Read Sehwi 1 Samuel 23 Bible Online

1 Samuel 23 - Sehwi bible

1 Samuel 23

¹Nziɛ ye, bɛbɔle Dawide amaneɛ kyɛ, “Filistifoɛ afa koɛ baateta Keila kuro ne, na begu so bɛfẽ aburoo bɔ ɔwɔ nekaa bɔ bɛboro aburoo ne.”

²Na Dawide bisale AWURADE kyɛ, “Me ne Filistifoɛ hemɔ yɛɛho anaa?” Yeɛ AWURADE buale Dawide kyɛ, “Ɛne bɛ bɛɛho na de Keila kuro ne.”

³Nakoso Dawide mmenia nemɔ sele ye kyɛ, “Tie, Yuda wa po yeɛ yɛsuro ye, ná ye de yɛkɔhɔ Keila kyɛ yɛne Filisti koɛhonɛfoɛ yɛkwaaho ɔ!”

⁴Dawide bisale AWURADE bieku. Na AWURADE buale ye kyɛ, “Kɔ. Kɔ Keila, na ngɔfa Filistifoɛ ngowura wɔ sa.”

⁵Yiti Dawide ne ye mmenia nemɔ hɔle Keila, ɔne Filistifoɛ bɛhone, ohuhuni bɛ paa, na ɔfale bɛ nyɛmmoa nemɔ wale. Sɔ yeɛ Dawide yɔle lele Keilafoɛ ngoa ɔ.

⁶ Mmerɛ bɔ né Ahimɛlɛke awa Abiata ɔnwati kɔ Dawide berɛ wɔ Keila nen, ɔfale ɔsɔfo ataadeɛ ne hɔle.

⁷Bɛha behyirele Sɔɔlo kyɛ Dawide ahɔ Keila. Na Sɔɔlo sele kyɛ, “Ɛhe de, Nyameɛ afa ye wawura me sa, ofikyɛ kuro bɔ bafa mmuralɛ babeabea ye pambim nemɔ asi bɔ wahɔ nu ye de, ye de ɔte kyɛ waato ye nwo anoa nu ɔ.”

⁸Yiti Sɔɔlo boaboale koɛhonɛfoɛ ne amukoraa noa kyɛ bɛhɔ Keila beetua Dawide ne ye mmenia nemɔ, ná bɛ ne bɛ bɛho.

⁹Na Dawide tele kyɛ Sɔɔlo abɔ ye ti so porɛ nen, osele ɔsɔfo Abiata kyɛ, “Fa ɔsɔfo ataadeɛ ne bra.”

¹⁰Na Dawide hane kyɛ, “O, AWURADE Yisrael Nyameɛ, wɔ somvoɛ ate kyɛ Sɔɔlo pena kyɛ ɔba Keila, kyɛ ɔnate me ti ɔbaabɔ kuro ne.

¹¹Aso Keilafoɛ kɔfa me kowura ye sa anaa? Sɔɔlo kɔwa kyɛbɔ wɔ somvoɛ ate ne ala anaa? O, AWURADE Yisrael Nyameɛ, mesrɛ wɔ ala, ka kyire wɔ somvoɛ.” Na AWURADE buale kyɛ, “Yoo, ɔkɔwa.”

¹²Yeɛ Dawide bisale kyɛ, “Aso Keilafoɛ kɔfa me ne me mmenia nemɔ bekowura Sɔɔlo sa anaa?” Na AWURADE buale kyɛ, “Yoo, bɛkɔye ɛmɔ bɛkɔma ye.”

¹³Na Dawide ne ye mmenia nemɔ bɔ bɛte kɔyɛ ɛyaa nzia ne, befili Keila bɛhɔle, na bɛfale bɛ ti bɛbɔle buro. Na Sɔɔlo tele kyɛ Dawide anwati wafi Keila nen, ɔyakyili Keila hɔlɛ ne.

¹⁴Dawide tenane ɛserɛ so anwoserɛ afealeɛ nemɔ anu, wɔ mmokaa aseɛ bɔ ɔwɔ Sife ɛserɛ ne aso. Sɔɔlo hɔle so penane ye mmerɛ biala, nakoso Nyameɛ amva ye wanwura ye sa.

¹⁵Né Dawide wɔ Sife ɛserɛ so nekaa bie bɔ bɛfrɛ berɛ Horese, na ɔtele kyɛ Sɔɔlo asi nu kyɛ ɔbaapena ye ku ye.

