Read Sehwi Nyekyire 17 Bible Online

Nyekyire 17 - Sehwi bible

Nyekyire 17

¹ Afei abɔfo nzoo bɔ betiratira kulie nzoo ne, bɛ nu ko wale me berɛ oosele me kyɛ, “Bra ma ngyire wɔ ndɛenbualɛ bɔ bafa babua adwamanbɔlɛniɛ pirikua bɔ ɔte nzue pee so ne ɔ.

² Ye yeɛ ewiase ahemvo mɔ bɛne ye babɔ adwaman, ná ye adwamanbɔlɛ nzaa ne wabobo aseɛsofoɛ ɔ.”

³ Yiti ɔfale me wurale sunzum nu hɔle ɛserɛ so. Na nwuni braa bie bɔ ɔte kaka kɔkorɛ bie aso, bɔ musue dumaa mɔ wɔ ye nwo amukoraa, bɔ ole tire nzoo ne mmɛen buru ɔ.

⁴ Né braa ne hera ɛtena kɔkorɛ gonn ne afasebire. Né wafa sikaa kɔkorɛ ne mbembenanneɛ ne afire paa wasiesie ye nwo, na né otira sikaa kɔkorɛ kulie bɔ akyiwadeɛ mɔ ne ye adwamanbɔlɛ fiɛ ne wayi ye tɛkyɛ ɔ.

⁵Né bahyerɛ dumaa bie bagua ye nwoma so kyɛ, “Mvealeɛ nu dwirɛ! Babilɔn pirikua ne! Aseɛ so adwamanbɔlɛfoɛ ne akyiwadeɛ mɔ bɛ maame!”

⁶Na nwuni kyɛ anwoteefoɛ mogya ne Yesu adanzefoɛ mogya wabo braa ne; na nwuni ye nen, ɔyɛle me nwanwa paa.

⁷ Na abɔfo ne bisale me kyɛ, “Nzu ati yeɛ ɔyɛ wɔ nwanwa ye? Na braa ne ne kaka bɔ ɔsoa ye, bɔ ole tire nzoo ne mmɛen buru ne, ngɔhã bɛ nwo mvealeɛ nu dwirɛ ngohyire wɔ.

⁸Kaka bɔ enwuni ye ne, mmerɛ bie né ɔwɔ berɛ, nakoso afei de, ɔnne berɛ; na ɔbaafi aseɛ bo dɔ kumaa kuronguronn ne anu fite ba, ná wahɔ ɛsɛkyelɛ nu. Na bɛ bɔ bɛte aseɛ so bɔ bamvi wiase ahyɛaseɛ bangyerɛ bɛ dumaa wɔ ngoa nwomaa ne anu ne, sɛ benwu kaka ne a, ɔkɔyɛ bɛ nwanwa, kyɛ mmerɛ bie né ɔwɔ berɛ, ɔnne berɛ, nakoso ɔwɔ berɛ ɔ.

⁹“Na ɛhe hia adwene bɔ nworɛ wɔ nu ɔ: Tire nzoo ne te mmokaa nzoo bɔ braa ne te so ɔ.

¹⁰Bɛte ahemvo nzoo. Bɛ nu nnu atɔ ase, ko wɔ berɛ, yeɛ ko ne onnya ɔwwale; na sɛ ɔba a, ɔsɛ kyɛ ɔtena berɛ mmerɛ kãa bie.

¹¹Na kaka bɔ mmerɛ bie né ɔwɔ berɛ, ná afei de ɔnne berɛ ko ne, ye komapɛ ne ala yeɛ ɔtɔ so mmɔtwɛ ɔ, nakoso ɔboka nzoo ne aso, na ɔkɔ ɛsɛkyelɛ nu.

¹² “Na mmɛen buru bɔ enwuni bɛ ne, bɛte ahemvo buru bɔ bɛ sa onnya ɔhhane ahennie ɔ, nakoso bɛne kaka ne bekonya tumi kyɛ ahemvo dɔnhwere ko.

¹³Bɛ mukoraa bayɛ adwene ko, na bɛkɔfa b’anwoserɛ ne bɛ tumi bɛkɔma kaka ne.

¹⁴ Bɛkɔfa koɛ bɛkɔteta Boaen Ba ne, na Boaen Ba ne koli bɛ so ngonim; ofikyɛ ɔte meneɛ mɔ nu Meneɛ ne ahemvo mɔ nu Hene; na bɛ bɔ bɛboka ye so ne, wafrɛ bɛ, waneanea nu waye bɛ, na bedi nahorɛ.”

¹⁵ Na osele me kyɛ, “Nzue mɔ bɔ enwuni bɛ, bɔ adwamanbɔlɛniɛ ne ɔte so ne, bɛte mmenia, ɛlɔen, maen maen ne edwudwolɛ mɔ.

¹⁶ Na mmɛen buru bɔ enwuni bɛ ne, bɛ ne kaka ne bɛkɔpɔ adwamanbɔlɛniɛ ne; bɛkɔyɛ ye pasapasa ná baye ye nwo bato so, bekoli ye naen, ná bafa see bayera ye.

¹⁷ Ofikyɛ Nyameɛ amaa banya adwene ko kyɛ bɛ́ma ye nhyehyɛleɛ bra nu, kyɛ bénya adwene ko, ná bɛfa b’ahennie ne bɛma kaka ne, kɔpem kyɛ Nyameɛ noa dwirɛ ne kɔwa nu ɔ.

¹⁸ Na braa bɔ enwuni ye ne, ye ole kuro piri bɔ odi aseɛ so ahemvo mɔ so hene ne.”