Read Sehwi 1 Samuel 18 Bible Online

1 Samuel 18 - Sehwi bible

1 Samuel 18

¹Dawide ne Sɔɔlo lili ngɔmɔ yiele nen, Yonatan ne Dawide betirale abiɛngoɛ bɔ nu yɛ se ɔ, na Yonatan hurole ye dwirɛ kyɛ ye bɔbɔ ye nwo.

² Na ofi sɔ kyẽa ne, Sɔɔlo fale Dawide ɔne ye bɛtenane, na wamma wanza wangɔ ye baba awuro dɔ ko.

³ Afei Yonatan ne Dawide yɛle apam, ofikyɛ né okuro Dawide dwirɛ kyɛ ye bɔbɔ ye nwo.

⁴Yonatan purole ye ataadeɛ tendenn bɔ owurale ye ne mane Dawide, na ɔfale ye akodeɛ, ye ngrandɛ ne ye agyaen ne ye abɔsoɛ po bokale so.

⁵ Koɛ biala bɔ Sɔɔlo somane Dawide maa ɔɔhone ne, olili ngonim, yiti Sɔɔlo maa ɔlale koɛhonɛfoɛ nemɔ noa. Na ɛhe yɛle koɛhonɛfoɛ ne amukoraa ne Sɔɔlo somvoɛ nemɔ po fɛ.

⁶ Mmerɛ bɔ Dawide huni Filistiniɛ ne, ná ɔne koɛhonɛfoɛ nemɔ besa bɛba nen, mmrasua fale edwein ne abilie befili Yisrael nguro ne amukoraa so beeyiale Nana Sɔɔlo. Né bele akasaa ne firikyiwa bɛ́to anigye dwein.

⁷ Na mmrasua nemɔ gole abilie bɛtole dwein besurole so kyɛ, “Sɔɔlo ahu apee apee, yeɛ Dawide ahu apee buru apee buru.”

⁸Sɔ dwirɛ ne anyɛ Sɔɔlo fɛ, yiti ɔfɛle yaa hahii. Na ɔhane kyɛ, “Bɛnwa Dawide ahu apee buru apee buru, yeɛ me wora mahu apee apee ɔ. Nzikyɛ bieku yeɛ waha bɔ ye sa kɔha ye ɔ? Ahennie ye ɔ!”

⁹Yiti ofi sɔ kyẽa ne bɔ ɔkɔ ɔ, Sɔɔlo tuli ye nye siele Dawide so.

¹⁰ Aleɛ hyene ne, Nyameɛ somane sunzum tɛɛ bie maa ɔte pene Sɔɔlo so, na ye nye so yɛle ye krakra wɔ ye awuro berɛ. Sɔ mmerɛ ne, né Dawide ɔbɔ sangoo ne, kyɛbɔ né ɔbɔ ye daa biala ne. Né Sɔɔlo tira ye pealɛɛ ne.

¹¹ Sɔɔlo tole pealɛɛ ne, ofikyɛ onyane adwene kyɛ, “Ngɔfa ngɔwɔ Dawide maa ɔkɔha terɛ ne anwo.” Nakoso Dawide hwene ye nwo pɛen nyɔ bɔ wanwɔ ye ɔ.

¹²Né Sɔɔlo suro Dawide, ofikyɛ né AWURADE gyi Dawide si; nakoso Sɔɔlo de, né AWURADE aye ye sa wafi ye bo.

¹³Yiti Sɔɔlo yele Dawide fili ye nwo, na ɔmaa ɔɔlale koɛhonɛfoɛ apee noa. Na Dawide lale koɛhonɛfoɛ nemɔ noa ɔne bɛ hɔle koɛ mɔ besa bɛwale.

¹⁴Dawide nyane ngɔsoɛ wɔ bɔ ɔyɔle amukoraati nu, ofikyɛ AWURADE lili ye si.

¹⁵Na Sɔɔlo nwuni kyɛ Dawide onya ngɔsoɛ wɔ nikyee biala nu nen, osurole ye paa.

¹⁶Nakoso Yisrael amukoraa ne Yuda amukoraa hurole Dawide dwirɛ, ofikyɛ né ye yeɛ odi bɛ nyunu ɔfa bɛ kɔ koɛ ɔ.

