ ɔ. Na komviɛ bɔ ndele ne, ɔte kyɛ sangoobɔlɛfoɛ bɔ bɛbɔ bɛ sangoo ɔ.

³Na bɛtole edwein foforɛ bie wɔ ahennie bia ne ne abɔdeɛ teasefoɛ nna ne ne mbanyi nemɔ nyunu. Na ebiala angora anzua sɔ dwein ne, sana apee sɔ alaa ɛyaa ko ne aburanna ne nna ne bɔ bale bɛ ngoa bafi aseɛ so ne angome.

⁴ Ɛhemɔ ole bɛ bɔ bamva mmrasua bangua bɛ nwo fiɛ, ofikyɛ basie bɛ nwo krongron. Bɛ yeɛ bedi Boaen Ba ne si bɛkɔ nekaa biala bɔ ɔkɔ ɔ. Bɛ yeɛ bale bɛ ngoa bafi adasa mmaa nu, ná bayɛ bɛ fieso aleɛ bɔ oli moa bama Nyameɛ ne Boaen Ba ne ɔ.

⁵ Bɛ yeɛ bɛppɛle ngondombo le ɔ, ofikyɛ ngekalewa biala nne bɛ nwo.[4]

⁶Na afei nwuni abɔfo foforɛ bɔ watu nate nyameɛso afia dɔ, bɔ otira nzɛmba afebɔɔ ne kyɛ ɔkwaabɔ ye dawure kyire bɛ bɔ bɛte aseɛ so: maen maen ne mmusua kure ne edwudwolɛ ne mmenia amukoraa.

⁷Na ɔteane nu sele kyɛ, “Ɛ́mɔsuro Nyameɛ ná ɛ́mɔfa animnyam bɛ́ma ye, ofikyɛ ye ndɛenbualɛ mmerɛ ne adwu; na ɛ́mɔsɔne ye bɔ ɔbɔle nyameɛso ne aseɛ, ɛpo ne asue ti amukoraa ne.”

⁸ Na abɔfo foforɛ bɔ ɔtɔ so nyɔ ɔ lili ye si sele kyɛ, “Babilɔn abɔ! Wabɔ! Kuro piri ne, ofikyɛ wama maen maen amukoraa bano ye adwamanbɔlɛ ahonehulɛ nzaa ne bie.”

⁹Na abɔfo bɔ ɔtɔ so nza lili bɛ si, na ɔteane nu sele kyɛ, “Sɛ ebie koto kaka ne ne ye honi ne, ná ode ye nzorɛhyɛlɛ ne wɔ ye nwoma so, anaa ye sa nwo a,

¹⁰ sɔ sona ne koso kɔno Nyameɛ ahonehulɛ nzaa bɔ wahwie ye gyengɔgyengɔ wagua ye yaafɛlɛ kulie nu ne bie; na bɛkɔteetee ye wɔ see ne sɔfe nu wɔ abɔfo krongron mɔ nyunu ne Boaen Ba ne nyunu.

¹¹ Na nwosina bɔ ofi bɛ teeteelɛ nu ne, ɔkɔ anwuro afebɔɔ. Na bɛ bɔ bɛkoto kaka ne ne ye honi ne, yeɛ ebiala bɔ ode ye nzorɛhyɛlɛ dumaa nen, bengonya bɛ nwome biala bengole wɔ alehyeleɛ nu ne alesaleɛ nu.

¹²Na ɛhe hia anwoteefoɛ animia, bɛ bɔ bedi Nyameɛ ahyɛdeɛ so ná betira Yesu gyidie nu ne.”

¹³Na ndele kyɛ komviɛ bie fi nyameɛso odwudwo kyire me kyɛ, “Kyerɛ ɛhe: ‘Awufoɛ bɔ bewu Awurade nu fi kekesaala ye bɔ ɔkɔ ne, banya saleɛ.’ ” Na Sunzum ne nwa, “Amba, bekole bɛ nwome wɔ bɛ fɛɛ nwo, ofikyɛ bɛ nnwumaa li bɛ si.”

¹⁴ Afei nneane, na yieee, munungum fufue bie, na ebie bɔ ɔte so ɔ ɔte kyɛ Sona Awa ne, bɔ sikaa kɔkorɛ abotire bɔ ye, ná otira dadeɛ koateɛ nnaennaen bi ɔ.

¹⁵ Na abɔfo foforɛ bie fili asɔneyɛɛ sua ne anu fitele, na ɔfale komviɛ kandinga teane nu hyirele bɔ ɔte munungum ne aso ne kyɛ, “Fa wɔ dadeɛ koateɛ ne ná tete, ofikyɛ nnɔbaeɛ telɛ adwu, na aseɛ so nnɔbaeɛ aboro.”

¹⁶Na bɔ ɔte munungum ne aso ne hwene ye dadeɛ koateɛ ne siele aseɛ so, na ɔtele aseɛ so nnɔbaeɛ nemɔ.

¹⁷Na abɔfo foforɛ fili nyameɛso asɔneyɛɛ sua ne anu fitele, na né ye koso otira dadeɛ koateɛ nnaennaen bie.

¹⁸Na abɔfo foforɛ bɔ ole see so tumi ɔ ofili afɔleɛ bokyea ne anu fitele, na ɔfale komviɛ kandinga teane nu hyirele bɔ otira dadeɛ koateɛ nnaennaen ne kyɛ, “Fa wɔ dadeɛ koateɛ nnaennaen ne tete aseɛ so bobe mmaa biribiraa ne, ofikyɛ ye mma ne aboro.”

¹⁹Yiti abɔfo ne hwene ye dadeɛ koateɛ ne siele aseɛ so, na ɔtetele aseɛ so bobe mmaa nemɔ, na ogyi guale Nyameɛ ahonehulɛ kumaa piri bɔ betwi nzaa wɔ nu ne anu.

²⁰ Na betiatiale bobe mmaa ne aso wɔ kumaa bɔ betwi nzaa wɔ nu ne anu, wɔ kuro ne bondua, na mogya fili kumaa bɔ betwi nzaa wɔ nu ne anu hɔle anwuro oodwuli pɔngɔ tendenn, na ɔtengyɛle hɔle kɔyɛ kwanzii ɛyaa nyɔ.