Read Sehwi 1 Samuel 15 Bible Online

1 Samuel 15 - Sehwi bible

1 Samuel 15

¹ Samuel sele Sɔɔlo kyɛ, “Me yeɛ AWURADE somane me maa mvale ɛpopalɛ ngoo mmanguale wɔ ti so nzili wɔ ye maen so hene ɔ. Afei, tie AWURADE noa dwirɛ.

² Asafo AWURADE nwa nyoo, ‘Ngotua Amalɛkefoɛ so kerɛ, ɔnate kyɛ mmerɛ bɔ né Yisraelfoɛ béfi Misraim bɛ́ba ne, bɛɛtɛle bɛ atunu bɛ ne bɛ hone.

³Yiti kɔ na kohũ Amalɛkefoɛ, ná sɛkye bɔ bele ye amu bɔkɔɔ. Nnɛma ebiala nya ye ti didi nu, na mmom ku mmienzua ne mmrasua, ngwadaa ne nnɔma, nandwie ne mmoaen, afupɔngɔ ne afunum.’ ”

⁴Yiti Sɔɔlo tole ye sa frɛle koɛhonɛfoɛ nemɔ maa beyiale, na ɔhale bɛ wɔ Telaim. Né bɛ somaa te koɛhonɛfoɛ apee ɛyaa nyɔ bɔ bɛnate ase ɔ, ɔne Yuda koɛhonɛfoɛ apee buru.

⁵Afei Sɔɔlo ne koɛhonɛfoɛ nemɔ hɔle beedwuli Amalɛke kuro piri ne aso, na bɛɛtɛle bɔnza ne anu dɔ.

⁶Na Sɔɔlo sele Kenifoɛ kyɛ, “Ɛmɔhɔ! Ɛ́mɔfi Amalɛkefoɛ mɔ nu bɛ́nwati bɛ́hɔ, ná mangu ɛmɔ mamvra bɛ. Ɔnate kyɛ, mmerɛ bɔ né Yisraelfoɛ befi Misraim bɛ́ba ne, ɛmɔyɔle bɛ mukoraa paa.” Yiti Kenifoɛ fili Amalɛkefoɛ nu bɛnwati bɛhɔle.

⁷Sɔɔlo lili Amalɛkefoɛ so ngonim fite Hawila toonn oodwuli Sure bɔ ɔwɔ Misraim eyia afiteleɛ ne.

⁸Ɔhyele Amalɛkefoɛ hene Agage anyekaenn so, nakoso mmenia ne amu de, ɔfale ngrandɛ huhuni bɛ bɔkɔɔ.

⁹Sɔɔlo ne koɛhonɛfoɛ nemɔ bangu Agage, mmoaen ne nandwie paa nemɔ, nandwie sayɛɛ nemɔ, ɔne mmoaen mmaa nemɔ, yeɛ banzɛkye nikyee biala bɔ ɔte paa ɔ. Banguro kyɛ bekohu bɛ ɔ. Nakoso nikyee biala bɔ bebuli ye kyɛ ɔtte mayee ná ye nwo olle mvasoɛ ne de, bɛsɛkyele ye bɔkɔɔ.

¹⁰AWURADE lale ye dwirɛ ali hyirele Samuel kyɛ,

¹¹“Ɔyɛ me yea kyɛ mvale Sɔɔlo nzili hene ɔ, ofikyɛ wayakyi me si lilɛ, na onni me mmeraa so.” Sɔ dwirɛ ne hale Samuel, na osũ frɛle AWURADE kɔngɔen ne amukoraa.

¹²Samuel pɛle aleɛ dwɔsole kyɛ ɔkwaapena Sɔɔlo. Na bɛha behyirele Samuel kyɛ, “Sɔɔlo ahɔ Kamɛl, nekaa bɔ wasi ngayeɛ nikyee wafa wahyɛ ye nwo animnyam ne, na waase wapɛ nu wahɔ Gilgal.”

¹³Na Samuel dwuli Sɔɔlo nwo berɛ ne, Sɔɔlo sele ye kyɛ, “AWURADE yira wɔ oo! Bɔ AWURADE hyɛle me kyɛ nyɔ ne, mayɔ.”

¹⁴Nakoso Samuel bisale kyɛ, “Mmoaen suɛ bɔ ogua me so anu ye, ɔne nandwie suɛ bɔ mete ye koso ɛ?

¹⁵Yeɛ Sɔɔlo buale kyɛ, “Amalɛkefoɛ mɔ dɔ yeɛ koɛhonɛfoɛ nemɔ bɛ ne bɛ fi wale ɔ, ofikyɛ bɛyakyili mmoaen paa ne nandwie paa nemɔ kyɛ bɛbaafa bɛbɔ afɔleɛ bɛma AWURADE wɔ Nyameɛ. Nakoso bɛ ngaa nemɔ de, yahũhũ bɛ bɔkɔɔ.”

¹⁶Yeɛ Samuel sele Sɔɔlo kyɛ, “Pɛ so! Maa nga bɔ AWURADE ha hyirele me ɛnɛ kɔngɔen ye ngyire wɔ.” Na osele kyɛ, “Kã e.”

