Read Sehwi Nyekyire 6 Bible Online

Nyekyire 6 - Sehwi bible

Nyekyire 6

¹Na nwuni kyɛ Boaen Ba ne wate nzɔanoɛ nemɔ anu ko noa, yeɛ ndele kyɛ abɔdeɛ ateasefoɛ nna nemɔ anu ko ole komviɛ bɔ ɔte kyɛ esue bɔ ɔbɔ nu kurudududu ɔ ɔkã, “Baanea!”

² Nneane, na nwuni pɔngɔ fufue bie. Na bɔ ɔte ye so ne, né otira agyaen; na bɛmane ye abotire, na ofili berɛ hɔle oolili ngonim, na ɔhɔle so lili ngonim.

³Na ɔtele nzɔanoɛ bɔ ɔtɔ so nyɔ ne noa nen, ndele kyɛ abɔdeɛ teasefoɛ bɔ ɔtɔ so nyɔ ne ɔkã kyɛ, “Baanea!”

⁴ Na pɔngɔ foforɛ kɔkorɛ gonn bie yele ye ti, na bɛmane bɔ ɔte ye so ne tumi kyɛ ɔye asomdwee fi aseɛ so, ná behũhũ bɛ nwo bɛ nwo, na bɛmane ye ngrandɛ pirikua bie.

⁵ Na ɔtele nzɔanoɛ bɔ ɔtɔ so nza ne noa nen, ndele kyɛ abɔdeɛ teasefoɛ bɔ ɔtɔ so nza ne ɔkã kyɛ, “Baanea!” Nneane, yieee, pɔngɔ bire bie, na né bɔ ɔte ye so ne otira tonyi.

⁶Na ndele komviɛ bie mvili abɔdeɛ teasefoɛ nna nemɔ b’afia berɛ kyɛ, “Aburoo kongo ko te denare ko,[2] yeɛ atokoɔ kongo nza te denare ko; nakoso ngoo ne nzaa de, nnɛsɛkye bɛ.”

⁷Na ɔtele nzɔanoɛ bɔ ɔtɔ so nna ne noa nen, ndele kyɛ abɔdeɛ teasefoɛ bɔ ɔtɔ so nna ne ɔkã kyɛ, “Baanea!”

⁸ Nneane, na nwuni pɔngɔ hoyaa bie; na bɔ ɔte ye so ne dumaa li Ewue, na Ɛborɔ li ye si. Na bɛmane bɛ tumi wɔ aseɛ ngyɛmuɛ nna nu ko so, kyɛ bɛfa ngrandɛ, ɛhɔen, anwonyerɛ ne aseɛ so ngaka aboyaa behũhũ bɛ.

⁹Na ɔtele nzɔanoɛ bɔ ɔtɔ so nnu ne noa ne, bɛ bɔ ɔnate Nyameɛ dwirɛ ne ne b’adanzeɛ bɔ belili ti behuni bɛ ne, nwuni bɛ kra mɔ wɔ afɔleɛ bokyea ne abo.

¹⁰ Na bɛteane nu serɛserɛ kyɛ, “O, Awurade Tuminiɛ, Krongronniɛ ne Nahorɛniɛ, engobua ndɛen, yeɛ ɛngɔtɔ bɛ bɔ bɛte aseɛ so wereɛ wɔ yɛ mogya nwo maa okoodwu kyinzu?”

¹¹Yeɛ bɛmane bɛ nu ko biala ataadeɛ fufue, na besele bɛ kyɛ bɛnwondɛ mmerɛ kãa bie bieku, ma oodwu kyɛ bɛ mmango asomvoɛ ne b’eliɛma mɔ bɔ bekohũhũ bɛ kyɛ bɛ koso ala ne bɛ somaa ɔkɔsõ ɔ.

¹² Na ɔtele nzɔanoɛ bɔ ɔtɔ so nzia ne noa ne, nneane, na yieee, aseɛ wosole serɛserɛ; na eyia yɛle tunn kyɛ brisie, na ɛsraen yɛle kyɛ mogya;

¹³ na ewienu nzramaa tutu guale ase te kyɛ borɔdoma bɔ mvrama piri woso ye ɔporo ye mma amui gua ɔ.

¹⁴ Na ewienu tu minini te kyɛ nwomaa bɔ babobɔ ɔ, na mmokaa ne supɔ mukoraa tutu fili bɛ boso.

¹⁵ Na aseɛ so ahemvo, atitirefoɛ, esikafoɛ, safohene mɔ, anwoserɛfoɛ, yeɛ ngoaa ne nnehyeɛ amukoraa bɛfeafeale ngumaa mɔ nu ne mmokaa so nyɔbotaen mɔ nu.

¹⁶ Na besele mmokaa ne nyɔbotaen nemɔ kyɛ, “Ɛ́mɔdwiri begua yɛ so, ná ɛ́mɔfa yɛ bɛfea béfi bɔ ɔte ahennie bia ne aso ne nyunu, ɔne Boaen Ba n’ahonehulɛ nu;

¹⁷ ofikyɛ ye ahonehulɛ kyẽa piri ne adwu, na nwa yeɛ ɔkɔhora kogyina ye noa ɔ?”