Read Sehwi 1 Samuel 22 Bible Online

1 Samuel 22 - Sehwi bible

1 Samuel 22

¹ Dawide fili Gate, na ɔnwatili ɔɔfeale nyɔboɛ bɔ wasi sua wɔ Adulam ne anu. Na oliɛma mɔ ne ye baba abusuafoɛ tele sɔ dwirɛ nen, bɛɛtoale ye wɔ berɛ.

²Na ebiala bɔ né ɔwɔ anwokyere nu, anaa ɔma kerɛ, anaa ye kunu ndwo ne, bɛboale bɛ noa bɛɛtoale ye wɔ berɛ, na ɔyɛle bɛ so safohene. Mmienzua kɔyɛ ɛyaa nna yeɛ bɛɛtoale ye ɔ.

³Dawide fili berɛ hɔle Misepe bɔ ɔwɔ Moabo. Na ɔfa tole Moabo hene nyunu kyɛ, “Mesrɛ wɔ ala, ma me baba ne me maame bɛɛtena wɔ wa kɔpem kyɛ ngonwu bɔ Nyameɛ kɔyɔ kɔma me ɔ.”

⁴Ɔɔfale bɛ wale Moabo hene berɛ, na bɛtenane ye berɛ mmerɛ amukoraa bɔ né Dawide wɔ anwoserɛ afealeɛ ne anu ne.

⁵ Na ngɔmhyɛlɛniɛ Gade sele Dawide kyɛ, “Nnɛtena anwoserɛ afealeɛ ne anu; fi nu kɔ Yuda aseɛ so.” Yiti Dawide fili berɛ, na osili nu hɔle Herete ɛhɔayeɛ nu.

⁶Afei Sɔɔlo tele kyɛ banwu nekaa bɔ Dawide ne mmenia bɔ bɛboka ye so ne bɛwɔ ɔ. Sɔ mmerɛ ne, né Sɔɔlo te akyea ne abo, wɔ pambaa bie aso wɔ Gibea. Né otira ye pealɛɛ, yeɛ afei né ye somvoɛ mɔ begyigyi ye nwo berɛ.

⁷Na Sɔɔlo sele ye somvoɛ mɔ bɔ begyigyi ye nwo berɛ ne kyɛ, “Ɛmɔ Benyaminfoɛ, ɛmɔtie! Yese awa ne, aso ɔkɔma ɛmɔ nu biala eboo anaa bobe boo? Aso ɛmɔ amukoraa, ɔkɔbɔ ɛmɔ koɛhonɛfoɛ apee apee so safohene, anaa ɛyaa ɛyaa so safohene?

⁸ Yiti ɛhe ati yeɛ ɛmɔ amukoraa bayɛ me nwo lɔen ye? Me kunu ba ne Yese awa bayɛ apam a, ɛmɔ nu biala ndia me gya so. Ɛmɔ nu biala ndwene me nwo, anaakyɛ ondia me gya so, kyɛ mma apesa awura me somvoɛ kyɛ ɔho tia me, kyɛ ɔtɛ me hu me, kyɛbɔ kekesaala ye ɔyɔ ye.”

⁹ Na Edomniɛ Dɔɔgye bɔ né ogyi Sɔɔlo somvoɛ nemɔ nwo berɛ ne, obuale kyɛ, “Nwuni Yese awa ne kyɛ ɔ́ba Ahitubo awa Ahimɛlɛke berɛ wɔ Nɔbo.

¹⁰Obisale AWURADE berɛ dwirɛ mane ye. Ɔmane ye aleɛ bɔ okoli ye atee so ɔ, na ɔfale Filistiniɛ Goliate ngrandɛ ne mane ye.”

¹¹Afei Nana Sɔɔlo somane maa bɛɛfale Ahitubo awa ɔsɔfo Ahimɛlɛke ne ɔse abusuafoɛ amukoraa bɔ bɛte asɔfo bɔ bɛwɔ Nɔbo bɛwale, na bɛ mukoraa bɛwale Sɔɔlo berɛ.

