Read Sehwi 1 Samuel 16 Bible Online

1 Samuel 16 - Sehwi bible

1 Samuel 16

¹ AWURADE bisale Samuel kyɛ, “Kyinzu koraa yeɛ ekoli Sɔɔlo nwo aworabɔlɛ maa okoodwu ɔ? Maye me sa mafi ye bo maa ye sɔ ati ɔtte Yisrael so hene ko. Fa ngoo gua wɔ towaa ne anu ná si nu kɔ. Mésoma wɔ Betlehemniɛ Yese berɛ, ofikyɛ ye mma nemɔ anu ko yeɛ me bɔbɔ maye ye kyɛ oli hene ɔ.”

²Na Samuel bisale kyɛ, “Ɔkɔyɛ sɛɛ né mahora mahɔ? Sɛ Sɔɔlo te sɔ dwirɛ ne a, okohu me.” Na AWURADE buale kyɛ, “Ɛkɔ a, fa nandwie beleɛ akrɔngrɔma ko kɔ, ná kɔha kyɛ, ‘Mawa kyɛ mebaabɔ afɔleɛ mema AWURADE.’

³To wɔ sa frɛ Yese maa ɔbra afɔleɛ ne abo, na me bɔbɔ ngohyire wɔ nikyee bɔ odi kyɛ ɛyɔ ɔ. Sona bɔ ngohyire wɔ ne, fa ɛpopalɛ ngoo gua ye ti so ma me.”

⁴Samuel yɔle bɔ AWURADE hyɛle ye ne, na ɔhɔle Betlehem. Kuro berɛ mbanyi fale ahunundetelɛ beeyiale ye, na bebisale ye kyɛ, “W’atee so bɔkɔɔ de?”

⁵Na obuale kyɛ, “Bɔkɔɔ. Mawa kyɛ mebaabɔ afɔleɛ mema AWURADE. Ɛ́mɔpete ɛmɔ nwo ná ɛ́mɔma yɛhɔ afɔleɛ ne abo.” Ɔpetene Yese ne ye mma nemɔ anwo, na osele bɛ kyɛ bɛbra afɔleɛ ne abo.

⁶Bedwuli berɛ ná Samuel nwuni Eliabo nen, ɔhane ye wɔ ye ti anu kyɛ, “Amba, sona bɔ AWURADE aneanea nu waye ye ne, ye yeɛ ogyi AWURADE nyunu ye.”

⁷ Nakoso AWURADE sele ye kyɛ, “Nnɛnea kyɛbɔ osi te ɔ anaa ye tendenn, ofikyɛ nna ye yeɛ mekuro ɔ. Na kyɛbɔ sona si nwu nikyee ne, nna sɔ yeɛ AWURADE nwu ye ɔ. Bɛ nye so nikye yeɛ sona nea ɔ, nakoso AWURADE de, ɔnea b’ahone nu.”

⁸Yeɛ Yese frɛle Abinadabo maa ɔɔpɛle nu Samuel nyunu berɛ. Nakoso Samuel sele kyɛ, “Ɛhe koso, AWURADE nguro.”

⁹Afei Yese mane Sama ɔɔpɛle nu, nakoso Samuel sele kyɛ, “Ɛhe koso, AWURADE nguro.”

¹⁰Yiti Yese mane ye mma mmienzua nzoo nemɔ bɛɛpɛle nu wɔ Samuel nyunu, na Samuel sele Yese kyɛ, “AWURADE nguro ɛhemɔ nu biala.”

¹¹ Afei Samuel bisale Yese kyɛ, “Wɔ mma mmienzua nemɔ, bɛ mu ɛhe?” Na obuale kyɛ, “Waha kãa paa ne, na ye de ɔ́nea mmoaen so.” Yeɛ Samuel sele Yese kyɛ, “Soma ma bɛɛfa ye bɛbra, ofikyɛ yɛngɔtena ase kyɛ yɛdidi, sana wawa wa koraka.”

¹²Yese somane maa bɛɛfale ye bɛwale. Né ɔte sona bɔ ɔte apɔ, ye nye mmaa dabadabaa, na ye nwo yɛ nyemene. Na AWURADE sele kyɛ, “Ɛhe ɛne, dwɔso fa ɛpopalɛ ngoo ne gua ye ti so!”

¹³Afei Samuel fale ɛpopalɛ ngoo towaa ne, na ohwiele ngoo ne guale Dawide ti so wɔ oliɛma nemɔ anyunu berɛ. Na ofi sɔ kyẽa ne bɔ ɔkɔ ne, AWURADE Sunzum kanyane Dawide paa. Afei Samuel sili nu hɔle Rama.

¹⁴ AWURADE Sunzum hwene ye nwo fili Sɔɔlo nwo, na AWURADE somane sunzum tɛɛ bie maa ɔɔteetee ye.

¹⁵Yiti Sɔɔlo somvoɛ nemɔ ha hyirele ye kyɛ, “Nana, sunzum tɛɛ bie bɔ ofi Nyameɛ berɛ yeɛ ɔteetee wɔ ɔ.

¹⁶ Yɛ mene, wɔ somvoɛ mɔ yeɛ yɛwɔ wɔ nyunu wa ye. Ma ate ma yɛɛpena sona bɔ ɔse sangoo bɔ paa ɔ, na sɛ sunzum tɛɛ ne fi Nyameɛ berɛ te pe wɔ so a, wabɔ wama wɔ nwo asande wɔ.”

¹⁷Na Sɔɔlo sele ye somvoɛ nemɔ kyɛ, “Ɛmɔɔpena sona bɔ ɔse ye bɔ paa bɛma me.”

¹⁸Na mmerandeɛ nemɔ anu ko buale kyɛ, “Manwu Betlehemniɛ Yese ɔwa bienzua bie kyɛ ɔse ye bɔ paa. Ɔte ahoneserɛniɛ, koɛhonɛniɛ, ye noa ate, ye nwo yɛ nyemene, na AWURADE gyi ye si.”

¹⁹Yiti Sɔɔlo tuli bɔfoɛ maa bɛhɔle Yese berɛ beesele ye kyɛ, “Ɛwa Dawide bɔ ɔnea mmoaen so ne, maa ɔbra me wa.”

²⁰Yese fale afunum, na ɔfale aleɛ, bobe nzaa ngomvo ko, ɔne abɔngye ba soale kaka ne, na ɔfa somane ɔwa Dawide maa ɔɔmane Sɔɔlo.

²¹Na Dawide wale Sɔɔlo berɛ ɔɔyɛle ye somvoɛ. Sɔɔlo hurole Dawide dwirɛ paa, na ɔmane Dawide yɛle ye somvoɛ bɔ otira ye akodeɛ ɔ.

²²Afei Sɔɔlo somane maa beesele Yese kyɛ, “Ma Dawide tena me nwo wa ɔso me, ofikyɛ mekuro ye dwirɛ paa.”

²³ Na mmerɛ biala, sɛ né Nyameɛ soma sunzum tɛɛ ne maa ɔte pe Sɔɔlo so a, ɔyɛ a Dawide bɔ sangoo ne ma Sɔɔlo nwo tɔ ye, ye nwo sande ye, na sunzum tɛɛ ne fi ye so kɔ.