¹⁶Yeɛ Sɔɔlo awa Yonatan sili nu hɔle Dawide berɛ wɔ Horese, na ɔkyekyele Dawide wora kyɛ Nyameɛ kɔbɔ ye nwo waen.

¹⁷ Ɔha hyirele ye kyɛ, “Nnɛsuro, ofikyɛ me baba Sɔɔlo ye sa ngɔhã wɔ. Ekoli Yisrael so hene, bɔ yeɛ ɛnne berɛ a, me yeɛ nwɔ berɛ ɔ; na me baba Sɔɔlo se ye sɔ.”

¹⁸ Afei bɛ munyɔ bɛyɛle apam wɔ AWURADE nyunu. Dawide tenane Horese berɛ, yeɛ Yonatan koso osa hɔle ye awuro.

¹⁹ Na Sifefoɛ hɔle Sɔɔlo berɛ wɔ Gibea bɛɛbɔle ye amaneɛ kyɛ, “Dawide aafea yɛ berɛ wɔ anwoserɛ afealeɛ bɔ ɔwɔ Horese ne anu, wɔ Hakila pambaa bɔ ɔwɔ Yesimɔn ngwaen dɔ ne aso.

²⁰Nana, mmerɛ biala bɔ ekuro kyɛ ɛtorotoro ba ne, bra. Na yɛ de, Nana, yɛkɔyɛ yɛ bue nu deɛ kyɛ yɛkɔfa ye yɛkowura wɔ sa ɔ.”

²¹Na Sɔɔlo buale kyɛ, “AWURADE yira ɛmɔ kyɛ ɛmɔanwu me anwumvoin ɔ!

²²Ɛmɔhɔ bɛɛneanea nu yé bieku, ná ɛ́mɔpena nekaa pɔtee bɔ ɔwɔ ɔ, ɔne sona bɔ ye nye apɛ ye so wɔ berɛ ɔ, ofikyɛ mate kyɛ ɔte sona bɔ ye nwo yɛ ndono ɔ.

²³Ɛmɔɔpena benwu ye afealeɛ ne amukoraa, ná ɛ́mɔfa ye nwo amaneɛ pɔtee bɛɛbɔ me. Ɔba ye sɔ a, me ne ɛmɔ yɛkɔhɔ. Na sɛ ɔwɔ mbɔtam berɛ angome de a, ye de ngɔpena ye wɔ Yuda mmusua amukoraa nu.”

²⁴Yiti Sifefoɛ nemɔ lili Sɔɔlo nyunu moa bɛhɔle Sife. Né Dawide ne ye mmenia nemɔ bɛwɔ Mayɔn ɛserɛ bɔ ɔwɔ aseɛ frɛtɛɛ, bɔ ɔwɔ Yesimɔn ngwaen dɔ ne aso.

²⁵Sɔɔlo ne ye mmenia sili nu hɔle kyɛ bɛkwaapena Dawide. Ebie bɔle Dawide amaneɛ, na ɔtorotorole hɔle nyɔbotaen nemɔ anu dɔ ɔɔtenane Mayɔn ɛserɛ ne aso. Sɔɔlo tele sɔ dwirɛ nen, ɔpole Dawide so hɔle Mayɔn ɛserɛ ne aso.

²⁶Né Sɔɔlo nate bokaa ne bue ko, yeɛ né Dawide ne ye mmenia koso bɛnate bokaa ne bue ko. Dawide mane ye nwo yɛle nyera kyɛ ɔkɔnwati bɔ Sɔɔlo ngonwu ye ɔ. Nakoso Sɔɔlo ne ye mmenia nemɔ, né bɛpena kyɛ bɛpɛ Dawide ne ye mmenia nemɔ nwo beyia bɛkye bɛ.

²⁷Na sɔ mmerɛ ne ala, ɛbɔfoɛ bie wale Sɔɔlo berɛ oosele ye kyɛ, “Sa bra ndɛndɛ, ofikyɛ Filistifoɛ bawa baabɔ aseɛ ne aso apaa.”

²⁸Yiti Sɔɔlo yakyili Dawide foalɛ, na ɔne Filistifoɛ bɛɛhone. Yiti bɛfrɛle nekaa bɔ ɔyakyili Dawide foalɛ ne Ɛnwatilɛ Nyɔbotaen.

²⁹Afei Dawide fili berɛ, na ɔhɔle Ɛn Gedi ɔɔtenane anwoserɛ afealeɛ nemɔ anu.