Read Sehwi Nyekyire 15 Bible Online

Nyekyire 15 - Sehwi bible

Nyekyire 15

¹ Afei nwuni sɛngyerɛnneɛ foforɛ bie bɔ ɔte pirikua ná ɔyɛ nwanwa ɔ wɔ nyameɛso: Abɔfo nzoo bɔ betiratira ɛhawo nzoo bɔ ɔpɛ ye bo ɔ, bɔ yeɛ ɔpɛ Nyameɛ ahonehulɛ ne abo ɔ.

²Na nwuni nikyee bie bɔ ɔte kyɛ neanu po bɔ ɔne see bali afra ɔ. Na bɛ bɔ bali kaka ne ne ye honi ne, yeɛ ye nzorɛhyɛlɛ ne ye dumaa nwo ngondaa so ngonim ne, né begyigyi neanu po ne aso bɔ betiratira Nyameɛ sangoo ɔ.

³ Né bɛto Nyameɛ akoaa Mose dwein ne Boaen Ba ne dwein kyɛ, “Tuminiɛ Awurade Nyameɛ, wɔ nnwumaa te mbiri mbri na ɔyɛ nwanwa. Maen maen mɔ Hene,[5] w’atee tengyɛ, na ɔte nahorɛ.

⁴ O, Awurade, nwa yeɛ ongosuro wɔ ná ɔngɔhyɛ wɔ dumaa animnyam ɔ? Ofikyɛ wɔ ngome yeɛ ɛte krongron ɔ. Maen maen amukoraa kɔwa kɔɔkoto wɔ, ofikyɛ wɔ ndɛenbualɛ turoloo ne ala ali.”

⁵ Na ɛhemɔ asi ne, nneane, na nwuni kyɛ babukye adanzeɛ ɛtena sua asɔneyɛɛ sua ne wɔ nyameɛso.

⁶ Na abɔfo nzoo nemɔ bɔ betiratira ɛhawo nzoo ne, befili asɔneyɛɛ sua ne anu befitele, bɔ né bewurawura nwera fufue hyɛnn, ná bafa sikaa kɔkorɛ abɔsoɛ babobɔ b’afia ɔ.

⁷Yeɛ abɔdeɛ ateasefoɛ nna nemɔ, bɛ nu ko mane abɔfo nzoo nemɔ sikaa kɔkorɛ kulie nzoo, bɔ Nyameɛ bɔ ɔte ase afebɔɔ ne, ye ahonehulɛ ayi bɛ tɛkyɛ ɔ.

⁸ Na nwosina bɔ ofi Nyameɛ animnyam nu ɔne ye tumi nu ne, ɔyɛle asɔneyɛɛ sua ne anu munguu, na ebiala angora anwura asɔneyɛɛ sua ne anu kɔpem kyɛ abɔfo nzoo nemɔ bɛ hawo ne bo pɛle ɔ.