Read Sehwi Rutu 4 Bible Online

Rutu 4 - Sehwi bible

Rutu 4

¹Boase hɔle kuro berɛ pambim ne anwo ɔɔtenane ase. Wangyɛ yeɛ busuaniɛ bɔ Boase hane ye dwirɛ ne koso ɔɔpɛle nu berɛ ɔ. Na Boase frɛle ye kyɛ, “Nniɛma, bra wa baatena ase.” Na opingyele ye ɔɔtenane ase.

²Yeɛ Boase frɛle kuro berɛ mbanyi nemɔ anu buru, na osele bɛ kyɛ, “Ɛ́mɔtena wa.” Na bɛtenatenane berɛ.

³Afei osele busuaniɛ ne kyɛ, “Naomi bɔ wafi Moabo aseɛ so wawa ne, ɔbaatɔne yɛ abusuaniɛ Elimɛlɛke ye aseɛ.

⁴Yiti mayɛ kyɛ meye w’asotire kyɛ, pɔ aseɛ ne wɔ mbanyi bɔ bayia wa ye, ɔne me maen mbanyi ye mɔ bɛ nyunu. Sɛ ɛkɔpɔ aseɛ ne a, pɔ ye; nakoso sɛ ɛngɔpɔ ye de a, ka kyire me maa nwu ye, ofikyɛ sona biala nne berɛ bɔ osã wɔ nwo ɔpɔ aseɛ ne a ɔyɛ yé ɔ. Sɛ ambɔ aseɛ ne a, yeɛ mekora mepɔ ye ɔ.” Na obuale kyɛ, “Ngɔpɔ aseɛ ne.”

⁵Yeɛ Boase toale so hane kyɛ, “Kyẽa bɔ ɛkɔpɔ sɔ aseɛ ne wɔ Naomi sa nu ne, ye de Moaboniɛ Rutu, bɔ ɔte biaa bɔ wawu ne kunaniɛ ne, odi kyɛ egya ye, amaa ɔnate so biaa bɔ wawu ne, ye dumaa ahɔ so wala ye agyapadeɛ so.”

⁶Yeɛ abusuaniɛ ne tele sɔ dwirɛ nen, ɔhane kyɛ, “Sɛ mepɔ agyapadeɛ ye mefa a, me mma kɔhwere me bɔbɔ deinn m’agyapadeɛ deɛ. Agyapadeɛ bɔ ahaa me yeɛ odi kyɛ mepɔ ne, kɔpɔ fa, ofikyɛ mengɔhora ngɔpɔ ye.”

⁷ Daa ne, Yisrael maen nu, agyapadeɛ pɔlɛ ne ye tɔnenɛ nwo amammerɛ bɔ né ɔwɔ berɛ hɔ ɛhe: bɔ bɛfa bɛta edwirɛ ne abo ole kyɛ, sona bɔ ɔtɔne ye, ɔne sona bɔ ɔtɔ ne, ebiala ɔye ye mbaboa ko ma obiɛngo. Ɛhe yeɛ né bɛfa bedi edwirɛ nwo adanzeɛ wɔ Yisrael ɔ.

⁸Yiti mmerɛ bɔ abusuaniɛ ne sele Boase kyɛ, “Pɔ agyapadeɛ ne fa” ne, ɔyele ye mbaboa ko.

⁹Yeɛ Boase sele mbanyi nemɔ ne mmenia nemɔ amukoraa kyɛ, “Ɛnɛ ɛmɔdi adanzeɛ, kyɛ Elimɛlɛke, Kilion ne Malon b’agyapadeɛ biala, mapɔ mafi Naomi sa nu.

¹⁰ Afei koso, Moaboniɛ Rutu, bɔ né ɔte Malon aye ne, magya ye, amaa ɔnate so sona bɔ wawu ne, ye dumaa ahɔ so wala ye agyapadeɛ so; amaa ɔnate so sona bɔ wawu ne, ye dumaa angyikyi wamvi ye abusua ɔne ye kuro nu. Ɛnɛ, ɛmɔte m’adanzefoɛ.”

¹¹ Yeɛ mmenia bɔ né baayia pambim ne anu berɛ ne amukoraa, bɛ ne mbanyi nemɔ bebuale kyɛ, “Yɛdi adanzeɛ. Braa ye bɔ ɛkwaagya ye ba w’awuro ne, AWURADE ma ɔyɛ kyɛ Rahɛl ne Lea, bɔ bɛ munyɔ yeɛ besuli Yisrael awuro ama nen. AWURADE ma wɔ boso trɛ wɔ Efrata, ná ɛyɛ sona titire wɔ Betlehem.

¹² Na ngwadaa bɔ AWURADE kɔfa taluwa he aso ma wɔ sa kɔha bɛ ne, yɛsrɛ kyɛ AWURADE ɔfa bɛ so ma w’awuro ama bɛyɛ kyɛ Yuda ne Tamar bɛ wa Pɛrɛse ye awuro ama.”

¹³Yiti Boase gyale Rutu maa ɔɔyɛle ɔye, na ɔne ye bɛlale. Na AWURADE mane Rutu nwonzɛle, na ɔwole baa bienzua.

¹⁴Yeɛ mmrasua nemɔ sele Naomi kyɛ, “Animnyam hã AWURADE bɔ ɛnɛ kyẽa ye wamaa anya koliagyaa wɔ w’awuro ɔ. AWURADE ɔma ɔyɛ sona titire wɔ Yisrael!

¹⁵Ɔkɔmaa ekonya wɔ boso ama, ná wama wɔ wɔ noa aleɛ wɔ wɔ nworowaa nu. Ofikyɛ wɔ sia bɔ okuro wɔ dwirɛ, bɔ yeɛ ɔtra mmaa mmienzua nzoo ma wɔ ne, ye yeɛ ɔwole ye ɔ.”

¹⁶Yeɛ Naomi mane akwadaa ne aso fale ye bɔle ye hue so, na ɔyɛle akwadaa ne neafoɛ.

¹⁷Mandamu berɛ mmrasua nemɔ tole akwadaa ne dumaa, na bɛhane kyɛ, “Bawo baa bienzua bama Naomi.” Bɛtole ye dumaa Obɛde; na ye yeɛ ɔwole Yese, bɔ yeɛ ɔte Dawide baba ne.

¹⁸Pɛrɛse boso ama mɔ ɛhe: Pɛrɛse wole Hesron;

¹⁹Hesron wole Ram; Ram wole Aminadabo;

²⁰Aminadabo wole Nason; Nason wole Salmon;

²¹Salmon wole Boase; Boase wole Obɛde;

²²Obɛde wole Yese, yeɛ Yese wole Dawide.