Read Sehwi 1 Samuel 28 Bible Online

1 Samuel 28 - Sehwi bible

1 Samuel 28

¹Sɔ mmerɛ ne, Filistifoɛ boaboale b’ɛlɔen noa kyɛ bɛkwaafa koɛ bɛtoa Yisrael. Na Akise sele Dawide kyɛ, “Ɛse ye pefee kyɛ, odi kyɛ ɛne wɔ mmenia nemɔ bɛkɔboka me koɛhonɛfoɛ nemɔ aso maa yɛkɔ koɛ ye.”

²Na Dawide buale Akise kyɛ, “Yoo, mate, ekonwu kyɛbɔ wɔ somvoɛ kɔhora kɔho kɔma wɔ ɔ.” Yeɛ Akise sele Dawide kyɛ, “Mate, ngɔmaa ɛkɔyɛ me nwo ɛwaenbɔlɛniɛ mmerɛ biala bɔ nde ngoa nu ɔ.”

³ Sɔ mmerɛ ne, né Samuel de wawu ama Yisrael amukoraa basu ye basie ye wɔ ye bɔbɔ ye kuro Rama. Né Sɔɔlo atu nzamangɔmhyɛlɛfoɛ ne musueyelɛfoɛ wafi aseɛ ne aso.

⁴Filistifoɛ boaboale bɛ noa, na bɛɛkyekyele asikyeleɛ wɔ Sunem. Sɔɔlo boaboale Yisrael ɛlɔen ne amukoraa noa, na bɛkyekyele asikyeleɛ wɔ Gilboa.

⁵Na mmerɛ bɔ Sɔɔlo nwuni Filisti koɛhonɛfoɛ nemɔ nen, ɛserɛ hane ye, na ɔbɔle fuin.

⁶ Sɔɔlo bisale AWURADE, nakoso laleɛ nu oo, Yurim so oo, anaa ngɔmhyɛlɛfoɛ so oo, AWURADE andɛ ye so.

⁷Afei Sɔɔlo sele ye somvoɛ nemɔ kyɛ, “Ɛmɔɔpena brasua nzamangɔmhyɛlɛniɛ bɛma me maa ngɔ ye berɛ abisa.” Na ye somvoɛ nemɔ buale ye kyɛ, “Nzamangɔmhyɛlɛniɛ bie wɔ Ɛndɔɔ.”

⁸Yiti Sɔɔlo sakyerale ye nwo, owurale ndaadeɛ mbaen biemɔ, na osili nu ɔne mmenia nyɔ bɛhɔle berɛ. Beedwuli braa ne berɛ kɔngɔen. Na osele braa ne kyɛ, “Fa ngɔndwemahwenɛ so kɔ abisa ma me, na frɛ bɔ ngɔbɔ ye dumaa ngohyire wɔ ne fi ɛborɔ dɔ ma me.”

⁹Na braa ne buale ye kyɛ, “Wɔ bɔbɔ ɛse bɔ Sɔɔlo ayɔ ɔ, kyɛ watu nzamangɔmhyɛlɛfoɛ ne musueyelɛfoɛ wafi aseɛ ye aso. Nzu ati yeɛ ɛpena kyɛ esua me ngaen maa beku me ee?”

¹⁰Nakoso Sɔɔlo fale AWURADE tale ndaen hyirele ye kyɛ, “Kyɛ AWURADE te ase ye, engonya ɛhe anwo asohwenɛ biala.”

¹¹Yeɛ braa ne bisale ye kyɛ, “Nwa yeɛ mvrɛ ye mvi ɛborɔ dɔ mmrɛ wɔ ɔ?” Na obuale kyɛ, “Frɛ Samuel fi dɔ ma me.”

¹²Na braa ne nwuni Samuel nen, braa ne teane nu serɛserɛ sele Sɔɔlo kyɛ, “Nzu ati yeɛ alakalaka me ee? Wɔ ole Sɔɔlo!”