¹⁷Afei Sɔɔlo sele Dawide kyɛ, “Nea, mma brasua panyi Merabo ɛhe. Ngɔfa ye ngɔmaa ekogya, nakoso sana etu wɔ nwo sie berɛ ma me, ná ɛko AWURADE koɛ ne.” Né Sɔɔlo adwene ole kyɛ, “Me de, mengɔfa me sa mengɔhã ye; Filistifoɛ yeɛ mekuro kyɛ beku ye ɔ.”

¹⁸Yeɛ Dawide buale Sɔɔlo kyɛ, “Me ole nwa? Me nwo ama gyi ye sɛ? Me se abusua gyi ye sɛ wɔ Yisrael, bɔ me, mebaayɛ Nana sia ɔ?”

¹⁹ Nakoso mmerɛ dwuli bɔ odi kyɛ Sɔɔlo fa ɔwa brasua Merabo ma Dawide nen, ɔfale Merabo mane Meholateniɛ Adriɛl maa ogyale.

²⁰Né Sɔɔlo awa brasua Mikal kuro Dawide. Na bɛbɔle Sɔɔlo amaneɛ nen, ɔyɛle Sɔɔlo fɛ.

²¹Yeɛ Sɔɔlo hane ye wɔ ye ti anu kyɛ, “Ngɔfa Mikal ngɔma ye ngɔfa ngosua ye ngaen, na ɔnate so Filistifoɛ konya ye kohũ ye.” Yiti Sɔɔlo sele Dawide ye pɛen nyɔ so kyɛ, “Afei de, ɛkɔyɛ me sia.”

²² Na Sɔɔlo hyɛle ye somvoɛ mɔ kyɛ, “Ɛmɔfea ase bɛha behyire Dawide kyɛ, ‘Tie, asɔ Nana nye, yeɛ ye somvoɛ amukoraati koso bekuro wɔ dwirɛ. Yiti ɛyɛ nana sia a, ɔte paa.’ ”

²³Sɔɔlo somvoɛ nemɔ feale ase hane sɔ dwirɛ ne behyirele Dawide. Na Dawide buale kyɛ, “Ɛmɔnwa nzɛ ɔte edwirɛ baa kyɛ ngɔyɛ Nana sia ɔ. Me, ehianiɛ baa, nnde huu.”

²⁴Na Sɔɔlo somvoɛ nemɔ fale Dawide mmuayɛɛ ne nwo amaneɛ bɛɛbɔle ye.

²⁵Yeɛ Sɔɔlo buale kyɛ, “Ɛmɔɔha behyire Dawide kyɛ, ‘Nana mbena kyɛ ɛyɛ braa ne nwo nningyein, na mmom ɔpena Filistifoɛ ɛyaa ko bɛ bienzua noa nwomaa, bɔ ɔkɔmaa Nana kɔtɔ ye pɔfoɛ mɔ so wereɛ ɔ.’ Né Sɔɔlo pena kyɛ Filistifoɛ beku Dawide.

²⁶Na Sɔɔlo somvoɛ nemɔ bɛɛhane sɔ dwirɛ ne behyirele Dawide nen, ɔyɛle Dawide fɛ paa kyɛ ɔbaayɛ Nana sia ɔ. Na mmerɛ ne andwu po,

²⁷yeɛ Dawide tuli ye bo ɔ, ɔne ye koɛhonɛfoɛ nemɔ, na oohuni Filistifoɛ ɛyaa nyɔ. Dawide fale bɛ bienzua noa nwomaa ne wale. Bɛfale nwomaa ne somaa pɛpɛɛpɛ bɛmane Nana Sɔɔlo, kyɛbɔ ɔkɔyɛ bɔ Dawide kɔyɛ Nana sia ɔ. Na Sɔɔlo fale ɔwa Mikal mane Dawide gyale.

²⁸Nakoso Sɔɔlo nwuni kyɛ AWURADE gyi Dawide si, ná ɔwa Mikal koso kuro Dawide nen,

²⁹ Sɔɔlo hɔle so surole Dawide paa, na Sɔɔlo pɔle Dawide wɔ ye asetena nu amukoraa.

³⁰Né ɔyɛ a Filisti safohene nemɔ bɛba kyɛ bɛbaaho koɛ. Na mmerɛ biala bɔ bɛwale nen, Dawide lili bɛ so ngonim trale Sɔɔlo somvoɛ ngaa ne amukoraati. Na ɛhe mane Dawide lele dumaa paa.