¹²Na Sɔɔlo sele kyɛ, “Wɔ, Ahitubo awa, tie! Na obuale kyɛ, “Me mene, métie.”

¹³Na Sɔɔlo bisale ye kyɛ, “Nzu ati yeɛ ɛne Yese awa ne bayɛ me nwo lɔen, bɔ ama ye aleɛ ne ngrandɛ, abisa Nyameɛ berɛ dwirɛ ama ye, maa ɔnate so ɔko tia me, bɔ ɔtɛ me ku me, kyɛbɔ kekesaala ye ɔyɔ ye?”

¹⁴Na Ahimɛlɛke buale Nana Sɔɔlo kyɛ, “Wɔ somvoɛ nemɔ amukoraa, bɛ nu nwa yeɛ odi nahorɛ kyɛ Dawide ɔ? Nana, ɔte wɔ sia, otie wɔ dwirɛ, na bebu ye wɔ w’awuro berɛ.

¹⁵Aso ɛnɛ angome yeɛ mabisa Nyameɛ berɛ dwirɛ mama ye ɔ? Daabi, nna ɛnɛ angome ɔ. Nana, ɛhe de, nnɛfa edwirɛ he susu wɔ somvoɛ, anaa me se abusuaniɛ biala. Ofikyɛ, né wɔ somvoɛ nze edwirɛ he anwo hwee, kyɛ ɔte edwirɛ piri oo, anaa kaaba bie oo.”

¹⁶Na Nana Sɔɔlo sele kyɛ, “Wɔ Ahimɛlɛke, ɔsɛ kyɛ beku wɔ, ɛne ɛse abusuafoɛ amukoraa.”

¹⁷Na Nana Sɔɔlo sele awɛmvoɛ bɔ begyigyi ye nwo berɛ ne kyɛ, “Ɛmɔhɔ AWURADE asɔfo nemɔ so beehuhu bɛ, ofikyɛ bɛ koso bɛwɔ Dawide bue nu. Né bɛse kyɛ wanwati, nakoso bandia me gya so.” Nakoso né Nana Sɔɔlo somvoɛ nemɔ benguro kyɛ bɛkɔfa bɛ sa bɛkɔhã AWURADE asɔfo nemɔ ɔ.

¹⁸Na Nana Sɔɔlo sele Dɔɔgye kyɛ, “Wɔ Dɔɔgye, kɔ asɔfo nemɔ so kohũhũ bɛ!” Na Edomniɛ Dɔɔgye hɔle asɔfo nemɔ so oohuhuni bɛ. Sɔ kyẽa ne, ohuni mmenia aburawɔtwɛ ne nnu bɔ bewura ɔsɔfo ataadeɛ bɔ ɔte nwera ɔ.

¹⁹ Na asɔfo nemɔ bɛ kuro Nɔbo koso, ɔfale ngrandɛ huhuni berɛ ama mukoraa: mmienzua ne mmrasua, ngwadaa ne nnɔma, nandwie, afunum ne mmoaen.

²⁰Nakoso Ahitubo awa Ahimɛlɛke ɔwa bienzua ko bɔ oli Abiata ne, onyane atee nwatili, na ɔhɔle Dawide berɛ.

²¹Abiata bɔle Dawide amaneɛ kyɛ Sɔɔlo ahũhũ AWURADE asɔfo nemɔ.

²² Na Dawide sele Abiata kyɛ, “Sɔ kyẽa ne bɔ nwuni Edomniɛ Dɔɔgye wɔ berɛ ne, né mese kyɛ, kyɛ ɔkɔyɛ biala ɔkɔɔhã kohyire Sɔɔlo. Ɔnate me ti yeɛ bahu ɛse abusuafoɛ amukoraati ɔ.

²³Maa yɛtena wa, na nnɛsuro, ofikyɛ sona bɔ ɔpena me ku me ne, wɔ koso ɔpena wɔ ku wɔ. Na ɛwɔ me wa de a, ngɔbɔ wɔ nwo waen.”