Read Sehwi Nyekyire 4 Bible Online

Nyekyire 4 - Sehwi bible

Nyekyire 4

¹Na ɛhe asi ne, ndole me nye, na nwuni kyɛ babukye anoa bie wɔ nyameɛso. Na komviɛ bɔ nnili moa ndele bɔ ɔte kyɛ totorobɛndo bɔ odwudwu hyirele me, osele me kyɛ, “Fo bra anwuro wa, na ngohyire wɔ nningyein bɔ ɔsɛ kyɛ ɛhemɔ asi ne besisi ɔ.”

² Na berɛ ne ala, né nwɔ Sunzum nu. Na yieee, né ahennie bia bie gyi nyameɛso, bɔ ebie te ahennie bia ne aso ɔ.

³Na bɔ ɔte so ne, ɛnea a, ɔte kyɛ nyɔboɛ bɔ oli yasepa ne kokwaboba, yeɛ nyangondoen bɔ ɛnea, ɔte kyɛ dɛngyɛmmoɛ ɔ wapɛ ahennie bia ne anwo wayia.

⁴Né ahennie bia aburanyɔ ne nna bapɛ ahennie bia ne anwo bayia, na nwuni mbanyi aburanyɔ ne nna bɔ bewurawura ndaadeɛ fufue, bɔ sikaa kɔkorɛ abotire bobɔ bɛ ɔ kyɛ bɛtete ahennie bia nemɔ so.

⁵ Na agralaa ne komviɛ ahoroɔ ne nu bobɔlɛ kurudududu fili ahennie bia ne anu wale. Na see nganea nzoo bɔ bɛte Nyameɛ Sunzum nzoo ne, né begye wɔ ahennie bia ne anyunu berɛ.

⁶ Né nikyee bie bɔ ɔte kyɛ neanu po, bɔ ye nye te kaenn kyɛ neanu ɔ ɔwɔ ahennie bia ne anyunu berɛ. Yeɛ né abɔdeɛ ateasefoɛ nna bɔ anyeɛ tuatua bɛ nyunu ne bɛ si ɔ bɛwɔ ahennie bia ne anwo wɔ ye afia berɛ.

⁷ Abɔdeɛ teasefoɛ bɔ oli moa ne te kyɛ gyata, bɔ ɔtɔ so nyɔ ne te kyɛ nandwie ba, bɔ ɔtɔ so nza ne nyunu soma kuro sona, yeɛ bɔ ɔtɔ so nna ne te kyɛ kɔleɛ bɔ otu ɔ.

⁸ Na abɔdeɛ ateasefoɛ nna ne, nu biala le ndaa nzia, na anyeɛ tuatua bɛ nwo ne bɛ nu amukoraa, na alehyeleɛ ne alesaleɛ biala bɛto dwein bɔ bɛnyakyi ɔ, kyɛ, “Tuminiɛ Awurade Nyameɛ, ɔte krongron, krongron, krongron ye yeɛ ɔwɔ berɛ fi tetetete, ɔwɔ berɛ kekesaala ye, ná ɔbaawa ne!

⁹ Na sɛ abɔdeɛ ateasefoɛ nemɔ bɛfa animnyam, anidie ne asennaa bɛma bɔ ɔte ahennie bia ne aso, bɔ ɔte ase afebɔɔ ne a,

¹⁰mbanyi aburanyɔ ne nna nemɔ bɛfa bɛ nyunu bebutubutu bɔ ɔte ahennie bia ne aso ne nyunu berɛ, na bɛsɔne bɔ ɔte ase afebɔɔ ne; na betutu b’abotire nemɔ begua ahennie bia ne nyunu bɛkã kyɛ,

¹¹“Y’Awurade ne yɛ Nyameɛ, ɛfata kyɛ ede animnyam, anidie ne tumi, ofikyɛ wɔ yeɛ ɛbɔle nningyein amukoraati, wɔ pɛ ti yeɛ bɛwɔ berɛ ɔ, na wɔ pɛ ti yeɛ ɛbɔle bɛ ɔ.”