¹³Na Nana Sɔɔlo sele ye kyɛ, “Nnɛsuro, nzikyɛ yeɛ enwu ye ɔ?” Na braa ne buale Sɔɔlo kyɛ, “Menwu sunzum bie kyɛ ofi aseɛ bo dɔ ofite ba.”

¹⁴Na Sɔɔlo bisale braa ne kyɛ, “Ye sue te sɛɛ?” Obuale kyɛ, “Biaa aworowaa bie yeɛ ófite ba ɔ, na owura ataadeɛ tendenn bie.” Yiti Sɔɔlo nwuni kyɛ Samuel ɔ, na Sɔɔlo fale ye nyunu butuli ase kotole ye.

¹⁵Afei Samuel bisale Sɔɔlo kyɛ, “Nzu ati yeɛ agyegye me amaa mafi ɛborɔ dɔ mawa ɔ”? Na Sɔɔlo buale kyɛ, “Edwirɛ piri paa ato me, ofikyɛ Filistifoɛ afa koɛ batoa me. Nakoso Nyameɛ ayakyi me nu, na ɔmva ngɔmhyɛlɛfoɛ so anaa laleɛ nu mmua me ko. Yiti yeɛ mafrɛ wɔ kyɛ eehyire me bɔ nyɔ ɔ.”

¹⁶Na Samuel bisale kyɛ, “Nzu ati yeɛ ebisa me bɔ odi kyɛ ɛyɔ ɔ, wɔ aberɛ bɔ ɛse kyɛ AWURADE ayakyi wɔ nu, ná wayɛ wɔ pɔfoɛ ɔ?

¹⁷ Bɔ AWURADE nate me so hane ne ala yeɛ wamaa wato wɔ ɔ, ofikyɛ AWURADE ale ahennie ne wafi wɔ sa nu, na wafa wama ebiɛngo Dawide.

¹⁸ Andie AWURADE dwirɛ, yeɛ ye yaa hahii bɔ wafɛ Amalɛkefoɛ so ne, angyina so annua bɛ boso, yiti yeɛ AWURADE ama edwirɛ he ato wɔ ɛnɛ ye.

¹⁹ Asa koso, AWURADE kɔfa Yisrael ne wɔ kowura Filistifoɛ sa; na ɛhema ɛne wɔ mma mmienzua mɔ bɛkɔɔboka me so. Na AWURADE kɔfa Yisrael koɛhonɛfoɛ koso kowura Filistifoɛ sa.”

²⁰Berɛ ne ala, Sɔɔlo tu tɔle aseɛnwo berɛ, ɔlale berɛ bangwaa, ofikyɛ Samuel noa dwirɛ ne mane ɛserɛ hane ye. Ye nwo yɛle ye hodwoo, ofikyɛ né ollili hwee sɔ kyẽa ne amukoraa ne sɔ kɔngɔen ne amukoraa.

²¹Braa ne hɔle Sɔɔlo nwo berɛ, na onwuni kyɛ waboto paa ne, osele ye kyɛ, “W’afaneɛ atie wɔ dwirɛ. Mafa me ngoa mato serewa mayɔ bɔ ɛha hyirele me ne.

²²Yiti wɔ koso tie bɔ w’afaneɛ ka ye. Maa mbena nikyee kãa ma ɛha wɔ noa. Didi ná nya anwoserɛ bɔ ɛkɔfa kosi nu kɔhɔ ɔ.”

²³Sɔɔlo ambene, na ɔhane kyɛ, “Mengoli.” Nakoso ye somvoɛ nemɔ ne braa ne hɔle so srɛle ye, na ɔpenene bɛ dwirɛ ne aso. Yiti odwɔsole fili aseɛnwo berɛ tenane mba ne aso.

²⁴Né braa ne le nandwie ba bɔ walɔ ɔ wɔ awuro berɛ. Ɔyɛle ndɛndɛ huni ye, ɔfale esam fofale ye nwo, na ɔfa yɛle taterɛ kabrɛdi.

²⁵Ɔfa siele Sɔɔlo ne ye somvoɛ nemɔ nyunu, na belili. Na besili nu bɛhɔle kɔngɔen ne ala.