Read Sehwi Nyekyire 5 Bible Online

Nyekyire 5 - Sehwi bible

Nyekyire 5

¹ Na bɔ ɔte ahennie bia ne aso ne, ye sa famaa nu, nwuni nwomaa bie bɔ babobɔ ɔ, bɔ bahyerɛ ye nyunu ne ye si, bɔ bafa nzɔanoɛ nzoo basɔ ye noa ɔ.

²Na nwuni abɔfo anwoserɛniɛ bie bɔ ɔteane nu bisale kyɛ, “Nwa yeɛ ɔfata kyɛ obukye nwomaa bɔ babobɔ ne anu ná ɔtete ye nzɔanoɛ nemɔ ɔ?”

³Na ebiala nne nyameɛso, anaa aseɛ so, anaa aseɛ bo bɔ ɔhora bukyele nwomaa bɔ babobɔ ne anu anaa ɔneane nu ɔ.

⁴Na nzuni pee, ofikyɛ bannya ebiala bɔ ɔfata kyɛ obukye nwomaa bɔ babobɔ ne anu anaakyɛ ɔnea nu ɔ.

⁵ Yeɛ mbanyi nemɔ nu ko sele me kyɛ, “Nea, nnɛsũ, na Yuda abusua kure nu Gyata ne, Dawide Ndii ne, wali ngonim bɔ okobukye nwomaa ne anu, ná ɔkɔtete ye nzɔanoɛ nzoo nemɔ anu ɔ.”

⁶Na nneane, na yieee, ahennie bia ne ne abɔdeɛ ateasefoɛ nna ne ne mbanyi nemɔ b’afia berɛ, né Boaen Ba bie gyi berɛ bɔ osoma kyɛ bahũ ye ɔ. Ole mmɛen nzoo ne anyeɛ nzoo, bɔ bɛte Nyameɛ Sunzum nzoo bɔ wasoma bɛ wɔ aseɛ so amukoraa ɔ.

⁷Oolele nwomaa bɔ babobɔ ne fili bɔ ɔte ahennie bia so ne sa famaa nu.

⁸Na mmerɛ bɔ olele nwomaa bɔ babobɔ nen, abɔdeɛ teasefoɛ nna ne ne mbanyi aburanyɔ ne nna ne bɛfale bɛ nyunu bebutubutuli ase wɔ Boaen Ba ne nyunu; bɔ bɛ mukoraa betiratira sangoo ne sikaa kɔkorɛ kulie mɔ bɔ ɛyɛɛ, bɔ ɔte anwoteefoɛ mbaeɛ ɔ wayi bɛ tɛkyɛ ɔ.

⁹Na bɛtole dwein foforɛ bie kyɛ, “Ɛfata kyɛ ede nwomaa bɔ babobɔ ne ná ebukye ye nzɔanoɛ nemɔ ɔ; ofikyɛ behuni wɔ, na afa wɔ mogya atɔ adasa mmaa[1] ama Nyameɛ afi mmusua kure ne edwudwolɛ ne mmenia ne maen biala nu,

¹⁰na ayɛ bɛ ahennie maen ne asɔfo ama yɛ Nyameɛ, na bekoli aseɛ so hene.”

¹¹Afei ndole me nye, na ndele abɔfo pembepembe bɔ bapɛ ahennie bia ne ne abɔdeɛ ateasefoɛ nemɔ ne mbanyi nemɔ nwo bayia ɔ bɛ komvi; na né bɛ somaa te apee buru apee buru ahoroɔ ne apee apee.

¹²Na bɛteane nu bɛhane kyɛ, “Boaen Ba bɔ behuni ye ne, ɔfata kyɛ ode tumi, anwonya, nworɛ, anwoserɛ, anidie, animnyam ne saleɛ!”

¹³Na abɔdeɛ biala bɔ ɔwɔ nyameɛso ne aseɛ so ne aseɛ bo ne ɛpo nu ne bɔ ɔwɔ bɛ nu amukoraa, ndele kyɛ bɛkã kyɛ, “Saleɛ ne anidie ne animnyam ne tumi ɔyɛ bɔ ɔte ahennie bia ne aso ne ɔne Boaen Ba ne deɛ afebɔɔ.”

¹⁴Na abɔdeɛ ateasefoɛ nna nemɔ sele kyɛ, “Amen.” Yeɛ mbanyi nemɔ bɛfale bɛ nyunu bebutubutuli berɛ bɛsɔnene [bɔ ɔte ase afebɔɔ ne].