¹⁷ Na Samuel sele kyɛ, “Ɔwɔ nu kyɛ ebu wɔ nwo kyɛ ɛte kwahweabaa bie de, nakoso aso nna wɔ yeɛ ɛla Yisrael mmusua kure nemɔ noa ɔ? AWURADE popale wɔ ngoo fale wɔ lili Yisrael so hene;

¹⁸na AWURADE somane wɔ fale adwuma wurale wɔ sa kyɛ, ‘Sɔ Amalɛkefoɛ bɔnefoɛ nemɔ, kohũhũ bɛ bɔkɔɔ, na fa koɛ toa bɛ toonn kɔpem kyɛ bɛ boso konua ɔ.’

¹⁹Nzu ati yeɛ anni AWURADE dwirɛ so ɔ? Nzu ati yeɛ ɛfene koɛ nu nzesadeɛ ne, maa ɔnate so ɛyɔle AWURADE nyunu bɔne ɔ?”

²⁰Na Sɔɔlo buale Samuel kyɛ, “Mali AWURADE dwirɛ so. Adwuma bɔ AWURADE somane me fa wurale me sa ne, mayɔ. Mahye Amalɛke hene Agage mawa, na mahuhu Amalɛkefoɛ bɔkɔɔ.

²¹Nakoso koɛ nu nzesadeɛ ne, bɔ AWURADE atu asie berɛ kyɛ bɛsɛkye ye ne, koɛhonɛfoɛ nemɔ fale mmoaen paa ne nandwie paa ne bie, kyɛ bɛbaafa bɛbɔ afɔleɛ bɛma AWURADE wɔ Nyameɛ wɔ Gilgal.”

²² Nakoso Samuel hane kyɛ, “Aso AWURADE nye gye naen yeralɛ afɔleɛ ne afɔleɛ mɔ nwo tra kyɛ ekotie AWURADE dwirɛ ɔ? Nahorɛ nu, sotie te paa tra afɔleɛbɔlɛ, yeɛ asoɛ mmerɛlɛyɛlɛ te paa tra boaen nyii loe.

²³ Ofikyɛ ɛlɔenyɛlɛ ɔte bɔne kyɛ ahɔenlilɛ ne ala, yeɛ asoserɛ te kyɛ amumuyɛɛ ne amoensɔlɛ. Na ɔnate kyɛ apo AWURADE dwirɛ ne ati, wɔ hene bɔ edi ne, ye koso waye ye sa wafi wɔ bo.”

²⁴Yeɛ Sɔɔlo sele Samuel kyɛ, “Mayɔ bɔne kyɛ mabu AWURADE mmeraa ne wɔ noa dwirɛ so ɔ, ofikyɛ nzurole koɛhonɛfoɛ nemɔ, na ndiele bɛ dwirɛ.

²⁵Yiti mesrɛ wɔ ala, fa me bɔne kyɛ me, ná ɛne me sa hɔ ma ngɔnzɔne AWURADE.”

²⁶Na Samuel sele Sɔɔlo kyɛ, “Me ne wɔ ngosa ngɔhɔ, ofikyɛ apo AWURADE dwirɛ. Na Yisrael so hene bɔ edi ne, AWURADE koso waye ye sa wafi wɔ bo.”

²⁷ Na Samuel kakyili ye nwo bɔ ɔkɔ nen, Sɔɔlo sɔle ye ataadeɛ tendenn ne noa, na nu suale.

²⁸Yeɛ Samuel sele ye kyɛ, “AWURADE ale Yisrael ahennie ne wafi wɔ sa nu ɛnɛ kyẽa ye, na wafa wama sona foforɛ bɔ ɔte paa tra wɔ ɔ.

²⁹ Asa koso, Yisrael Animnyam ne, ɔtte nnakannakaniɛ, yeɛ ɔnzesã ye adwene, ofikyɛ ɔtte kuro sona ná wasesã ye adwene.”

³⁰Na Sɔɔlo buale ye kyɛ, “Mayɔ bɔne de, nakoso mesrɛ wɔ ala, nnɛgua me nyunu ase wɔ me maen mbanyi ne Yisrael nyunu. Ɛne me sa hɔ ma ngɔnzɔne AWURADE wɔ Nyameɛ.”

³¹Yiti Samuel lili Sɔɔlo si ɔne ye bɛhɔle, na Sɔɔlo sɔnene AWURADE.

³²Afei Samuel sele kyɛ, “Ɛ́mɔfa Amalɛkefoɛ hene Agage bɛ́brɛ me!” Na Agage wale ye nwo berɛ bɔ né ye gya to brabra nu ɔ. Yeɛ Agage hane kyɛ, “Amba, ewueyealɛ ato me.”[12]

³³Na Samuel sele kyɛ, “Kyɛbɔ wɔ ngrandɛ ama mmrasua bafa bɛ sa bafi terɛ ne, sɔ ala yeɛ mmrasua mɔ nu wora, eni kɔfa ye sa kofi terɛ ɔ.” Na Samuel pepɛle Agage nu ahuronzi ahuronzi wɔ AWURADE nyunu wɔ Gilgal.

³⁴Afei Samuel hɔle Rama, yeɛ Sɔɔlo koso hɔle ye kuro Gibea.

³⁵Na Samuel nye ammɔ Sɔɔlo nyunu ko kɔpem kyɛ Samuel wuli ɔ, nakoso Samuel lili Sɔɔlo nwo aworabɔlɛ. Na ɔyɛle AWURADE yea kyɛ wafa Sɔɔlo wali Yisrael so hene ɔ.